އިންޓަ ސްކޫލް ވޮލީ މުބާރާތް: 16 އަހަރުން ދަށުގެ ފިރިހެން ތަށި ކުނބުރުދޫ ސްކޫލަށް

އިންޓަ ސްކޫލް ވޮލީ މުބާރާތުގެ 16 އަހަރުން ދަށުގެ ފިރިހެން ޗެމްޕިއަންކަން އދ.ކުނބުރުދޫ ސްކޫލުން ހޯދައިފި އެވެ.

ކުނބުރުދޫ ސްކޫލުން ތަށި ހޯދީ ބުދަ ދުވަހުގެ ރޭ ކުޅުނު ފައިނަލް މެޗުގައި އދ.އަތޮޅު މަދަރުސާގެ މައްޗަށް ކުރި ހޯދައިގެންނެވެ. ކުނބުރުދޫ ސްކޫލުން ފައިނަލް މެޗު ކާމިޔާބު ކުރީ ފަސޭހަކަމާއެކު ސީދާ ތިން ސެޓުންނެވެ. މެޗުގެ ސެޓުތައް އެ ސްކޫލުން ކާމިޔާބު ކުރީ، 25-17، 25-20، އަދި 25-05 އިންނެވެ. މެޗުގެ ފުރަތަމަ ދެ ސެޓުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނު ނަމަވެސް، ތިން ވަނަ ސެޓުގައި އދ.އަތޮޅު މަދަރުސާގެ ކުޅުން ވަރަށް ބޮޑަށް ދަށްވި އެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ ކުނބުރުދޫ ސްކޫލްގެ އަޙުމަދު އައިހަމް މުޙައްމަދު އެވެ.

މި ބައިގެ އެންމެ މޮޅު ހަ ކުޅުންތެރިންނަށް ހޮވުނީ، ކުނބުރުދޫ ސްކޫލްގެ އައިހަމްގެ އިތުރުން މުޙައްމަދު އިކުރާމް އިސްމާއީލް ރަޝީދު، މުޙައްމަދު ރިފާތު، އަޙުމަދު އިޔާދު މުޙައްމަދު އަޔާޒް، އދ.އަތޮޅު މަދަރުސާގެ ޝައިޙާން ޝާހީން، އިބްރާހިމް ރާކިން ޙަސަން އަދި ކެޔޮދޫ ސްކޫލްގެ އިބްރާހީމް ޔަނާލް މުޙައްމަދު (ލިބަރޯ) އެވެ. މި ބައިގެ އެންމެ މޮޅު ކޯޗަކަށް ހޮވުނީ ޗެމްޕިއަން ކުނބުރުދޫ ސްކޫލްގެ އަޙުމަދު ސުނާން އެވެ.

މިއަހަރުގެ މުބާރާތުގައި ވަނީ 19 ސްކޫލަކުން ވާދަކޮށްފަ އެވެ. އެއީ އަތޮޅު ތެރެއަށް ނިސްބަތްވާ ނުވަ ސްކޫލުގެ އިތުރުން މާލޭ ސަރަހައްދުން 10 ސްކޫލެކެވެ. މުބާރާތުގައި ޖުމުލަ 42 ޓީމެއް ވާދަކުރެ އެވެ. މިއަހަރުގެ މުބާރާތް ކުރިއަށް ގެންދަނީ ތިން އަހަރު ދުވަހުގެ މެދު ކެނޑުމަކަށްފަހު އެވެ. އެންމެ ފަހުން އިންޓަ ސްކޫލް ވޮލީ މުބާރާތް ބާއްވާފައި ވަނީ 2019 ވަނަ އަހަރު އެވެ. މިއަހަރުގެ މުބާރާތުގެ 14 އަހަރުން ދަށް އަދި 16 އަހަރުން ދަށުގެ ކުޅުން ނިމިފައިވާއިރު، ދެން އޮންނާނީ 19 އަހަރުން ދަށުގެ ކުޅުމެވެ. މިއަހަރުގެ މުބާރާތުގައި އަތޮޅު ތެރެއިން ބައިވެރިވި ސްކޫލުތަކުން ވަނީ ރަނގަޅު ނަތީޖާއެއް ނެރެފަ އެވެ.