ފުޓުބޯޅަ ކުޅުން ހުއްޓާލުމުގެ އެއްވެސް ވިސްނުމެއް ނެތް: ނޯޔާ

ފުޓުބޯޅަ ކުޅުން ހުއްޓާލުމުގެ އެއްވެސް ވިސްނުމެއް ނުގެންގުޅޭ ކަމަށް ޖަރުމަނު އަދި ބަޔާން މިއުނިކްގެ ގޯލް ކީޕަރު މެނުއަލް ނޯޔާ ބުނެފި އެވެ.

އޭނާ މިހެން ބުނީ ގިނަ ދުވަސްތަކެއް ވަންދެން ކުޅުމާ ދުރުގައި ހުރުމަށްފަހު އެނބުރި އައިސް، ބަޔާނަށް ކުޅެދިން ފުރަތަމަ މެޗަށްފަހު އެވެ. މިދިޔަ ޑިސެމްބަރު މަހުގެ ތެރޭގައި ފައި ބިންދައިގެން ދިޔުމުގެ ސަބަބުން ނޯޔާ ވަނީ 10 މަސް ދުވަސް ވަންދެން ކުޅުމާ ދުރުގައި ހުރެފަ އެވެ. އެ އަނިޔާއިން މުޅިން އެއްކޮށް ރަނގަޅު ނުވަނީވެސް، ނޯޔާ އަށް ވަނީ އިތުރު އަނިޔާއެއް ލިބިފަ އެވެ. އެކަމުން އަރައިގަނެ، ބަޔާންގެ ފަރިތަކުރުންތަކަށް ނޯޔާ ނުކުންނަން ފެށީ، މިދިޔަ އޯގަސްޓު މަހުގެ ތެރޭގަ އެވެ.

ޖަރުމަނު ލީގުގައި ހޮނިހިރު ދުވަހުގެ ރޭ ބަޔާނުން ކުޅުނު މެޗުގެ ފުރަތަމަ 11 އިން ނޯޔާ އަށް ވަނީ ފުރުސަތު ދީފަ އެވެ. އެ މެޗަށްފަހު ވާހަކަ ދައްކަމުން ނޯޔާ ބުނީ، އެއްވެސް ވަރަަކަށް ފުޓުބޯޅަ ކުޅުން ހުއްޓާލުމުގެ ވިސްނުމެއް އޭނާ ގެންގުޅެފައި ނުވާނެ ކަމަށެވެ. ނޯޔާ ފާހަގަ ކުރި ގޮތުގައި ކޮންމެ ކުޅުންތެރިޔަކަށް ވެސް، ރަނގަޅަށް ކުޅެވޭ ދުވަސްކޮޅަކާއި، ރަނގަޅަށް ނުކުޅެވޭ ދުވަސްކޮޅެއް އަންނާނެ އެވެ. ނަމަވެސް އެއީ މާޔޫސްވެ ފަހަތަށް ޖެހެން ޖެހޭ ސަބަބެއް ނޫންކަން ފާހަގަކޮށް ނޯޔާ ބުނީ، އަނިޔާއެއް ވެއްޖެ ނަމަ އަބަދު ވެސް އޭނާގެ އަޒުމަކީ އަނބުރާ ކުޅުމުގެ ތެރެއަށް ވަރުގަދަކޮށް އައުން ކަމަށެވެ.

ގިނަ ދުވަސްތަކަށް ފަހު ކުޅުނު ފުރަތަމަ މެޗާ ގުޅޭ ގޮތުން ނޯޔާ ބުނީ އެހެން ކުޅުންތެރިންނާ އެކުވެގެން އެ މެޗުގައި ރަނގަޅު ކުޅުމެއް ދެއްކުނު ކަމަށެވެ. އޭނާ ބުނީ އަބަދު ވެސް ބޭނުންވަނީ އެންމެން އެކުވެގެން ކުރެވޭ މަސައްކަތުން މޮޅުވަން ކަމަށާއި، ބަޔާނަށް މޮޅުވެވޭނެ ކަމަށެވެ. އަބަދު ވެސް ސިކުނޑީގައި އިންނަނީ ބަޔާނަށް ކޮންމެ ކަމެއް ވެސް ހާސިލްކުރެވޭނެކަން ކަމަށް ވެސް ނޯޔާ ވަނީ ބުނެފަ އެވެ.

ނޯޔާ ބަޔާނަށް ސޮއި ކުރީ 2011 ވަނަ އަހަރު އެވެ. އޭގެ ފަހުން މި ފާއިތުވި 13 ސީޒަންގައި އޭނާ ވަނީ 490 މެޗުގައި ބަޔާންގެ ގޯލު ބަލައްޓައިފަ އެވެ. ބަޔާނާއެކު ނޯޔާ ވަނީ 28 ތައްޓެއް ކާމިޔާބުކޮށްފަ އެވެ. އުމުރުން 37 އަހަރުގެ ކުޅުންތެރިޔާ އަކީ ޖަރުމަނު ޤައުމީ ޓީމުގެ ވެސް ކީޕަރެވެ. ޤައުމީ ޓީމަށް އޭނާ ވަނީ 117 މެޗުގައި ގޯލު ބަލަހައްޓައިދީފަ އެވެ. ޖަރުމަނުން 2014 ވަނަ އަހަރުގެ ފީފާ ވޯލްޑް ކަޕް ކާމިޔާާބު ކުރިއިރު، އެ މުބާރާތުގެ އެންމެ މޮޅު ގޯލް ކީޕަރަކީ ވެސް ނޯޔާ އެވެ.