ޣައްޒާގެ އަންހެނުން: މުޅި ދުނިޔެއަށްވެސް ލާމަސީލު މިސާލެއް!

އެމެރިކާއާއި ހުޅަނގު ޤައުމުތަކުން ޓެރަރިސްޓް ޖަމާޢަތެއްގެ ގޮތުގައި ސިފަ ކުރާ ހަމާސް ޖަމާޢަތުގެ ވަސް، މި ދުނިޔެއިން ފޮހެލުމަށް ކަމަށް ބުނެ، އިޒްރޭލުގެ ޔަހޫދީން ޣައްޒާގައި ހިންގަމުންދާ ޤަޠުލުއާންމަށް މަހެއް ވާން ގާތްވެފައި ވާއިރު، ބައެއް ލޯތަކަށް ނުފެންނަ، މި ލާއިންސާނީ ޖަރީމާގައި ފުރާނަ ގެއްލިދިޔަ މީހުންގެ ޢަދަދު ވަނީ 9500 އަށް ވުރެ މައްޗަށް އަރާފައެވެ. ގިނައި އަންހެނުންނާއި ކުޑަކުދިންނެވެ. އެއީ ހަނގުރާމަތަކުގައި އެންމެ ފުރަތަމަވެސް، ޙިމާޔަތާއި ރައްކާތެރިކަން ލިބެންޖެހޭނެ ބައެއް ކަމަށް، ޚުދު ހުޅަނގުންވެސް ބުނާ، ނާޒުކު ޙާލުގައި ތިބި އިންސާނުންނެވެ.

ހުޅަނގުން ފަތުރާލި މިންތީގެ ހަމަތަކަށް ވަކާލާތު ކުރުމުގެ އަޑުފައްގަނޑު ގަދަވެފައި އޮތް އަދުގެ ދުނިޔޭގައި، ޙަޤީޤީ ސާބިތު ކަނބަލުން ތިބީ ޣައްޒާގައި ކަން، މި ޢުދުވާންތަކުގެ ތެރެއިން ކިތަންމެ ހާ ރަނގަޅަކަށް ސާފުވެގެން ހިނގައްޖެއެވެ. ގަދަ ހިތްވަރާއި، ނުގުޑާ ފަދަ ވަރުގަދަ ޢަޒުމާއި، ޔަހޫދީންނަށް ގޮންޖަހާލުމުގައި، ޣައްޒާގެ އަންހެންވެރިންގެ ދައްކަމުން ދަނީ މުޅި ދުނިޔެވެސް ތަޢުރީފު ކުރަން ޙައްޤު މިސާލުތަކެވެ.

ޔަހޫދީންގެ ޙަމަލާތައް ކެނޑިނޭޅި އަމާޒު ކުރަމުން ދާ ޣައްޒާގެ ދެކުނުގެ އަވަށެއް ކަމަށް ވާ ޚާން ޔޫނިސްގައި، އޭނާގެ ޢާއިލާގެ އިތުރު 20 މެންބަރުންނާއެކު ގެދޮރު ގެއްލިފައި އިން އެކަކީ ފަލަސްޠީނުގެ ފަސްގަނޑަށް އުފަން ޚުލޫދު ޤާދީޙްއެވެ. ޚާން ޔޫނިސްގެ ވަޤުތީ ހިޔާވައްސެއްގައި ދިރިއުޅެން ޖެހިފައި އޮތެއް ކަމަކު، ޚުލޫދުގެ ހިތުގައި ޖަހަމުން ދާ ސާބިތުކަމުގެ ވިންދަކީ، އޭނާގެ ފަހު ނޭވާއާ ޖެހެންދެކަށްވެސް އެގޮތުގައި އޮންނާނެ ކަމެއްކަން، އެ ދައްކަމުން ދިޔަ ވާހަކަތަކުން ކިތަންމެހާވެސް ސާފެވެ.

މުޅި ޣައްޒާ ހަފުސް ކުރަމުން ދާ އިޒްރޭލުން ޣައްޒާއަށް ދެމުން ދާ ޙަމަލާތަކުން ދިފާއުވުމަށް ޚުލޫދުއާއި އޭނާގެ 4 ދަރިން މިހާރު ދިރިއުޅެމުން ދަނީ ޢިމާރާތެއްގައި ބިންގަރާހެއް ގޮތަށް ހަދާފައި ވާ ތަނެއްގައެވެ.

ޚުލޫދުއާއި އޭނާގެ ޢާއިލާގެ އެހެން މެންބަރުން މީގެ ކުރިން ދިރިއުޅެމުން ދިޔައީ، އިޒްރޭލޭ ކިޔައިގެން އުޅޭ ދަޢުލަތާއި ފަލަސްޠީނު ހިއްސާކުރާ ސަރަޙައްދީ އިމާ ދާދި ކައިރީގައެވެ. އެހެން ކަމުން، އެ ޢާއިލާއިން، ވީހާވެސް ބޮޑަކަށް ޣައްޒާއާ ވީ ފަޅިއަށް ބަދަލުވީއެވެ.

ޔަހޫދީން ފަލަސްޠީނަށް ދެމުންދާ ޙަމަލާތަކުގެ ތާރީޚު އެތައް އަހަރަކަށް ދެމިގެން ގޮސްފައި ވާ އިރު، މީގެ ކުރިން ކުރި ހަނގުރާމައެއްގެ ތެރޭގައި، ޚުލޫދުގެ ފިރިހެން ދަރިއަކު ވަނީ މި ދުނިޔެ ދޫކޮށްފައެވެ.

ޚުލޫދު މިއަދުވެސް އިނީ އޭނާގެ ސާބިތު ހިތުގައި ވަރުގަދަ ޢަޒުމުގެ މަތީގައެވެ. އިޒްރޭލުން ކިތަންމެ ގަދަބާރެއް ދެއްކި ކަމުގައި ވިޔަސް، ޚުލޫދުގެ ހިތުގެ ސާބިތުކަމަށް ކުޑަ ނަމަވެސް ލޮޅުމެއް ނާރާނެ ކަމަށް އޭނާ ޤަބޫލު ކުރެއެވެ.

އޮކްޓޯބަރު 7 ވަނަ ދުވަހު ފެށި ޢުދުވާންތަކަށް ފަހު ޣައްޒާ އޮތީ މުޅި ދުނިޔެއާ ގުޅުން ކަނޑާލާ، އެކަހެރިކޮށް، ވަކިކޮށްލާފައެވެ. އިންސާނަކަށް ވީތީ ލިބިދޭންޖެހޭ ދިރިހުރުމުގެ ޙައްޤާއި، ދިރިއުޅުމުގެ އަސާސީ ޙައްޤުތަކުން މަހްރޫމުކޮށްލާފައެވެ.

ޣައްޒާގެ ކޮންމެ ދިމާއަކަށް ބަލައިލިޔަސް މިއަދު ފެންނަނީ ޚުލޫދު ފަދަ ހިތްވަރުގަދަ ކަނބަލުންނެވެ. ކުޑައެއް، ބޮޑެއް ތަފާތެއް ނެތެވެ. ދުނިޔޭގެ އެހެން އެއްވެސް ހިސާބެއްގައި ބަޔަކު އުފުލަން ނުޖެހޭ ވަރުގެ ޒިންމާތައް ކޮނޑުއަޅައިގެން ތެދުވަން ޖެހިފައި ތިބި ބައެކެވެ. ދިމާވާ ކޮންމެ ޙާލަތަކަށް ދިރިއުޅުމުގެ ވައްޓަފާޅި ބަދަލުކޮށްލުމުގެ ޤާބިލުކަން ލިބިފައި ވާ ކުޅަދާނަ ބައެކެވެ. ކައިބޮއެ ހަދާނެ ފަދައެއް، ބޯފެން ފޮދެއް ނެތްތާ، ޙާލެއްގައި ޖެހޭ ދުވަހު ވަންނާނެ ހިޔާވައްސެއްވެސް ނެތް ޙާލު، ޣައްޒާގެ މަންމައިން އެމީހުންގެ މުޅި ޢާއިލާ ބަލަހައްޓަމުން ދަނީ ކޮންމެވެސް ދުވަހަކުން މިނިވަން ކަމުގެ ޖައްވަކަށް ނޭވާލެވޭނެ ކަމުގެ އުންމީދުގައެވެ.

ޣައްޒާގެ އަންހެނުންނާއި އަންހެން ކުދިންގެ ކިބައިން ފެންނަމުން ދާ ހިތްވަރުގަދަކަމާއި ހިތުގެ ސާބިތުކަމަކީ، ދުނިޔޭގެ އެހެން ކޮންމެ ހިސާބެއްގައި އިން އަންހެނަކަށް، ނުވަތަ ކިތަންމެ މަތީ ފަންތިއެއްގައި ހުރި ފިރިހެނަކަސް ހަމަ ލާމަސީލު ނަމޫނާއެކެވެ. ލިބޭ މިންވަރަށް ޝުކުރު ކުރުމުގެ ރީތި މިސާލު ދައްކަމުންދާ ފިސާރި ކަނބަލުންތަކެކެވެ.