ބާސެލޯނާ އަތުން ސްޕެނިޝް ލީގުގައި ރޭ ރެއާލް މެޑްރިޑް ފަހަތުން އަރައި މޮޅުވި މެޗުގައި ޖޫޑް ބެލިހަމް ވަރަށް މޮޅު ކަމަށާއި ނަމަވެސް މެޗު ބަދަލުކޮށްލީ ކްރޮއޭޝިޔާގެ ކެޕްޓަން ލޫކާ މޮޑްރިޗް ކަމަށް ކޯޗު ކާލޯ އެންޗެލޯޓީ ބުނެފި އެވެ.
މެޗަށް ފަހު ވާހަކަ ދައްކަމުން އޭނާ ބުނީ އިނގިރޭސި މިޑްފީލްޑަރު ބެލިންހަމް އަކީ ތަފާތު މޮޅު ކުޅުންތެރިއެއް ކަމަށެވެ. ނަމަވެސް 63 ވަނަ މިނެޓުގައި ޓޯނީ ކްރޫސްގެ ބަދަލުގައި 38 އަހަރުގެ މޮޑްރިޗް ބަދަލު ކުޅުންތެރިއެއްގެ ގޮތުގައި ކުޅެން ނެރުނީ ވަރަށް މުހިންމު ޕްލޭނެއްގެ ދަށުންކަން އޭނާ ފާހަގަކުރި އެވެ.
އަހަރުމެންނަށް ފުރަތަމަ ހާފުގައި އަހަރުމެންގެ ލެވެލްގައި ނުކުޅެވުނު. އެގްރެސިވް ނުވެވުނު. ފަހު ހާފުގައި އެކަން ބަދަލުކުރެވުނު. މެޗު ބަދަލުކޮށްލީ މޮޑްރިޗް. އޭނާ އައުމާއެކު މުޅި ގޭމް އަހަރުމެންގެ އަތްދަށަށް ގެނެވުނު. ބާސެލޯނާ އަށް މެޗުގެ ކޮންޓްރޯލް ގެއްލިގެންދިޔަ. އެމީހުންނަށް ހަމަޖެހިގެން ލީޑް ހިފަހައްޓާކަށް ނޭނގުނުއެންޗެލޯޓީ
އޭނާ ބުނީ އުމުރުން ކިތަންމެ ދޮށި ވިޔަސް މޮޑްރިޗް ފަދަ ކުޅުންތެރިންގެ މުހިންމުކަން މެޗުން ފެނިގެންދިޔަ ކަމަށެވެ.
ބާސެލޯނާގެ ކޯޗު ޒަވީ ހަނާންޑޭޒްގެ ތައުރީފް ލިބުނީ ބެލިންހަމަށެވެ. އޭނާ ބުނީ ރެއާލް މެޑްރިޑް މޮޅުކޮށްދިނީ ބެލިންހަމް އެކަނިމާ އެކަނި ކަމަށެވެ.
އޭނާ އެކަނިމާ އެކަނި މަސައްކަތުން ކަހަލަ ގޮތަކަށް އެމީހުން މޮޅުވީ. އޭނާ އަށް ތައުރީފް ހައްގު. އެ ތައުރީފް ދެމުން އަހަރެން ބުނަން އޮތީ އަހަރުމެންނަށް ނަތީޖާ ނޫނީ ގިނަ ކަންކަން ރަނގަޅަށް ކުރެވުނު ވާހަކަ. އަމިއްލަ ދަނޑުގައި ރެއާލް އަތުން ބަލިވުމަކީ ވަރަށް ބޮޑު ދެރައެއް. އެކަމަކު ލީގުގައި ވަރަށް ގިނަ މެޗު އަދި އެބައޮތް. އަހަރުމެންގެ އަމާޒަކީ ލީގު ކާމިޔާބު ކުރުންޒަވީ
މި ނަތީޖާއާއެކު ސްޕެނިޝް ލީގުގައި ރެއާލް އާއި ބާސެލޯނާގެ ފަހަތު ވަނީ ހަތަރު ޕޮއިންޓަށް ފުޅާވެފަ އެވެ. 11 މެޗުން ރެއާލް އާއި ޖިނޯރާ އަށް 28 ޕޮއިންޓް ލިބިފައިވާއިރު ތިން ވަނާގައި ބާސެލޯނާ އޮތީ 24 ޕޮއިންޓާއެކުގަ އެވެ.
