އީވާ ނެތަސް ނަޝީދުގެ އިތުބާރު ނެތްކަމުގެ މައްސަލަ ކުރިއަށް ގެންދެވޭނެކަމަށް ނިންމުމާއެކު، އާދިއްތަ ދުވަހަށް މައްސަލަ ތާވަލުކޮށްފި
އެ މައްސަލަ އެޖެންޑާކޮށްފައިވަނީ ނޮވެމްބަރު މަހުގެ 12 ވާ އާދިއްތަ ދުވަހުގެ ހެނދުނު 09:00ށް
ރައްޔިތުންގެ މަޖިލީހުގެ ރައީސް، މުހައްމަދު ނަޝީދު
ރައްޔިތުންގެ މަޖިލީހުގެ ރައީސްގެ އިތުބާރު ނެތްކަމުގެ މައްސަލާގައި ރައްޔިތުންގެ މަޖިލީހުގެ އިދާރާއިން ނިންމި ނިންމުމާ ގުޅިގެން އެމްޑީޕީން ސުޕްރީމް ކޯޓަށް ހުށަހަޅާފައިވާ މައްސަލައިގެ ހުކުމްކުރުމާއެކު، އަނެއްކާވެސް އެ މައްސަލަ އަންނަ އާދިއްތަ ދުވަހަށް ތާވަލުކޮށްފިއެވެ.
އެ މައްސަލަ އެޖެންޑާކޮށްފައިވަނީ ނޮވެމްބަރު މަހުގެ 12 ވާ އާދިއްތަ ދުވަހުގެ ހެނދުނު 09:00ށެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އެޖެންޑާ ކުރުމަށްފަހު ތަފާތު 5 ފަހަރެއްގެ މަތިން މި މައްސަލަ އެޖެންޑާކުރިއެވެ. ނަމަވެސް އެއިން އެއްވެސް ފަހަރަކު މައްސަލަ ކުރިއަކަށް ނުގެންދެވުނެވެ. މަޖިލިސް ކުރިއަށް ނުގެންގޮސް، މަޖިލީހުގެ ޖަލްސާތަކެއް ކެންސަލްކުރަމުންދާތީ، ނަޝީދުގެ އިތުބާރު ނެތްކަމުގެ މައްސަލަ ކުރިއަށްގެންދެވޭނެ ގޮތެއް ހޯދަން އެމްޑީޕީން ވަނީ ސުޕްރީމްކޯޓަށް މައްސަލައެއް ހުށަހަޅާފައެވެ.
ބުރާސްފަތި ދުވަހު އެ މައްސަލައިގެ ހުކުމް އިއްވާފައިވަނީ، އެ މައްސަލަ ބެއްލެވި ފަސް ފަނޑިޔާރުންގެ ބެންޗުގެ އިއްތިފާގުންނެވެ. ސުޕްރީމް ކޯޓުން ވަނީ، މަޖިލީހުގެ ރައީސްގެ އިތުބާރު ނެތްކަމުގެ މައްސަލަ ކުރިއަށްގެންދެވޭނެ ކަމަށާއި، ރިޔާސަތު ބެލެހެއްޓޭ މެންބަރުންގެ މާއްދާއަކީ ކޮންމެ ހާލަތެއްގައިވެސް ހިނގާނެ މާއްދާއެއް ކަމަށް ނިންމާފައެވެ.
ނަޝީދުގެ އިތުބާރު ނެތްކަމުގެ މައްސަލައިގެ ގަރާރު ހުށަހެޅީ 49 މެމްބަރުންގެ ސޮޔާއެކު، ނިމިދިޔަ އޮކްޓޯބަރު މަހުގެ ތެރޭގައެވެ.
