އަޅުގަނޑުގެ އިތުބާރު ނެތްކަމުގެ މައްސަލައެއް ވައްދައިފިނަމަ، މަޤާމުން އިސްތިއުފާ ދޭނަން: އަސްލަމް
16 ނޮވެމްބަރު 2023 | ބުރާސްފަތި 07:13މިހާރަށްވުރެ މަޖިލިސް ހަލުވި ކުރުމަށް ޤަވާއިދުގެ ތެރެއިން ކުރެވޭނެ ކަންކަން ހުންނާނެ
ރައްޔިތުންގެ މަޖިލީހުގެ ރައީސް މުޙައްމަދު އަސްލަމް
ރައްޔިތުންގެ މަޖިލިސް ރައީސްކަމުގެ މަޤާމުގައި ހުންނެވުމުގެ އިތުބާރު ނެތްކަމަށް މެންބަރުން ނިންމަވައިފިނަމަ އެ މަޤާމުގައި ނުހުންނަވާނެ ކަމަށާއި، އިސްތިއުފާ ދެއްވާނެކަމަށް މަޖިލީހުގެ ރައީސް، ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ވިދާޅުވެއްޖެއެވެ.
ބުރާސްފަތި ދުވަހު އޮތް ނޫސްވެރިންގެ ބައްދަލުވުމުގައި ނޫސްވެރިއަކު ދެންނެވި ސުވާލަކަށް ޖަވާބު ދެއްވަމުން އަސްލަމް ވިދާޅުވީ، އޭނާގެ އިތުބާރު ނެތްކަމަށް މެންބަރުން ނިންމަވައިފިނަމަ އެ މަޤާމުގައި ނުހުންނަވާނެކަމަށެވެ.
އޭގެ އިތުރުން ވެސް މިހާރަށްވުރެ މަޖިލިސް ހަލުވި ކުރުމަށް ޤަވާއިދުގެ ތެރެއިން ކުރެވޭނެ ކަންކަން ހުންނާނެ ކަމަށާއި، އެކަންކަން ކުރައްވާނެކަމަށް އަސްލަމް ވިދާޅުވިއެވެ.
ސަޕްލިމެންޓަރީ ބަޖެޓާއި ގުޅޭގޮތުން ތުހުމަތުވާ ސުވާލުތަކަށް ޖަވާބުދެއްވަމުން އަސްލަމް ވިދާޅުވީ، މަޖިލީހުގެ ރައީސްގެ ހައިސިއްޔަތުން ބަޖެޓާއި ގުޅޭގޮތުން ބަލާފައިވާނީ ޤާނޫނުގައިވާ ގޮތުން ބަޖެޓު ހުށައެޅިފައިވޭތޯ ނުވަތަ ނޫންތޯކަމަށެވެ.
މެންބަރުންގެ ހުރި ކަންބޮޑުވުންތަކަކީ ކޮމިޓީ މަރުޙަލާގައި ވެސް އަލިއަޅުވާލެވޭނެ ކަންކަންކަމަށް އަސްލަމް ވިދާޅުވިއެވެ.
އަދި ޤާނޫނާ ޚިލާފަށް ކަމެއް ހިނގާނަމަ އެކަންކަން ބެލުމަށް އެކަށައެޅިފައިވާ މުއައްސަސާތަކުން އެކަންކަން ބަލާނެކަން ވެސް އަސްލަމް ފާހަގަ ކުރެއްވިއެވެ.
