ރައްޔިތުންގެ މަޖިލީހުގެ ރައީސް، މުހައްމަދު ނަޝީދުގެ އިތުބާރުގެ މައްސަލައާ ގުޅިގެން އާދިއްތަ ދުވަހު ބޭއްވި ދެ ޖަލްސާގައި ރިޔާސަތު ބެލެހެއްޓެވި މަޖިލީހުގެ ނާއިބު ރައީސް އީވާ އަބްދުﷲ އަދި ވިލުފުށީ ދާއިރާގެ މެންބަރު ހަސަން އަފީފު، މުޅި މަޖިލީހުގެ އިމްތިޔާޒަށް އަރައިގެންނެވި ކަމަށް އިމްތިޔާޒާއި ސުލޫކު ކޮމިޓީން ފާސްކޮށްފި އެވެ.

އާދިއްތަ ދުވަހުގެ ހެނދުނު ބޭއްވި މަޖިލީހުގެ ޖަލްސާގައި ވަނީ، ނަޝީދުގެ އިތުބާރު ނެތްކަމުގެ ގަރާރަކީ މަޖިލިސް ގަވާއިދާ ޚިލާފު ގަރާރެއް ކަމުގައި ބުނެ އެ ގަރާރު ބޭރުކޮށްލައި ޖަލްސާ ނިންމާލާފަ އެވެ.

އެކަމުގެ ސަބަބުން އެ ޖަލްސާގެ ރިޔާސަތުގައި އިންނެވި ވިލިފުށީ ދާއިރާގެ މެންބަރު، ހަސަން އަފީފު، އެ ޖަލްސާ ނިންމަވާލެއްވީ ގާނޫނާ ޚިލާފަށް ކަމަށް ވިދާޅުވެ އެމްޑީޕީގެ މެންބަރުންގެ އެދިވަޑައިގެންނެވުމުގެ މަތިން މަޖިލިސް އިދާރާއިން އާދިއްތަ ދުވަހުގެ މެންދުރު 11:30 ގައި ޖަލްސާއެއް ބޭއްވި އެވެ.

އެހެން ނަމަވެސް އެ ޖަލްސާގެ ރިޔާސަތުގައި އިންނެވި މަޖިލީހުގެ ނާއިބު ރައީސް އީވާ އަބްދުﷲ ވަނީ، އާދިއްތަ ދުވަހު ހެނދުނު ބޭއްވި ޖަލްސާގައި ނިންމެވި ނިންމެވުން ދަމަހައްޓަވައި، އެ ޖަލްސާ ވެސް ނިންމަވާލައްވާފަ އެވެ.

މިއާ އެކު، އެމްޑީޕީގެ އެ ދެ ޖަލްސާ އެފަދައިން ނިންމުމުގެ އިޙްތިޔާރެއް މަޖިލީހުގެ ރިޔާސަތަށް ލިބޭނެ ކަމަށް ގަބޫލު ނުކުރާ ކަމަށާއި، މަޖިލީހުގެ އިމްތިޔާޒަށް އެ ދެބޭފުޅުން އަރައިގަންނަވާފައިވާ ކަމަށް ވިދާޅުވެ އެ މައްސަލަ ސުލޫކީ ކޮމިޓީއަށް ވަނީ ހުށަހަޅާފަ އެވެ.

އެގޮތުން އެމްޑީޕީގެ އިސްނެގުމުގެ މަތިން އެ ދެބޭފުޅުންގެ ސުލޫކީ މައްސަލަ ކޮމިޓީއަށް ހުށަހެޅުއްވީ އެމްޑީޕީ ޕީޖީ ލީޑަރު މުހައްމަދު އަސްލަމެވެ.

އަސްލަމް ހުށަހެޅުއްވި މައްސަލައިގައި ވިދާޅުވެފައިވަނީ، ނަޝީދުގެ އިތުބާރު ނެތްކަމުގެ ގަރާރު ކުރިއަށް ނުގެންދެވޭނެ ކަމަށް ނިންމައި އަފީފް ޖަލްސާ ނިންމާލެއްވީ މަޖިލީހުގެ ގަވައިދާ ހިލާފަށް، މުޅި މަޖިލީހުގެ ހައްގަށް އުނިކަން އަންނަ ގޮތަށް ކަމަށެވެ.

އެ ކޮމެޓީގައި ދެ ކަމެއް ހުށަހެޅި އިރު، އެއީ ދެ މެންބަރުން މަޖިލީހުގެ އިމްތިޔާޒަށް އަރައިގަންނަވާފައިވާ ކަމަށް ފާސްކުރުމަށާއި އަދި މަސްލަހަތު ފުށު އަރާތީ ކަމަށް ވިދާޅުވެ، ނަޝީދުގެ އިތުބާރު ނެތް ކަމުގެ ގަރާރު އެޖެންޑާ ކުރާ ޖަލްސާތަކުގައި އަފީފާއި އީވާ ހިމެނޭ ގޮތަށް، ދަ ޑިމޮކްރެޓްސްގެ މެންބަރުންނަށް ނުބެލެހެއްޓެވޭނެ ކަމަށް ނިންމައި އެކަން މަޖިލީހުގެ އިދާރާއަށް އެންގުމަށެވެ.

އެގޮތުން އެ ކޮމެޓީއަށް ހުށަހެޅި ދެ ކަންތައް ވެސް ކޮމެޓީގެ ބައްދަލުވުމުގައި ފާސްކުރުމަށް ނިންމެވީ މެންބަރުންގެ އިއްތިފާގުންނެވެ.