ޔޫރޯ ފުޓުބޯޅަ މުބާރާތުގެ ކޮލިފިކޭޝަންގައި އަޔަލެންޑާ ދެކޮޅަށް ކުޅުނު މެޗުން މޮޅުވެ، ނެދަލެންޑްސް މުބާރާތުގެ ޖާގައެއް ކަށަވަރު ކޮށްފި އެވެ.

އަންނަ އަހަރު ޖަރުމަނުގައި އޮންނަ ޔޫރޯ ފުޓުބޯޅަ މުބާރާތުން ނެދަލެންޑްސް ޖާގަ ހޯދީ، ގްރޫޕް ބީގެ ދެ ވަނަ ޓީމުގެ ގޮތުގަ އެވެ. ހޮނިހިރު ދުވަހުގެ ރޭ އަޔަލެންޑާ ދެކޮޅަށް ކުޅުނު މެޗު ނެދަލެންޑްސް އިން ކާމިޔާބު ކުރީ 1-0 އިންނެވެ. މުޅި މެޗުގައި ވެސް ރަނގަޅަށް ކުޅުނު ނެދަލެންޑްސްގެ ލަނޑު 12 ވަނަ މިނެޓުގައި ޖެހީ ވައުޓް ވެހޯސްޓް އެވެ. އޭނާ އެ ލަނޑު ޖެހީ ސްޓެފަން ޑީ ވާޖީ ތަނަވަސްކޮށްދިން ފުރުސަތެއްގަ އެވެ. މި ގްރޫޕްގެ ދެ ވަނައިގައި ނެދަލެންޑްސް އޮތީ ހަތް މެޗުން 15 ޕޮއިންޓު ހޯދައިގެންނެވެ. ފަސް މެޗުން އެ ޓީމު މޮޅުވެފައިވާއިރު، ދެ މެޗުން ވަނީ ބަލިވެފަ އެވެ. ކޮލިފިކޭޝަންގެ ފަހު މެޗުގައި އެ ޓީމު ނުކުންނާނީ ގިބްރޯލްޓާއާ ދެކޮޅަށެވެ.

މިދިޔަ އަހަރު ޤަތަރުގައި އޮތް ފީފާ ވޯލްޑް ކަޕަށްފަހު، ނެދަލެންޑްސްގެ ކޯޗުކަމަށް ދެ ވަނަ ފަހަރަށް ރޮނާލްޑް ކޫމަން ހަމަޖެއްސީ ވެސް ޔޫރޯ އަށް ކޮލިފައިވުމުގެ މަޤުސަދުގަ އެވެ. ނެދަލެންޑްސް އިން ވަނީ 1998 ވަނަ އަހަރުގެ ޔޫރޯ މުބާރާތް ކާމިޔާބު ކޮށްފަ އެވެ. އޭރު އެ ޓީމުގެ ކުޅުންތެރިޔެއްގެ ގޮތުގައި ކޫމަން ކުޅުނެވެ. އެންމެ ފަހުން 2020 ވަނަ އަހަރު އޮތް ޔޫރޯގައި ނެދަލެންޑްސް އަށް ދެވުނީ ގަދަ 16އާ ހަމައަށެވެ.