އެއާޕޯޓުގެ މަސައްކަތް ނިންމުމަށް ބޭނުންވާ ފައިސާ ހޯދުމަށް، އަރަބި ކޯޑިނޭޝަން ގްރޫޕުގެ މެމްބަރުންނާއެކު މަޝްވަރާކުރެވުނު
ފިނޭންސް މިނިސްޓަރު، އަމީރު
ރާއްޖޭގެ މައި ވައިގެބަނދަރު، ވެލާނާ އިންޓަަނޭޝަނަލް އެއާޕޯޓުގެ ތަރައްގީގެ މަސައްކަތަށް ބޭނުންވާ 80 މިލިއަން ޑޮލަރު ނުވަތަ 1.2 ބިލިއަން ރުފިޔާ ހަމަޖެއްސެވީ މި ސަރުކާރުން ކަމަށް، ފިނޭންސް މިނިސްޓަރު އިބްރާހީމް އަމީރު ވިދާޅުވެއްޖެއެވެ.
އަމީރު މިފަދައިން ވިދާޅުވީ ޑރ. މުހައްމަދު މުއިއްޒު ޔޫއޭއީއަށް ކުރެއްވި ދަތުރުފުޅުގައި، ވެލާނާ އެއާޕޯޓުގެ ތަރައްގީގެ މަސައްކަތްތަކަށް ބޭނުންވާ 79.8 މިލިއަން ޑޮލަރު ނުވަތަ 1.2 ބިލިއަން ރުފިޔާ އަބޫދާބީ ފަންޑް ފޯ ޑެވެލޮޕްމެންޓުން ހަމަޖެއްސިކަމަށް، އިންތިގާލީ އޮފީހުގެ ތަރުޖަމާނު ފިރުޒުލް އަބްދުﷲ ޚަލީލު، ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި ވިދާޅުވުމާ ގުޅިގެންނެވެ.
އެގޮތުން "ރާއްޖެ އެމްވީ"ން ދެންނެވި ސުވާލަކަށް ޖަވާބު ދެއްވަމުން އަމީރު ވިދާޅުވީ، މި ސަރުކާރުން އެއާޕޯޓުގެ މަސައްކަތް ނިންމުމަށް ބޭނުންވާ ފައިސާ ހޯދުމަށް އަރަބި ކޯޑިނޭޝަން ގްރޫޕުގެ މެމްބަރުންނާ އެއްކޮށް މަޝްވަރާތައް ކުރިއަށްގެންދިޔަކަމަށެވެ.
އެގޮތުން ސައޫދީ ފަންޑާއި، އަބޫދާބީ ފަންޑާއި، ކުވައިތު ފަންޑާއި އަދި އޯޕެކް ފަންޑް ފޯ ޑިވަލޮޕްމެންޓް (އޮފިޑް)އާއެކު ކުރެވުނު މަޝްވަރާތަކުގައި، ސައޫދީ ފަންޑުން 100 މިލިއަން ރުފިޔާ ހަމަޖެހުނުކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ، އެ މަޝްވަރާތަކުގެ ދަށުން، ރައީސް އިބްރާހީމް މުހައްމަދު ސާލިހު އެ ގައުމަށް ވަޑައިގަތުމަށްވެސް އެ ގައުމުން ދައުވަތު އެރުވިކަމަށާއި، އެހެން ނަމަވެސް އެވަގުތު ރައީސްގެ މަސައްކަތްޕުޅު ހުރިގޮތުން ވަޑައިނުގެންނެވުނީ ކަމަށެވެ.
އެގޮތުން މިނިސްޓަރު ވިދާޅުވީ، އެ ފައިސާ ހޯދުމަށް ސިޓީ ފޮނުވުމުގެ އިތުރުން، އެ ފަރާތްތަކާއެކު ބޭއްވުނު ބައްދަލުވުންތަކުގެ ތެރޭގައިވެސް މަޝްވަރާ ކުރެވުނުކަމަށާއި، އެ މަޝްވަރާގެ މަތިން، އަބޫދާބީން ވެސް އެ ޔަގީންކަން ދީފައިވާކަމަށެވެ.
އެގޮތުން އެ މަޝްވަރާތަކުގެ ސަބަބުން، ސައޫދީ ފަންޑުން ލިބުނު 100 މިލިއަނުގެ އިތުރަށް، އެ މަސައްކަތް ކުރުމަށް އިތުރަށް ބޭނުންވި ގާތްގަޑަކަށް 80 މިލިއަން ޑޮލަރު އަބޫދާބީ ޑިވެލޮޕްމެންޓް ފަންޑުން ދިނުމަށް ޔަގީންކަން ދިންކަން މިނިސްޓަރު ފާހަގަކުރެއްވިއެވެ.
މިނިސްޓަރު ވިދާޅުވީ އެ ފައިސާތަކުގެ ޔަގީންކަން ހޯދީ މި ސަރުކާރުން ކަމަށެވެ.
