ރައްޔިތުންގެ މަޖިލީހުގެ މިއަދުގެ ޖަލްސާ ނުފެއްޓި، މަޖިލީހުގެ ތަޅުމުގައި މެންބަރުން އިހުތިޖާޖުކުރަމުން ގެންދިޔަ ނަމަވެސް، މަޖިލީހުގެ އިދާރާއިން އެދުނީ ޖަލްސާ ކުރިއަށް ގެންދަން ކަމަށް ތިނަދޫ އުތުރު ދާއިރާގެ މެންބަރު އަބްދުލް މުޣުނީ ވިދާޅުވެއްޖެ އެވެ.

ޖަލްސާ ކުރާ މާލަމުގައި ހުންނަވައިގެން ރާއްޖެ ޓީވީ އަށް ދެއްވި ބަސްދީގަތުމެއްގައި މުޣުނީ ވަނީ ޖަލްސާ ހޫނުވި ވަގުތު، ރައީސް އިންނަވާ ޗެމްބަރުގައި ހިނގި ކަންކަމުގެ ތަފްސީީލު ދެއްވާފަ އެވެ. އެގޮތުން މުޣުނީ ވިދާޅުވީ އެވަގުތު އޭނާ ރިޔާސަތުގެ ޗެމްބަރުގައި ހުންނެވި އިރު، އަރިހުގައި ޑިމޮކްރެޓްސްގެ ޕީޖީ ލީޑަރު އަދި މެދުހެންވޭރު ދާއިރާގެ މެންބަރު އަލީ އާޒިމް ވެސް ހުންނެވި ކަމަށެވެ.

މަޖިލިސް އެފަދައިން ކުރިއަށް ނުގެންދިޔުމަށް އާޒިމް އެދިވަޑައިގެންނެވި ނަމަވެސް އެވަގުތު އަފީފު އަމަލު ކުރައްވާނެ ގޮތެއް ނޭނގުމުން ވެސް މަޖިލީހުގެ އަމީން އާންމު ފާތިމަތު ނިއުޝާ އެދިވަޑައިގަތީ މަޖިލީހުގެ މަސްލަހަތު ކޮންމެ ފަދަ ހާލަތެއްގައި އޮތް ނަމަވެސް، އަފީފު ޖަލްސާ ކުރިއަށް ގެންދެވުމަށް ކަމަށް މުޣުނީ ވިދާޅުވި އެވެ.

މުޣުނީ ވިދާޅުވީ އެހާ ހިސާބުން އަފީފުގެ އަތްޕުޅުގައި އޮތް ގަނޑުކޮޅު ނެންގެވުމަށް މުޣުނީގެ އަރިހުން އަފީފު އެދިވަޑައިގެންނެވި ކަމަށެވެ. އަދި ވީޑިޔޯގައި ފެންނަ ފަދައިން މުޣުނީ ގަނޑު ދަމައިގެންނެވީ އެހެންވެ ކަމަށް އޭނާ ވިދާޅުވި އެވެ.

މުޣުނީ ވިދާޅުވީ އެހާ ހިސާބުން ޖަލްސާ ކުރާ މާލަން ދޫކުރައްވައި އަފީފު ވަޑައިގެންނެވި ކަމަށެވެ.

އަންގާރަ ދުވަހުގެ ޖަލްސާ ނުފެށެނީސް އެ ޖަލްސާ ހޫނުވެ އެމްޑީޕީގެ މެންބަރުން ދެކޮޅު ހަދާފައިވަނީ ރައްޔިތުންގެ މަޖިލީހުގެ ރައީސް މުހައްމަދު ނަޝީދުގެ އިތުބާރު ނެތްކަމުގެ މައްސަލަ އެޖެންޑާ ކުރުމަށްފަހު އެ މައްސަލަ ނުނިންމައި މަޖިލީހުގެ އެހެން މަސައްކަތެއް ކުރިއަށް ނުގެންދެވޭނެ ކަމަށް އެޓާނީ ޖެނެރަލް (އޭޖީ) އިން ހޯމަ ދުވަހު ދެއްވި ލަފަޔަށް އިޝާރަތް ކުރައްވަމުންނެވެ.

އެގޮތުން އަންގާރަ ދުވަހުގެ ޖަލްސާ އަކީ ގާނޫނާ ހިލާފަށް ބާއްވަމުންދާ ޖަލްސާއެއް ކަމަށް ބުނެ އެމްޑީޕީގެ މެންބަރުން ވަނީ މަޖިލީހުގެ ތަޅުމުގައި ޝުއޫރު ފާޅުކޮށްފަ އެވެ. އަދި މަޖިލީހުގެ ރިޔާސަތުގައި ވިލިފުށީ ދައިރާގެ މެންބަރު ހަސަން އަފީފު އިންނެވުމަށް ވެސް އެމްޑީޕީގެ މެންބަރުން ވަނީ ދެކޮޅުހަދާފަ އެވެ.