ކޮމިޝަނަރ ޖެނެރަލް އޮފް ކަސްޓަމްސް، ޝަރީފު ރިޓަޔަރ ކުރައްވައިފި

ކޮމިޝަނަރ ޖެނެރަލް އޮފް ކަސްޓަމްސް, ޢަބްދުﷲ ޝަރީފު ރިޓަޔަރ ކުރައްވައިފިއެވެ.

ޝަރީފު ވަޒީފާއިން ހޯމަ ދުވަހު ރިޓަޔަރ ކުރެއްވީ މޯލްޑިވްސް ކަސްޓަމްސް ސާވިސްއަށް 28 އަހަރު ޚިދުމަތް ކުރެއްވުމަށްފަހުއެވެ. މި މުއްދަތުގެ ތެރޭގައި އޭނާ ވަނީ އެ މުއައްސަސާގެ އެކި މަގާމުތައް އަދާ ކުރައްވާފައެވެ.

ކޮމިޝަނަރ ގެނެރަލް އޮފް ކަސްޓަމްސްގެ މަގާމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހު، ޝަރީފު އައްޔަންކުރެއްވީ 23 ޖޫން 2020 ގައެވެ. އެމަގާމަށް އޭނާ އައްޔަން ކުރެއްވީ އޭރު ކޮމިޝަނަރގެ މަގާމުގައި ހުންނެވި އަޙުމަދު ނުޢުމާން އަވަހާރަވުމާ ގުޅިގެންނެވެ. އެ މަގާމަށް އައްޔަން ކުރެއްވުމުގެ ކުރިން ޝަރީފު ހުންނެވީ ޑެޕިއުޓީ ކޮމިޝަނަރ ގެ މަގާމުގައެވެ.

މަގާމުން ރިޓަޔަރ ކުރައްވައި ޝަރީފު ކުރެއްވި ޓްވީޓުގައި ވަނީ ރައީސުލްޖުމްހޫރިއްޔާ އަށާއި ޑިފެންސް މިނިސްޓަރު މާރިޔާ އަހުމަދު ދީދީއަށް ޝުކުރު އަދާ ކުރައްވާފައެވެ. އަދި ވަޒީފާއިން ރިޓަޔަރ ކުރައްވާއިރު ކަސްޓަމްސްގެ މުވައްޒަފުންނަށާއި ކަސްޓަމްސްގެ ކުރިއެރުމަށް ރަނގަޅު، ކާމިޔާބު މަސައްކަތްތަކެއް ކޮށްދެވުމުގެ އުފާ އިހުސާސް ކުރައްވާ ކަމަށް ވެސް އޭނާ ވިދާޅުވިއެވެ.

ޝަރީފު ރިޓަޔަރ ކުރެއްވުމުން ކަސްޓަމްސް އިން ވަނީ އޭނާއަށް ހަނދާނީ ފިލައެއް އަރުވާފައެވެ. އަދި އޭނާގެ ބެއްލެވުމުގެދަށުން، ކަސްޓަމްސްގެ ޚިދުމަތްތައް އަވަސްކޮށް ލުއިފަސޭހަކުރުމަށް ޒަމާނީ ނިޒާމުތައް ތައާރަފުކުރުމާއި، ވަސީލަތްތައް ޤާއިމުކުރުމާއި އަދި ބޯޑަރ ސެކިއުރިޓީގެ ދާއިރާ ހަރުދަނާކުރުމަށް ކުރެއްވި މަސައްކަތްތައް އެ މުއައްސަސާއިން ފާހަގަކުރެއެވެ.

ޝަރީފް ކަސްޓަމްސްގެ ޚިދުމަތާއި ގުޅިވަޑައިގެންނެވީ 12 ޖެނުއަރީ 1993ގައި، ކަސްޓަމްސް އޮފިސަރ ގްރޭޑް 1ގެ މަގާމުންނެވެ. ޝަރީފަކީ ކަސްޓަމްސްގެ މުވައްޒަފެއްގެ ގޮތުގައި އެކި މަޤާމުތަކުގައި އުޅުއްވުމަށްފަހު ކޮމިޝަނަރ ޖެނެރަލް އޮފް ކަސްޓަމްސްގެ މަގާމާ ހަވާލުވަޑައިގެންނެވި ފުރަތަމަ ބޭފުޅާއެވެ.