ލަންކާ ކަޓައި، ކްރިކެޓް ސެކްރެޓަރީ އިސްތިއުފާދީފި

ކްރިކެޓް ވޯލްޑްކަޕުން ސްރީލަންކާ ކެޓުމާއެކު އަމާޒުވި ފާޑުކިއުންތަކާ ގުޅިގެން، ސްރީލަންކާ ކްރިކެޓް ބޯޑުގެ ސެކްރެޓަރީ މޯހަން ޑަސިލްވާ އިސްތިއުފާދީފިއެވެ.

އޭނާގެ އިސްތިއުފާއާއެކު މިހާރު ކުރިމަތިވެފައިވަނީ ސަރުކާރުގެ ނުފޫޒު ލަންކާ ކްރިކެޓްގެ ތެރެއަށް ވަދެ އެ ގައުމަށް ސަސްޕެންޝަން އައުމުގެ ބިރާއެވެ.

ލަންކާ މިފަހަރުގެ ވޯލްޑްކަޕަށް ކޮލިފައިވީވެސް ކިރިޔާއެވެ. އެއީ ޕްލޭއޯފް ކުޅެގެންނެވެ. އަދި ފާއިތުވެދިޔަ އަހަރެއްހާ ދުވަހު އެ ގައުމުގެ ސަރުކާރާ ކްރިކެޓް އެސޯސިއޭޝަނާ ގުޅުން ރަނގަޅެއްނޫނެވެ. މިގޮތުން، ލަންކާ މުބާރާތުން ކެޓުމާއެކު ލަންކާގެ ކުޅިވަރާބެހޭ ވަޒީރު ވަނީ ލަންކާ ކްރިކެޓަށް ވަރަށް ބޮޑަށް ފާޑުވިދާޅުވެފައެވެ.

ލަންކާ ސަރުކާރުގެ މައިގަނޑު ތުހުމަތަކީ، ކްރިކެޓް އެސޯސިއޭޝަނުގެ ފައިސާ ގައުމީ ޓީމު ތައްޔާރު ކުރުމަށް ޚަރަދުނުކޮށް އެހެން ކަންކަމަށް ޚަރަދު ކުރުމެވެ.

ނަމަވެސް ކްރިކެޓް ސެކްރެޓަރީ އިސްތިއުފާދިން މައިގަނޑު ސަބަބެއް އޭނާ ވިދާޅެއްނުވެއެވެ. ނަމަވެސް އޭނާ އިސްތިއުފާދިނީ އަމިއްލަ ސަބަބުތަކާއި އަދި ލަންކާ ވޯލްޑްކަޕުން ކެޓުމާއެކުއެވެ. ލަންކާގެ ކްރިކެޓް ބޯޑަށް އަލުން އިންތިޚާބު ކުރުމަށް އެންމެ ފަހުން އިންޓަރިމް ކޮމިޓީއެއް ނެގީ 2014 ވަނަ އަހަރުއެވެ.