ސްޓާލިން އާއި ބެންވައިޓް އިނގިރޭސި ޓީމުން އަނެއްކާ ވެސް ބާކީކޮށްފި

ޗެލްސީގެ ފޯވަޑް ރަހީމް ސްޓާލިން އާއި އާސެނަލްގެ މިޑްފީލްޑަރު ބެންވައިޓް އަނެއްކާ ވެސް އިނގިރޭސި ގައުމީ ޓީމުން ބާކީކޮށްފި އެވެ.

މިއީ ސްޓާލިން ޖެހިޖެހިގެން ގައުމީ ޓީމުން ބާކީކުރި ފަސް ވަނަ ފަހަރެވެ.

ޔޫރޯ ކޮލިފައިންގައި މޯލްޓާ އާއި މެސެޑޯނިއާއާ ވާދަކުރާ ޓީމުން މި ދެ ކުޅުންތެރިން އުނިކުރިއިރު ކުލަބުގައި ދެ ކުޅުންތެރިން ވެސް ދަނީ ރަނގަޅު ކުޅުމެއް ދައްކަމުންނެވެ. ނަމަވެސް ގައުމީ ކޯޗު ގެރްތެ ސައުތު ގޭޓް ބުނީ މި ކުޅުންތެރިންނަށް ދާއިމީކޮށް ފުރުސަތު ނުގެއްލޭ ކަމަށެވެ.

އޭނާ ބުނީ އިނގިރޭސި ކުޅުންތެރިންގެ އަދަދު ގިނަވެ، ގިނަ މެޗުތަކެއް ކުލަބުގައި ކުޅޭ ވަރަކަށް ކުޅުންތެރިންގެ ވާދަވެރިކަން އަންނަނީ ބޮޑުވަމުން ކަމަށެވެ.

ބެންވައިޓާ ބެހޭ ގޮތުން ސައުތުގޭޓް ބުނީ އޭނާ އަކީ ޑިފެންސްގެ ގިނަ މަގާމުތަކަކަށް ކުޅެވޭ މޮޅު ކުޅުންތެރިއެއް ކަމަށާއި އާސެނަލް ދައްކާ ކުޅުން ވެސް މޮޅު ކަމަށެވެ. ނަމަވެސް ގައުމީ ޓީމުގައި މިވަގުތު ތިބި ކުޅުންތެރިން ވެސް ވާދަވެރިކަން ސާބިތުކޮށްދެމުންދާތީވެ މިވަގުތު ބަދަލެއް ގެންނަން ބޭނުންނުވީ ކަމަށެވެ.