ހަމާސްގެ އަތްދަށުގައި ތިބި އަސީރުންގެ ތެރެއިން ބައެއް އަސީރުން ދޫކޮށްލުމާއި ގުޅޭ މަޝްވަރާތައް އަދިވެސް ކުރިޔަށް

ހަމާސްގެ އަތްދަށުގައި ތިބި އަސީރުންގެ ތެރެއިން 10 އާއި 15 ދެމެދުގެ އަސީރުން މިނިވަންކުރުމާއި ގުޅޭ މަޝްވަރާތައް އިސްރާއީލާއި ހަމާސް އާ ދެމެދު ކުރިޔަށްދާކަމަށް ރޮއިޓަރސް އާއި އޭއެފްޕީން ބުނެފިއެވެ.

އަސީރުން މިނިވަންކުރުމާއި ގުޅޭ މަޝްވަރާތައް ކުރިޔަށްދަނީ ގަތަރު މެދުވެރިއެއްގެ ރޯލު އަދާކޮށްގެންނެވެ. އަސީރުން ދޫކޮށްލަނީ ދެތިން ދުވަހަށް އިސްރާއީލުން ދެމުންދާ ހަމަލާތައް ހުއްޓާލާގޮތަށްކަމަށް ހަމާސް އާއި މިސްރުގެ ފަރާތްތަކާއި ހަވާލާދީ ރޮއިޓަރސް އާއި އޭއެފްޕީން ވަނީ ރިޕޯޓްކޮށްފައެވެ.

މިމަޝްވަރާތަކާއި ގުޅޭ މައުލޫމާތު އެނގޭ ފަރާތްތަކާއި ހަވާލާދީ ރިޕޯޓްތަކުގައި ބުނެފައިވަނީ މި ޑީލާ ގުޅޭ ގިނަކަންކަން އަދި ކަށަވަރުނުވާކަމަށެވެ.

އެގޮތުން އަސީރުންގެ ގޮތުގައި ހަމާސް އިން ދޫކޮށްލަން އެއްބަސްވެފައިވާ އަސީރުންގެ އަދަދު ސާފުނުވާކަމަށާއި 10 އާއި 15އާ ދެމެދު އަސީރުން ދޫކޮށްލާނެކަމަށް ބެލެވޭކަމަށެވެ.

އޭއެފްޕީން ރިޕޯޓްކޮށްފައިވާ ގޮތުގައި މަޝްވަރާތައް ބޮޑަށް ކުރިޔަށްދަނީ 12 އަސީރުން ދޫކޮށްލުމާމެދުގައި ކަމަށާއި އޭގެ ދެބައިކުޅަ އެއްބަޔަކީ އެމެރިކާ ރައްޔިތުންނެވެ. އޭގެ ބަދަލެއްގެ ގޮތުގައި އިސްރާއީލުން ޣައްޒާއަށް ދެމުންދާ ހަމަލާތައް ތިން ދުވަހުގެ މުއްދަތަށް މެދުކަނޑާލާ އިންސާނީ އެހީތެރިކަން ޣައްޒާއަށް ފޯރުކޮށްދޭންޖެހޭނެއެވެ.

ގިނަ މަޝްވަރާތަކެއް މިހާރުވެސް ކުރިޔަށްދާކަމަށް އަލްޖަޒީރާއިން ބުނެފައިވެއެވެ. އަނެއްކޮޅުން އިސްރާއީލުގެ ބޮޑުވަޒީރު ބެންޔަމިން ނަތަންޔާހޫ ބުނެފައިވަނީ ހަމާސްގެ އަތްދަށުގައި ތިބި ހުރިހާ އަސީރުން ދޫކޮށްނުލާހާ ހިނދަކު ހަމަލާތައް ދިނުން ހުއްޓާނުލާނެކަމަށެވެ.

ހަމާސްގެ ދަށުގައި 240 އަސީރުން ތިބިކަމަށް ލަފާކުރެވެއެވެ. ރިޕޯޓްތައް ބުނާގޮތުގައި އެމެރިކާގެ ރައްޔިތުން މިނިވަންކުރުމުގެ މަޝްވަރާތައް އެމެރިކާ އާއި އިސްރާއީލާ ދެމެދު ހިނގަމުންދާތާ 48 ގަޑިއިރު ވަނީ ވެފައެވެ. އެމެރިކާއިން އެންމެ ބޮޑަށް އިސްރާއީލަށް ބާރު އަޅަމުން އަންނަކަމަކީ އަސީރުން ސަލާމަތުން މިނިވަންކުރުމެވެ.

އަނެއްކޮޅުން އެއްވެސް ސަބަބަކާ ހުރެ އަސީރުން މިނިވަންވާނަމަ އެކަމުގެ ބޮޑު ޕްރެޝަރެއް އިސްރާއީލުގެ ތެރެއިން ނަތަންޔާހޫއަށް ކުރިމަތިވާނެއެވެ.

ރޮއިޓަރސް އިން މިސްރުގެ ފަރާތްތަކާއި ހަވާލާދީ ބުނެފައިވަނީ ހަމަލާ ބަދަލުކުރުން 24 ގަޑިއިރާއި 48 ގަޑިއިރާ ދެމެދު މެދުކަނޑާލުމާއި ހަމަލާދޭ ސަރަހައްދު ކުޑަކުރުމަށާއި އަސީރުން މިނިވަންކުރުމުގެ ކަންކަން ކުރިޔަށް އޮތް ހަފްތާގައި ކުރިޔަށްދާނެކަމަށް ބެލެވޭކަމަށެވެ.

ޓީވީ މެދުވެރިކޮށް ހަމާސްގެ އަސްކަރީ ވިންގު ބައްސާމް ބްރިގޭޑްގެ ސްޕޯކްސްޕާސަން އަބޫ އުބައިދާ ބުދަ ދުވަހު ބުނެފައިވަނީ ހުރިހާ އަސީރުން ދޫކޮށްލާނެ ހަމައެކަނި ގޮތަކީ އިސްރާއީލުގެ ޖަލުތަކުގައި ތިބި ހުރިހާ ފަލަސްތީން ރައްޔިތުން މިނިވަންކުރުންކަމަށެވެ.