24 ގަޑިއިރު ތެރޭގައި އިސްރާއީލުން އައްޝިފާ ހޮސްޕިޓަލަށް އަމާޒުކޮށް ފަސް ފަހަރަށް ހަމަލާދީފި

24 ގަޑިއިރު ތެރޭގައި އައްޝިފާ ހޮސްޕިޓަލަށް އަމާޒުކޮށް، އިސްރާއީލުގެ އަސްކަރިއްޔާއިން ފަސް ފަހަރެއްގެ މަތިން ހަމަލާދީފައި ވާކަމަށް ޣައްޒާގެ އިންޓީރިއަރ މިނިސްޓްރީން ބުނެފިއެވެ.

އިސްރާއީލުގެ ޓޭންކުތައް އޮތީ އެ ހޮސްޕިޓަލް ވަށާލާފައެވެ. އަދި އެހިސާބުގައި ހުރި އިމާރާތްތަކުގައި ސްނައިޕަރުން ތިބިއިރު، އެހޮސްޕިޓަލުން އެއްވެސް މީހަކަށް ބޭރަކަށް ނުދެވެއެވެ. އަދި ހޮސްޕިޓަލަށް އެއްވެސް މީހަކަށް ނުވަދެވޭއިރު، ސްނައިޕަރުން ހޮސްޕިޓަލަށް އަމާޒުކޮށް ހަމަލާދެމުން އަންނަކަމަށް ރިޕޯޓްތައް ބުނެއެވެ. ހޮސްޕިޓަލުގެ ވަށައިގެންވާ އިމާރާތްތަކަށް އަމާޒުކޮށް ހަމަލާތައް ދެމުންދާއިރު، ހޮސްޕިޓަލުގެ ތެރޭގައި އެތައް ހާސް އާންމުންނެއް އަންނަނީ ބޯހިޔާވަހިކަން ހޯދަމުންނެވެ.

އެތައް ހާސް ބަލި މީހުންނެއް ހޮސްޕިޓަލުގައި ތިބިއިރު، ހުކުރު ދުވަހުގެ ރޭ އިސްރާއީލުގެ އަސްކަރިއްޔާއިން ވަނީ ހޮސްޕިޓަލުގެ މައި ގޭޓަށް ހަމަލާދީފައެވެ. އިސްރާއީލުން ތަކުރާރުކޮށް އައްޝިފާ ހޮސްޕިޓަލަށް އަމާޒުކޮށް ހަމަލާދެމުން އަންނައިރު، އެތަނުގައި މަސައްކަތްކުރާ މެޑިކަލް ސްޓާފުން އެންމެ ފަހުވަގުތާ ހަމައަށްވެސް ދެމިތިބޭނެކަމަށް އެހޮސްޕިޓަލުގެ ޑިރެކްޓަރު މުހައްމަދު އަބޫ ސަލްމިޔާ ވަނީ ވިދާޅުވެފައެވެ. މިއީ ހޮސްޕިޓަލާ ދެކޮޅަށް އިސްރާއީލުން ކުރާ ހަނގުރާމައެއް ކަމަށާއި މިއީ މީގެކުރިން ދުވަހަކުވެސް ހަނގުރާމައެއްގައި ހިނގާފައިވާ ކަމެއް ނޫންކަމަށް އޭނާ ވިދާޅުވިއެވެ.

އިސްރާއީލުން ތުހުމަތުކުރަމުން އަންނަނީ އައްޝިފާ ހޮސްޕިޓަލުގެ އަޑީގައި ހަމާސްގެ ހެޑް ކުއާޓަރު ހިންގަމުން އަންނަކަމަށެވެ. އަދި ހޮސްޕިޓަލު ތެރޭގައި ހަނގުރާމަވެރިން ތިބިކަމަށްވެސް ވަނީ ބުނެފައެވެ. އެކަން އައްޝިފާ ހޮސްޕިޓަލުން އެތައް ފަހަރަކު ދޮގުކޮށްފައިވާއިރު، ހަމާސް އިން ވަނީ ޣައްޒާގެ ހޮސްޕިޓަލުތައް ހަމާސްގެ ހަނގުރާމަވެރިން ބޭނުންކުރަމުންދޭތޯ ބެލުމަށް ބައިނަލްއަގުވާމީ މުޖުތަމައަށް ދައުވަތު ދީފައެވެ.

އިސްރާއީލުން އެތައް ހަމަލާތަކެއް އެ ހޮސްޕިޓަލަށް އަމާޒުކުރަމުންދާއިރު، ހުކުރު ދުވަހުގެ ރޭ ހޮސްޕިޓަލުން ވަނީ ކަރަންޓުވެސް ކެނޑިފައެވެ. ރިޕޯޓްތައް ބުނާގޮތުގައި، ހޮސްޕިޓަލުގައި މިވަގުތު ތިބީ އެކި ޒަޚަމްތައް ލިބިގެން އެއްވެސް ތާކަށް ނުދެވޭވަރުވެފައި ތިބި މީހުންނާއި، އެމީހުންގެ އެހީތެރިންނާއި ސިއްހީ ޚިދުމަތްތެރިންނެވެ.