ގޯލު ޖެހީ ބެލިންހަމް، މެޗު ބަދަލުކޮށްލީ މޮޑްރިޗް: އެންޗެލޯޓީ

ބާސެލޯނާ އަތުން ސްޕެނިޝް ލީގުގައި ރޭ ރެއާލް މެޑްރިޑް ފަހަތުން އަރައި މޮޅުވި މެޗުގައި ޖޫޑް ބެލިހަމް ވަރަށް މޮޅު ކަމަށާއި ނަމަވެސް މެޗު ބަދަލުކޮށްލީ ކްރޮއޭޝިޔާގެ ކެޕްޓަން ލޫކާ މޮޑްރިޗް ކަމަށް ކޯޗު ކާލޯ އެންޗެލޯޓީ ބުނެފި އެވެ.

މެޗަށް ފަހު ވާހަކަ ދައްކަމުން އޭނާ ބުނީ އިނގިރޭސި މިޑްފީލްޑަރު ބެލިންހަމް އަކީ ތަފާތު މޮޅު ކުޅުންތެރިއެއް ކަމަށެވެ. ނަމަވެސް 63 ވަނަ މިނެޓުގައި ޓޯނީ ކްރޫސްގެ ބަދަލުގައި 38 އަހަރުގެ މޮޑްރިޗް ބަދަލު ކުޅުންތެރިއެއްގެ ގޮތުގައި ކުޅެން ނެރުނީ ވަރަށް މުހިންމު ޕްލޭނެއްގެ ދަށުންކަން އޭނާ ފާހަގަކުރި އެވެ.

އޭނާ ބުނީ އުމުރުން ކިތަންމެ ދޮށި ވިޔަސް މޮޑްރިޗް ފަދަ ކުޅުންތެރިންގެ މުހިންމުކަން މެޗުން ފެނިގެންދިޔަ ކަމަށެވެ.

ބާސެލޯނާގެ ކޯޗު ޒަވީ ހަނާންޑޭޒްގެ ތައުރީފް ލިބުނީ ބެލިންހަމަށެވެ. އޭނާ ބުނީ ރެއާލް މެޑްރިޑް މޮޅުކޮށްދިނީ ބެލިންހަމް އެކަނިމާ އެކަނި ކަމަށެވެ.

މި ނަތީޖާއާއެކު ސްޕެނިޝް ލީގުގައި ރެއާލް އާއި ބާސެލޯނާގެ ފަހަތު ވަނީ ހަތަރު ޕޮއިންޓަށް ފުޅާވެފަ އެވެ. 11 މެޗުން ރެއާލް އާއި ޖިނޯރާ އަށް 28 ޕޮއިންޓް ލިބިފައިވާއިރު ތިން ވަނާގައި ބާސެލޯނާ އޮތީ 24 ޕޮއިންޓާއެކުގަ އެވެ.