ބަޔާން އެއް ވަނަ އަށް، ވިދާލީ ކޭން

ޖަރުމަނު ލީގުގައި ހެއިޑެންހެއިމާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކުން ލީގު ތާވަލްގެ އެއް ވަނަ އަށް ޖެހިލައިފި އެވެ.

ހޮނިހިރު ދުވަހުގެ ރޭ ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 4-2 އިންނެވެ. މެޗުގެ ފުރަތަމަ ހާފުގައި ބަޔާނުން ވަނީ ދެ ލަނޑު ޖަހައިފަ އެވެ. މެޗުގެ 14 ވަނަ މިނެޓުގައި ބަޔާނަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. އެ ލަނޑު ޖަހަން އޭނާ އަށް ފުރުސަތު ތަނަވަސްކޮށްދިނީ ލެރޯއީ ސާނޭ އެވެ. އޭގެ ފަހުން ސާނޭ ތަނަވަސްކޮށްދިން އިތުރު ފުރުސަތެއްގައި، 44 ވަނަ މިނެޓުގައި ކޭން ވަނީ ބަޔާންގެ ދެ ވަނަ ލަނޑު ޖަހައިފަ އެވެ.

ދެ ވަނަ ހާފަށް ނުކުމެ ހެއިޑެންހެއިމުން ވަނީ ދެ ލަނޑު ޖަހައި، ނަތީޖާ ހަމަހަމަ ކޮށްފަ އެވެ. 67 ވަނަ މިނެޓުގައި އެ ޓީމުގެ ފުރަތަމަ ލަނޑު ޖެހީ ކްލެއިންޑިއެންސްޓު އެވެ. އޭގެ ތިން މިނެޓު ފަހުން އެ ޓީމަށް ނަތީޖާ ހަމަހަމަ ކޮށްދިނީ ބެސްޓޭ އެވެ. މެޗުގައި ދެ ވަނަ ފަހަރަަށް ބަޔާނަށް ލީޑު ނަގައިދިނީ 72 ވަނަ މިނެޓުގައި ރަފައެލް ގުރެއިރޯ އެވެ. ބަޔާންގެ ފަހު ލަނޑު 85 ވަނަ މިނެޓުގައި ޖެހީ އެރިކް މެކްސިމް ޗޮފޫ މޯޓިން އެވެ.

މޮޅާއެކު ބަޔާން އެއް ވަނައިގައި އޮތީ ޕޮއިންޓެއްގެ ލީޑަކާ އެކު އެވެ. މިހާތަނަށް ކުޅުނު 11 މެޗުން އެ ޓީމަށް ވަނީ 29 ޕޮއިންޓު ލިބިފަ އެވެ. ބަޔާނަށް ވުރެ އެއް މެޗު މަދުން ކުޅެގެން ދެ ވަނައިގައި ބަޔާ ލެވަކޫސަން އަށް ލިބެނީ 28 ޕޮއިންޓެވެ.