އިންޑިޔާގެ ވައި ނުސާފުވުމާގުޅިގެން ލަންކާއާއި ބަނގްލަދޭޝް ޕްރެކްޓިސް ހުއްޓާލައިފި

އިންޑިޔާގެ ވެރިރަށް ނިއުދިއްލީގެ ވައި ނުސާފުވުމާގުޅިގެން، ސްރީލަންކާއާއި ބަނގްލަދޭޝް ޕްރެކްޓިސް ހުއްޓާލައިފިއެވެ.

އަންނަ ހޯމަ ދުވަހު މި ދެ ގައުމު ކްރިކެޓް ވޯލްޑްކަޕުގައި ކުޅޭ މެޗަށް ބާއްވަން އުޅުނު ފަރިތަކުރުންތައް ހުއްޓާލިނަމަވެސް، އިންޑިޔާގައި މިވަގުތު ތިބި އެހެން އެއްވެސް ޓީމަކުން އަދި މިފަދަ ނިންމުމެއް ނިންމާފައެއް ނުވެއެވެ.

ނަމަވެސް މި ދެ ގައުމުން މި ގޮތަށް އަމަލުކުރީ، ވައި ނުސާވުމުން ދިމާވެދާނެ ސިއްހީ ނުރައްކަލަކުން ސަލާމަތްވުމަށް ދެ ގައުމުގެ ޑޮކްޓަރުން ވެސް ލަފާދިނުމުންނެވެ. އަދި އިންޑިޔާ ސަރުކާރުންވެސް ވަނީ، ނިއުދިއްލީގެ ވައިނުސާފުވުމުގެ ސަބަބުން ރައްކާތެރިކަމުގެ ފިޔަވަޅުތައް އަޅާފައެވެ. މީގެތެރޭގައި، ސަރުކާރުގެ އޮފީސްތަކާއި ސްކޫލްތައް ވަނީ އަންގާރަ ދުވަހާ ހަމައަށް ބަންދުކޮށްފައެވެ.

އިންޑިޔާ ސަރުކާރުން ވަނީ، ނިއުދިއްލީގެ ވައިގެ ނުސާފު މިންވަރު ނުވަތަ އެއަރކޮލިޓީ އިންޑެކްސް 400 ފަހަނައަޅައި ގޮސްފައިވާކަން އިއުލާނުކޮށްފައެވެ. އަދި މިދިޔަ ބުރާސްފަތި ދުވަހު ނުސާފުވާން ފެށި ޖައްވު ސާފުވެ، އަލިވާނީ އަންގާރަ ދުވަހުން ފެށިގެން ކަމަށް ލަފާކޮށްފައެވެ.

މިކަމާ ގުޅިގެން ދުނިޔޭގެ ކްރިކެޓް ޖަމިއްޔާއިންވެސް ވަނީ ބަޔާނެއް ނެރެފައެވެ. އެ ޖަމާއަތުން ބުނީ، މި މައްސަލަ ސަމާލުކަމަށް އައުމާއެކު ވޯލްޑްކަޕަށް އިންޑިޔާއަށް ގޮސްތިބި ހުރިހާ ޓީމެއްގެވެސް ހާލަތުވެސް ބަލަމުންދާކަމަށެވެ. އަދި ރައްކާތެރި ފިޔަވަޅު އެޅުމާއި ޓީމުތަކަށް އެހީތެރިވުމަށް ތައްޔާރަށް ތިބިކަމަށެވެ.

އިންޑިޔާގައި ވައި ނުސާފުވި ދުވަސްވަރެއްގައި އެކަން ތަޖުރިބާކޮށްފައިވާ އެއް ގައުމަކީވެސް ލަންކާއެވެ. އެ ފަހަރު ލަންކާގެ ގިނަ ކުޅުންތެރިން ޗޭންޖިން ރޫމުގައި ހޮޑުލައި، ދަނޑު މަތީގައިވެސް ފަރުވާދޭން ޖެހުނެވެ.