މަޖިލީހުގެ ރައީސްކަމުގައި އަބްދުﷲ މަސީހު ހުންނެވި އިރު އޭނާގެ އިތުބާރު ނެތްކަމަށް ހުށަހެޅުމުން އޭނާގެ ހައިސިއްޔަތު ނެތް ކަމުގެ ވާހަކަ އާއި މަސީހުގެ ޚުދުމުހުތާރު ކަމުގެ ވާހަކަ ދެއްކެވި އަޑު ވެސް އެހީމެވެ. ވިދާޅުވި އަޑު އެހީމު، މަސީހު މި އުޅުއްވަނީ ހާދަހާ ވާ ވިޔާ ނުދާ ގޮތަކަށެވެ. މަސީހު އުޅުއްވާ ގޮތުން ލަދު ގަންނަ ވާހަކަވެސް ދެއްކެވިއެވެ. މަސީހުގެ ހައިސިއްޔަތެއް ނެތް ކަމުގެ ވާހަކަ ތަކުރާރުކުރައްވާ މީސްމީޑިއާގައި ވެސް އެ ވާހަކަތައް ހިއްސާކުރެއްވިއެވެ. މި ވާހަކަތައް އެންމެ ބާރަށް ދެއްކެވި ބޭފުޅަކީ މިހާރު މަޖިލީހުގެ ރައީސްކަމުގައި ހުންނެވި މުހައްމަދު ނަޝީދެވެ.
މިއަދު މަޤާމުގައި މި މަނިކުފާނު ހުންނަވަނިކޮށް އިތުބާރު ނެތްކަމުގެ މައްސަލަ ހުށަހެޅުމުން އަމަލުފުޅު ބަހައްޓަވަނީ މިއާއި ދިމާ އިދިކޮޅަށެވެ. ބައެއް ބޭފުޅުން ވިދާޅުވަނީ އެމަނިކުފާނު ޑިމޮކްރަސީގެ ވާހަކަދެއްކެވުމަށް ފަހުގައި ވޯޓަށް ފިއްލެވުމަކީ ނިކަން ލަދުވެތި ކަމެއް ކަމަށެވެ. އަނެއް ބައި ބޭފުޅުން ވިދާޅުވަނީ މިއީ ހައްތަހާވެސް އާރާއި ބާރުގެ ބޭނުމުގައި ކުރައްވާ ކަންކަން ކަމަށެވެ. މަޖިލީހުގެ ރައީސްގެ އިތުބާރު ނެތްކަމަށް އެތައް މެމްބަރުންނެއްގެ ސޮޔާއި އެކު ހުށަހެޅުމުން ވެސް މަޤާމުގައި ބަގުޑިބައްދަވައިގެން އެ ހުންނަވަނީ ރެލެވެންސް ގެއްލިދާނެތީ ބިރުފުޅުން ކަމަށް ވެސް ބައެއް ބޭފުޅުން ވިދާޅުވެއެވެ. ތިމާ މީހާ އާއި ތިމާ ދެއްކި ވާހަކަ އަރާ ހަމަ ކުރި އިރު އަމަލުފުޅު ކުރައްވަނީ ބަހާއި އަމަލާއި ދިމާ ނުވާ މޭރުމަކުންނެވެ. މިއަށްކިޔަންވީ "ޑަބަލް ސްޓޭންޑަރޑްސް" ނޫން ދެން ކޯޗެކޭތޯއެވެ؟
އަނެއްކާ ސިޔާސީ ފޮޓޯތަކާއި ނުލާހިކު ދޯޅު ބޭފުޅަކަށް މި މަނިކުފާނު ވާއިރު މީގެ ކުރިން ސިޔާސީ މަގުބޫލުކަން ހޯއްދެވީ ޕޯޑިއަމް ތަކުގައި ދައްކަވާ މޮޅެތި ސަޅިބައިސާ ވާހަކަތަކުންނެވެ. މިއަދު އެމަނިކުފާނުގެ ސިޔާސީ ޕްލެޓްފޯމަކީ ރައްޔިތުންގެ މަޖިލީހެވެ. މަޖިލީހުގެ ގަވާއިދު ބޮލާލާ ޖައްސަވާފައި މަޖިލީހުގެ ރިޔާސަތުގައި އިންނަވާ ބަހުސްގައި ބައިވެރިވެ، ބަހުސްގެ ވަގުތުގައި މެމްމަބަރުންނަށް ރައްދު ދިނުމަކީ ވެސް އާއްމު ކަމެކެވެ. ވީ ގޮތަކުން އަބަދުވެސް ބެއްލެވީ ސިޔާސީ ފޮޓޯ އިން ނުގެއްލި ވޭތޯއެވެ. ނުބެހޭ ކަމެއް، ބަސް ނުބުނާ ކަމެއް މި ގައުމަކު ނުހިނގައެވެ. ފަލަ ސުރުހީގައި ކޮންމެވެސް ގޮތަކުން އުޅުއްވޭތޯ ބައްލަވައެވެ.
ކަން މިހެން ހުރި އިރު 4 ފަހަރު އެޖެންޑާކޮށްގެން ވެސް މި މައްސަލަ ކުރިއަށް ނުދާ ސަބަބަކީ މަޖިލީހުގެ ރައީސް ނަޝީދު ބާރު ދޫކޮށްލައްވަން ބޭނުން ނުވުން ކަމަށް ވިދާޅުވާ މެމްބަރުން ވެސް މަދެއް ނޫނެވެ. ކުރިއަށް އޮތް އިންތިޚާބީ ރައީސް ހުވާކުރެއްވުމުގެ ރަސްމިއްޔާތުގެ ފޮޓޯގައި އިންނަވަން ބޭނުންވާ ގޮތް ވެސް ބޮޑީއެވެ. އެފަދަ ބޭބޭފުޅުން ވިދާޅުވަނީ އެ ފޮޓޯ އިން ނަޝީދު ގެއްލެން ހިލާ ބޭނުން ފުޅު ނުވާ ކަމަށެވެ. މިއީ ވެސް ސިޔާސީ ސްޓަންޓަކަށް ވެދާނެއެވެ. ޑިމޮކްރަސީ އަށް މި މަނިކުފާނު އަމަލު ނުކުރާ ކަމާއި މަސައްކަތް ކުރައްވަނީ އެ މަނިކުފާނުގެ ސިޔާސީ ފޮޓޯ އޮފް ކުރަން ކަން މެމްބަރުންގެ ވާހަކައިން އެނގެއެވެ.
ސިޔާސީ ގޮތުން މަގްބޫލު ވާން ހެޑްލައިންގައި އުޅުއްވަން ޖައްސަވާ އުކުޅަކަށް ވެދާނެއެވެ. މަގްސަދަކީ ސިޔާސީ ފޮޓޯ އިން ނުގެއްލުމެވެ. އެއްގޮތުން ނުވެއްޖެއްޔާ އަނެއް ގޮތުން ވެސް ސުރުހީތަކުގައި އުޅުއްވަން ބޭނުން ފުޅުވާ ގޮތް ވެސް ބޮޑީއެވެ. އެއީ ކިތަންމެ ހުދުމުހުތާރު ގޮތަކަށް ވިޔަސް ވަރިހަމައެވެ. އަދި މަޤާމާއި ޖާހާއި ލައްޒަތު ގެއްލި ސިޔާސީ ފޮޓޯގައި ތިމާގެ ރެލެވެންސް ގެއްލިދާނެ ކަމުގެ ބިރު ވެސް ގަންނަ ގޮތް ބޮޑީއެވެ.
އިތުބާރެއް ހަމަ ގައިމުވެސް ނެތެވެ. މަޤާމަށް ގެނައި މެމްބަރުން ގޮވަނީ އިސްތިއުފާ އަށެވެ. ރައީސްކަން ކުރި ޕާޓީން ގޮވަނީ ހޯހޯ ސަލާމެވެ. ދެން އޮތީ މަގްބޫލުކަމެވެ. ގަޥާއިދުތަކަށް ފައިން އަރާ، ގަވާއިދުތައް މުގުރާލާފައި ކިހާ ދުވަހަކު ސިޔާސީ ތަސްވީރުގައި މަގްބޫލުވެވިދާނެތޯއެވެ؟
