ދައުލަތާއެކު އެއްބަސްވުމަކަށް އާދެވުމުން ދީބާޖާ އިން ކުރި ދައުވާ އެ ކުންފުނިން އަނބުރާ ގެންގޮސްފި
ދީބާޖާ އިންވެސްޓްމަންޓާ އެކީ ޓްރާންސްޕޯޓް މިނިސްޓްރީން ވެފައިވާ އެއްބަސްވުން ސަރުކާރުން ބާތިލްކޮށްފައި ވަނީ ގޯސްކޮށް ކަމަށް ސުޕްރީމްކޯޓުން ވަނީ ކަނޑައަޅާފައި
ޖަސްޓިސް ބިލްޑިންގ
ދައުލަތާއެކު އެއްބަސްވުމަކަށް އާދެވުމުން ދީބާޖާ އިން ކުރި ދައުވާ އެ ކުންފުނިން އަނބުރާ ގެންގޮސްފިއެވެ.
ފެރީގެ ހިދުމަތް ދިނުމަށް ދީބާޖާ އިންވެސްޓްމަންޓާ އެކީ ޓްރާންސްޕޯޓް މިނިސްޓްރީން ވެފައިވާ އެއްބަސްވުން ސަރުކާރުން ބާތިލްކޮށްފައި ވަނީ ގޯސްކޮށް ކަމަށް ކަނޑައަޅާ އެ ކުންފުންޏަށް ބަދަލު ދޭން ޖެހޭ ކަމަށް ސުޕްރީމް ކޯޓުން ވަނީ ނިންމާފައެވެ.
އެހެންކަމުން އެ މައްސަލަ އަލުން ބެލުމަށް ސިވިލް ކޯޓަށް ވަނީ ތަހުވީލުކޮށްފައެވެ. ބުރާސްފަތި ދުވަހު އެ މައްސަލަ ކޯޓުން ބޭރުކޮށްލާފައި ވަނީ ދީބާޖާ އިން ކޮށްފައިވާ ދައުވާ އަނބުރާ ގެންދަން އެ ކުންފުނިން ނިންމުމުންނެވެ. އެ މައްސަލަ އަނބުރާ ގެންދަން ދީބާޖާއިން އެދިފައި ވަނީ މިދިޔަ ސެޕްޓެމްބަރ މަހުގެ 21 ވަނަ ދުވަހުއެވެ.
ސިވިލް ކޯޓުގެ ޙުކުމްގައި ވަނީ މައްސަލަ އަނބުރާ ގެންދަނީ އެ މައްސަލަ އާއި ކޯޓުން ބޭރުގައި ދައުލަތާ އެކު އެއްބަސްވުމަކަށް އާދެވިފައިވާތީ ކަމަށެވެ. ތިން އަތޮޅަކަށް ދަތުރުފަތުރުގެ ޚިދުމަތް ފޯރުކޮށްދިނުމަށް ދީބާޖާ އިންވެސްޓްމަންޓް ކުންފުންޏާ ހަވާލުކޮށްފައި ވަނީ ކުރީގެ ރައީސް މުހައްމަދު ނަޝީދުގެ ވެރިކަމުގައެވެ. އެއީ 2010 ވަނަ އަހަރު އެވެ. އޭގެ 3 އަހަރުފަހުން ކުރީގެ ރައީސް ޑރ. މުހައްމަދު ވަހީދުގެ ސަރުކާރުން ވަނީ އެ އެއްބަސްވުން ބާތިލްކޮށްފައެވެ.
އެ އެއްބަސްވުން ބާތިލް ކުރީ އުސޫލާއި ޚިލާފަށް ކަމަށް ބުނެ ދީބާޖާ އިން ސިވިލްކޯޓަށް ފުރަތަަމަ ހުށަހެޅި މައްސަލައިގައި ހުކުމްކޮށްފައި ވަނީ ދައުލަތުން އެ ކުންފުންޏަށް 348 މިލިއަން ރުފިޔާދޭން ޖެހޭނެ ކަމަށެވެ. ހައިކޯޓުގައި ދައުލަތުން އެ މައްސަލަ އިސްތިޢުނާފްކުރުމުން ވަނީ ސިވިލްކޯޓުގެ ޙުކުމް ބާތިލްކޮށްފައެވެ.
އެހެންނަމަވެސް އޭގެ ފަހުން 2019 ވަނަ އަހަރު އެ މައްސަލަ ސުޕްރީމްކޯޓަށް ހުށަހެޅުމުން ސުޕްރީމް ކޯޓުން މައްސަލަ ނިމުނީ ދީބާޖާ އާއި އެއްކޮށެވެ. އެއާއި އެކު ދީބާޖާ އަށް ބަދަލުގެ ގޮތުގައި 174 މިލިއަން ރުފިޔާ ދޭން ނިންމީ މަޝްވަރާކޮށްގެންނެވެ.
ދައުލަތުން އެ ހުކުމް އަލުން ދިރާސާކުރުމަށް ހުށަހެޅިއެވެ. ހުކުމް ދިރާސާކުރުމަށް ފަހު ސުޕްރީމް ކޯޓުން ވަނީ އެ ކޯޓުގެ ކުރީގެ ޙުކުމް ބާތިލްކުރަން ނިންމާފައެވެ. ދީބާޖާ އަށް ހައިކޯޓުގެ ނިންމުން ސުޕްރީމް ކޯޓުގައި އިސްތިއުނާފް ކުރަން ފުރުސަތު ދިނުމުން، ހައިކޯޓުން ސިވިލް ކޯޓުގެ ހުކުމް ބާތިލުކޮށްފައިވާ މައްސަލަ އެ މައްސަލަ އަނެއްކާވެސް ސުޕްރީމް ކޯޓުގައި އިސްތިއުނާފްކުރިއެވެ.
އޮކްޓޫބަރު 9، 2022 ގައި ކުރި ސުޕްރީމް ކޯޓުން ވަނީ ސަރުކާރުން އެ އެއްބަސްވުން ބާތިލްކުރީ ރަނގަޅަށް ނޫން ކަމަށް ނިންމާފައެވެ. އަދި ދީބާޖާއަށް ލިބެންޖެހޭ ބަދަލުގެ މިންވަރު ރަނގަޅު ނޫން ކަމަށް ވެސް ހުކުމްގައި އޮތެވެ. އެހެންކަމުން ދީބާޖާ އަށް ލިބޭ ބަދަލު ކަނޑައެޅުމަށް އިތުރު މައްސަލަ އެއް ހުށަހަޅަން ވަނީ ފުރުސަތު ދީފައެވެ. ބުރާސްފަތި ދުވަހު ދީބާޖާ އިން އަނބުރާ ގެންދިޔަ މައްސަލަ އަކީ އެއީއެވެ.
