މަޖިލިސް މެންބަރުންގެ އިތުބާރު ގެއްލިފައި ހުންނެވި ވެރިޔަކު މަޖިލީހުގެ ރިޔާސަތުގައި އިންނަވާ ކޮންމެ ދުވަހަކީ ރައްޔިތުންގެ ހައްގުތައް ގެއްލޭ ދުވަހެއް ކަމަށާއި، ރައްޔިތުންގެ ހައްގުތައް ކަށަވަރުކުރެވޭ ފަދަ ގޮތަކަށް މަޖިލިސް ބައްޓަންވުމުން ނޫނީ ތަޅުން ދޫކުރައްވައި ވަޑައިގަތުމުގެ ވިސްނުމެއް އެމްޑީޕީގެ މެންބަރުން ނުގެންގުޅުއްވާ ކަމަށް ދުވާފަރު ދާއިރާގެ މެންބަރު އިސްމާއީލް އަޙްމަދު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އިތުބާރު ނެތްކަމުގެ މައްސަލައިގައި ހުށަހެޅިފައިވާ ގަރާރާ މެދު ގޮތެއް ނިންމުމަށްޓަކައި އާދިއްތަ ދުވަހުގެ ހެނދުނު ބޭއްވި މަޖިލީހުގެ ޖަލްސާގައި ވަނީ، އެ ގަރާރަކީ މަޖިލިސް ގަވާއިދާ ޚިލާފު ގަރާރެއް ކަމުގައި ބުނެ އެ ގަރާރު ބޭރުކޮށްލައި ޖަލްސާ ނިންމާލާފަ އެވެ.

އެކަމުގެ ސަބަބުން އެ ޖަލްސާގެ ރިޔާސަތުގައި އިންނެވި ވިލިފުށީ ދާއިރާގެ މެންބަރު، ހަސަން އަފީފު ޖަލްސާ ނިންމަވާލެއްވީ ގާނޫނާ ޚިލާފަށް ކަމަށް ބުނެ އެމްޑީޕީގެ މެންބަރުންގެ އެދުމުގެ މަތިން މަޖިލިސް އިދާރާއިން އާދިއްތަ ދުވަހުގެ މެންދުރު 11:30 ގައި ޖަލްސާއެއް ބޭއްވި އެވެ. އެހެން ނަމަވެސް އެ ޖަލްސާގެ ރިޔާސަތުގައި އިންނެވި މަޖިލީހުގެ ނާއިބު ރައީސް އީވާ އަބްދުﷲ ވަނީ، އާދިއްތަ ދުވަހު ހެނދުނު ބޭއްވި ޖަލްސާގައި ނިންމެވި ނިންމެވުން ދަމަހައްޓައި، އެ ޖަލްސާ ވެސް ނިންމަވާލައްވާފަ އެވެ.

އެއާ އެކު އެމްޑީޕީގެ މެންބަރުން މަޖިލީހުގެ ތަޅުމުގައި ޚިޔާލު ފާޅުކުރައްވަމުން ގެންދަވާއިރު، ގިނަ މެންބަރުން އަދި ވެސް ތިއްބެވީ ތަޅުމުގައި އެވެ. އެގޮތުން އެކަމުގެ ވާހަކަ ވިދާޅުވެދެއްވަމުން ދުވާފަރު ދާއިރާގެ މެންބަރު އިސްމައީލް އަޙްމަދު ވިދާޅުވީ އާދިއްތަ ދުވަހުގެ ޖަލްސާ ނިންމާލެއްވީ ގާނޫނާ ޚިލާފަށް ކަމަށާއި ގާނޫނު ބުނާ ގޮތުން ނަމަ އެ ޖަލްސާ އެފަދައިން ނިންމުމުގެ އިޙްތިޔާރެއް މަޖިލީހުގެ ރިޔާސަތަށް ލިބިވަޑައިގަންނަވާނެ ކަމަށް ގަބޫލު ނުކުރައްވާ ކަމަށެވެ.

އެގޮތުން އެމްޑީޕީގެ މެންބަރުން އަދިވެސް ތިއްބެވީ ތަޅުމުގައިކަން ފާހަގަ ކުރައްވަމުން މެންބަރު އިސްމާއީލް ވިދާޅުވީ އެބޭފުޅުން ގަބޫލުކުރައްވާ ގޮތުގައި މެންބަރުންގެ އިތުބާރު ގެއްލިފައި ހުންނެވި ވެރިޔަކު މަޖިލީހުގެ ރިޔާސަތުގައި އިންނަވާ ކޮންމެ ދުވަހަކީ ރައްޔިތުންގެ ހައްގުތައް ގެއްލޭ ދުވަހެއް ކަމަށެވެ. އެހެން ކަމުން ތަޅުން ދޫކުރައްވައި ވަޑައިގަންނަވާނީ ރައްޔިތުންގެ ހައްގުތަށް ކަށަވަރުކުރެވޭނެ ފަދަ ބީދާއިން މަޖިލިސް ބައްޓަން ކުރެވިގެން ކަމުގައި މެންބަރު އިސްމާއީލް ވިދާޅުވި އެވެ.

އިސްމާއީލް އެހެން ވިދާޅުވި އިރު، މަޖިލިސް ގަވާއިދު ބުނާ ގޮތުންނަމަ، މަޖިލީހުގެ އިތުރު މަސައްކަތްތަކެއް ކުރެވެނީ މަޖިލީހަށް ހުށަހެޅިފައިވާ ރައީސްގެ އިތުބާރު ނެތްކަމުގެ މައްސަލައާ މެދު ގޮތެއް ނިންމުމަށް ފަހު އެވެ. އެހެން ކަމުން ނިމިދިޔަ މަހު މަޖިލީހަށް ހުށަހެޅި ސަޕްލެމެންޓަރީ ބަޖެޓާއި އަދި އަންނަ އަހަރަށް ލަފާކޮށް ހުށަހަޅާފައިވާ ބަޖެޓު ފަދަ މުހިންމު މަސައްކަތްތަކެއް މިހާރު ވަނީ ހުއްޓިފަ އެވެ.

މެންބަރު އިސްމާއީލް އިތުރަށް ވިދާޅުވީ އާދިއްތަ ދުވަހުގެ ޖަލްސާގެ މައްސަލަ އިމްތިޔާޒީ ކޮމެޓީއަށް ހުށަހެޅީ ވެސް މަޖިލިސް މެންބަރުންގެ އިމްތިޔާޒަށް ރިޔާސަތުން އަރައިގަނެފައިވާތީ އާއި މެޖޯރިޓީއަށް ލިބެންޖެހޭ ހައްގުތަކަށް ރިޔާސަތުން ފުރުސަތު ދީފައި ނުވާތީ ކަމަށެވެ. އެގޮތުން އޭނާ ވިދާޅުވީ އިމްތިޔާޒީ ކޮމެޓީގައި އެދުމަށް ނިންމަވާފައިވަނީ މަޖިލީހުގެ ނައިބު ރައީސް އީވާ އަބްދުﷲ އަދި ވިލިފުށީ ދާއިރާގެ މެންބަރު ހަސަން އަފީފު ނުލައި، މަޖިލީސް ރައީސްގެ އިތުބާރު ނެތްކަމުގެ ޖަލްސާ ކުރިއަށް ގެންދިޔުމަށް މަޖިލީހުގެ އިދާރާގައި އެދުމަށް ކަމަށެވެ.