އިންޓަ ސްކޫލް ވޮލީ މުބާރާތް: 16 އަހަރުން ދަށުގެ އަންހެން ތައްޓާއެކު ފ.އަތޮޅު މަދަރުސާ އަށް ބޮޑު ކާމިޔާބެއް

މިހާރު ކުރިއަށްދާ އިންޓަ ސްކޫލް ވޮލީ މުބާރާތުގެ 16 އަހަރުން ދަށުގެ އަންހެން ޗެމްޕިއަންކަން ފ.އަތޮޅު މަދަރުސާ އިން ހޯދައިފި އެވެ.

ބުދަ ދުވަހުގެ ރޭ މާފަންނު އައުޓްޑޯ ވޮލީ ކޯޓުގައި ކުޅުނު ފައިނަލް މެޗު ފ.އަތޮޅު މަދަރުސާ އިން ކާމިޔާބު ކުރީ، އދ.ކުނބުރުދޫ ސްކޫލާ ވާދަކޮށް ސީދާ ތިން ސެޓުންނެވެ. މިއީ މިއަހަރުގެ މުބާރާތުގައި ފ.އަތޮޅު މަދަރުސާ އިން ހޯދި ތިން ވަނަ ތައްޓެވެ. ދެ އުމުރުފުރާގެ ހަތަރު ބައިގައި އެ ސްކޫލުން ބައިވެރިވެފައިވާއިރު، 16 އަހަރުން ދަށުގެ ފިރިހެން ފިޔަވައި ހުރިހާ ތައްޓެއް ވަނީ ކާމިޔާބު ކޮށްފަ އެވެ.

މީގެ ކުރިން 2019 ވަނަ އަހަރު އޮތް އިންޓަ ސްކޫލް ވޮލީ މުބާރާތުގައި ވެސް އެ ސްކޫލް ވަނީ މި ބައިގެ ފައިނަލްގައި ވާދަކޮށްފަ އެވެ. ނަމަވެސް އެ އަހަރުގެ ފައިނަލުން އެ ސްކޫލް ވަނީ ބަލިވެފަ އެވެ. އެ މުބާރާތުގައި ވެސް އެ ސްކޫލުން ތިން ތަށި ހޯދިއިރު، ގެއްލުނީ 16 އަހަރުން ދަށުގެ އަންހެން ތައްޓެވެ.

ފައިނަލް މެޗުގައި ފ.އަތޮޅު މަދަރުސާ އިން ވަނީ މޮޅަށް ކުޅެފަ އެވެ. މެޗުގެ ފުރަތަމަ ސެޓު އެ ސްކޫލުން ކާމިޔާބު ކުރީ 25-09 ގެ ބޮޑު ތަފާތަކުންނެވެ. ނަމަވެސް ޖެހިގެން އައި ދެ ވަނަ ސެޓުގައި ކުނބުރުދޫ ސްކޫލުން ވަނީ ކުޅުން ރަނގަޅުކޮށްފަ އެވެ. ނަމަވެސް މި ސެޓުގެ ވަކި ހިސާބަކުން ފ.އަތޮޅު މަދަރުސާ އިން ވަނީ ލީޑު ނަގައިފަ އެވެ. އެ ލީޑު ހިފަހައްޓައި އެ ސްކޫލުން ދެ ވަނަ ސެޓު ކާމިޔާބު ކުރީ 25-21 އިންނެވެ. ތިން ވަނަ ސެޓުގައި ފ.އަތޮޅު މަދަރުސާ އިން ވަނީ މޮޅަށް ކުޅެ، ބޮޑު ލީޑެއްގައި އޮވެ ސެޓު ނިންމާލައިފަ އެވެ. ތިން ވަނަ ސެޓު އެ ސްކޫލުން ކާމިޔާބު ކުރީ 25-15 އިންނެވެ. ފައިނަލް މެޗުގެ މޮޅު ކުޅުންތެރިޔަކަށް ހޮވުނީ އެ ސްކޫލުގެ އީމާން އަލީ އެވެ.

މި ބައިގެ އެންމެ މޮޅު ހަ ކުޅުންތެރިންނަކީ، ޗެމްޕިއަން ފ.އަތޮޅު މަދަރުސާގެ އީމާން، ލީމް އަޙުމަދު ލަތީފް، އައިޝަތު ޝިޔާ މުޙައްމަދު (ލިބަރޯ)، ކުނބުރުދޫ ސްކޫލްގެ އައިމިނަތު އާޝިޔާ މުޙައްމަދު، ފާތިމަތު ފައިހާ މުޙައްމަދު، ކެޔޮދޫ ސްކޫލްގެ އައިމިނަތު އާނީ މުޙައްމަދު ނާސިރު އަދި އައިޝަތު ދީނާ ސަލީމް އެވެ. 16 އަހަރުން ދަށުގެ އަންހެން ބައިގެ އެންމެ މޮޅު ކޯޗަކަށް ހޮވުނީ ޗެމްޕިއަން ފ.އަތޮޅު މަދަރުސާގެ ކޯޗު އަލީ ޒާހިރު އެވެ.

މިއަހަރުގެ މުބާރާތުގައި ވަނީ 19 ސްކޫލަކުން ވާދަކޮށްފަ އެވެ. އެއީ އަތޮޅު ތެރެއަށް ނިސްބަތްވާ ނުވަ ސްކޫލުގެ އިތުރުން މާލޭ ސަރަހައްދުން 10 ސްކޫލެކެވެ. މުބާރާތުގައި ޖުމުލަ 42 ޓީމެއް ވާދަކުރެ އެވެ. މިއަހަރުގެ މުބާރާތް ކުރިއަށް ގެންދަނީ ތިން އަހަރު ދުވަހުގެ މެދު ކެނޑުމަކަށްފަހު އެވެ. އެންމެ ފަހުން އިންޓަ ސްކޫލް ވޮލީ މުބާރާތް ބާއްވާފައި ވަނީ 2019 ވަނަ އަހަރު އެވެ. މިއަހަރުގެ މުބާރާތުގެ 14 އަހަރުން ދަށް އަދި 16 އަހަރުން ދަށުގެ ކުޅުން ނިމިފައިވާއިރު، ދެން އޮންނާނީ 19 އަހަރުން ދަށުގެ ކުޅުމެވެ.