ޑިވެލޮޕްމަންޓް ޕްރޮގްރާމްތަކާއެކު ނިއުރޭޑިއަންޓްގެ ފިޔަ އަތޮޅުތަކަށް ފަތުރާލަނީ!
6 ނޮވެމްބަރު 2023 | ހޯމަ 00:459 ރަށެެއްގައި އެކަޑަމީ ފަށައިފި
ނިއުރޭޑިއަންޓް އެކަޑަމީ
ޝައްކެއްވެސް ނެތް ގޮތުގައި އެއީ ރާއްޖޭގެ އެންމެ ސަޕޯޓަރުން ގިނަ ކްލަބެވެ. އެއީ ރާއްޖޭގެ އެންމެ ފަޚުރުވެރި ތާރީޚެއް އޮތް އެއް ކްލަބެވެ. އެއީ އެންމެ ކާމިޔާބު ކްލަބެވެ. އެއީ މިއަދު ދެވަނަ ޑިވިޝަނަސް ރެލިގޭޓްވެ, އަލުން ކުރީގެ މަގާމަށް ދިއުމަށް މަސައްކަތްކުރަމުން އަންނަ ނުލާއި ހުދުގެ ނިއުރޭޑިއަންޓެވެ.
ނިއުރޭޑިއަންޓް ރެލިގޭޓްވީ ކުޅުންތެރިންނަށް ދޭންޖެހޭ މުސާރަ ނުދީ އޮތް މައްސަލާގައި ކުރިމަތިވި ސަސްޕެންޝަނާއެކު އެވެ. ފައިސާގެ ބޮޑު އަދަދެއް ދައްކާ ހަލާސް ކުރުމަށްފަހު އަލުން ފުރަތަމަ ޑިވިޝަންގެ ޖާގަ ހޯދަން ކުރާ މަސައްކަތާއެކު ނިއުރޭޑިއަންޓުން ވަނީ އެކްލަބްގެ ފިޔަ އަތޮޅުތަކަށް ފަތުރާލުމުގެ މަސައްކަތްވެސް ފަށާފައެވެ. އެއީ ކްލަބްގެ އެކަޑަމީތައް އަތޮޅުތަކުގައި ފަށައިގެންނެވެ. ނުލާއި ހުދުގެ ޖަރޒީގައި ނިއުރޭޑިއަންޓްގެ އެކަޑަމީ މިހާތަނަށް ނުވަ ރަށެއްގައި ފަށައިފިއެވެ.
ނިއުރޭޑިއަންޓުން އަތޮޅު ތެރޭގައި ފެށި ފުރަތަމަ އެކަޑަމީ އަކީ އދ.މާމިގިލީގައި ފެށި އެކަޑަމީއެވެ. މީގެ ހަތަރު ފަސްމަހެއްހާ ދުވަސް ކުރިން ފެށި އެ އެކަޑަމީ ފެށީ ނިއުރޭޑިއަންޓުން ސްޕޮންސަރގެ ދަށުންނެވެ. ނިއުރޭޑިއަންޓުން ޖަރޒީއާއި ވަސީލަތްތައް ފޯރުކޮށްދީގެންނެވެ. އޭގެފަހުން ރ.މަޑުއްވަރީގައިވެސް ނިއުރޭޑިއަންޓްގެ އެކަޑަމީ ފެށީ މިއުޞޫލުންނެވެ. އެކަމަކު ތިންވަނަ އެކަޑަމީގެ ގޮތުގައި ރ.މީދޫގައި ނިއުރޭޑިއަންޓުން އެކަޑަމީ ފެށީ ސީދާ ކްލަބްގެ ފުރިހަމަ ކޮންޓްރޯލް އޮންނަ ކްލަބްގެ އެކަޑަމީއެވެ. ކޯޗުން ހަމަޖައްސާ ކޯޗުންނަށް މުސާރަވެސް ދެނީ ކްލަބުންނެވެ. އޭގެ ފަހުން ފެށި ކޮންމެ އެކަޑަމީއެއް މެނޭޖްކުރަނީ ނިއުރޭޑިއަންޓުންނެވެ.
ރ.މީދޫގައި ހިންގާ އެކަޑަމީގައި ބޭރު ކޯޗެއްވެސް މަސައްކަތް ކުރެއެވެ. ނިއުރޭޑިއަންޓުން ބުނީ ބޭރު ކޯޗުން ގެންނަނީ އެކަމަށް އެދޭ, ކައުންސިލާ ގުޅިގެން ކޯޗުން އެކޮމެޑޭޓް ކުރެވޭ ރަށްތަކަށް ކަމަށެވެ. މީދޫގެ ފަހުން ފެށީ ބޮޑު ފުޓްބޯޅަ ދަނޑެއްވެސް އޮތް ދިއްފުށީގައެވެ. ނިއުރޭޑިއަންޓްގެ ކޯޗު އަހުމަދު ނިމާދު (ނިމާ) ބުނީ ދިއްފުށްޓަކީ ވަރަށް ހުނަރުވެރި ކުދިންތަކެއް ތިބި ރަށެއް ކަމަށެވެ. އަދި ބޮޑު ދަނޑެއް އޮތުމުން އެކަޑަމީ ހިންގަންވެސް ފަސޭހަ ރަށެއް ކަމަށެވެ.
ނިއުރޭޑިއަންޓުން އެކަޑަމީ ފެށި ފަސްވަނަ އަތޮޅަކީ އަދި ރަށަކީ ފ.މަގޫދޫ އެވެ. އެރަށުގައި ގިނަ ކުދިންތަކެއް ތިއްބަސް ބޮޑު ދަނޑެއް ނެތުމުން އޮތް ގޮންޖެހުން ބޮނޑެވެ. އެރަށުގައި އެކަޑަމީ ހިންގަނީ ފުޓްސަލް ދަނޑުގައެވެ. އޭގެފަހުން ފެށި ގއ.ވިލިގިނލީގައި އަށްޑިހަ އަށްވުރެ ކުދިން މިވަގުތުވެސް އެބަތިއްބެވެ. އެކުދިން ތަމްރީނު ކުރުމުގައި ބޭރު ކޯޗެއް މަސައްކަތް ކުރެއެވެ. ގއ. އަތޮޅުން ދެއްވަދޫ ގައިވެސް ނިއުރޭޑިއަންޓްގެ އެކަޑަމީ ވަނީ ފަށާފައެވެ. ދެއްވަދޫގައިވެސް ބޮޑު ދަނޑެއްގެ މަސައްކަތް ފަށާފައި ވިޔަސް ދަނޑު ނިމި ބޭނުން ނުކުރެވުމަކީ އޮތް ގޮންޖެހުމެކެވެ ލ.އަތޮޅުގައިވެސް ނިއުރޭޑިއަންޓްގެ އެކަޑަމީ އެއް އެބައޮތެވެ. އެއީ އިސްދޫ ގައެވެ. އެރަށުގައި އެކަޑަމީ ކުރިއަށް ގެންދަން އޮތް އެންމެ ބޮޑު ހިތްހަމަ ޖެހުމަކީ ވަރަށް ރީތި ނެޗުރަލް ދަނޑެއް އޮތުމެވެ. އިސްދޫގައި އެކަޑަމީ ކުރިއަށް ގެންދަނީ ފަސްދޮޅަހަށްވުރެ ގިނަ ކުދިންނާ އެކުއެވެ. ނިއުރޭޑިއަންޓުން އެންމެ ފަހުން އެކަޑަމީ ފެށީ ރ.އުނގޫފާރު ގައެވެ. އެ އެކަޑަމީގައި ސަތޭކައެއްހާ ކުދިން އެބަތިއްބެވެ. އޮތް ދައްޗަކީ ދަނޑުގެ ދަތިކަމެވެ. އުނގޫފާރު ބޮޑު ފުޓްބޯޅަ ދަނޑު އަދި ނުނިމެއެވެ.
ފުރަތަމަ ދެ ރަށަށްފަހު ނިއުރޭޑިއަންޓްގެ އެކަޑަމީތައް ފެށީ ކޯޗު އަހުމަދު ނިމާދުގެ ސީދާ ބެލުމުގެ ދަށުންނެވެ. މިއަދު ނިއުރޭޑިއަންޓްގެ އެކަޑަމީތައް ކުރިއަށް ގެންދަނީ ނިމާގެ ލަފާގެ މަތީންނެވެ. ބައެއް ސެޝަންތަކަށް ސީދާ ނިމާ ދަތުރުކުރެއެވެ. މިވަގުތު ނުވަ އެކަޑަމީ އޮތަސް, އިތުރު ރަށްތަކުންވެސް ނިއުރޭޑިއަންޓްގެ އެކަޑަމީ އެރަށްތަކުންގައި ފަށަން ބޭނުންވެއެވެ. އެގޮތުން މިހާރުވެސް ހދ.ނޮޅިވަރަމާއި, ވައިކަރަދޫގެ ރިކްއިސްޓް އެބައޮތްކަމަށް ނިއުރޭޑިއަންޓުން ބުންޏެވެ.
ނިއުރޭޑިއަންޓް އަލުން ގަދަ ބާރަކަށް ވުމަށް ކުރާ މަސައްކަތުގައި މިއީ އެކްލަބުން އެޅި ހަރުދަނާ ފިޔަވަޅެކެވެ. ކްލަބްގެ ނަން އަތޮޅުތަކުގައި ގުގުމާލާ, ސަޕޯޓަރުންގެ އަދަދު އިތުރުކުރުމަށްވެސް އެކަޑަމީތަކުގެ ސަބަބުން ފުރުޞަތު ފަހިވެގެންދާނެއެވެ.
