ކޭންގެ ހެޓްރިކާއެކު ބަޔާނަށް އަށް ލަނޑުގެ މޮޅެއް

ޖަރުމަނު ލީގުގައި ޑާމްސްޓަޑާ ދެކޮޅަށް ކުޅުނު މެޗުން އެންމެ ފަހުގެ ޗެމްޕިއަން ބަޔާން މިއުނިކް އަށް ލަނޑުގެ ބޮޑު މޮޅެއް ހޯދައިފި އެވެ.

ހޮނިހިރު ދުވަހުގެ ރޭ ބަޔާންގެ އަމިއްލަ ދަނޑުގައި ކުޅުނު މެޗު އެ ޓީމުން ކާމިޔާބު ކުރީ 8-0 އިންނެވެ. މެޗުގައި ބަޔާނުން އެ ޓީމުގެ އަށް ލަނޑު ވެސް ޖެހީ ދެ ވަނަ ހާފުގަ އެވެ. މެޗު ފަށައިގެން ހަތަރު ވަނަ މިނެޓުގައި ބަޔާންގެ ޔޯޝުއާ ކިމިކް އަށް ވަނީ ސީދާ ރަތް ކާޑެއް ދައްކައިފަ އެވެ. އޭގެ ފަހުން 10 ކުޅުންތެރިންނާއެކު ބަޔާނުން ކުޅެމުން އަންނަނިކޮށް، ޑާމްސްޓަޑާގެ ދެ ކުޅުންތެރިޔަކަށް ވަނީ ސީދާ ރަތް ކާޑު ދައްކައިފަ އެވެ. އެއީ ދެ ޑިފެންޑަރުން ކަމަށްވާ މަޓެޖް މަޖްލިކާ އަދި ކްލައުސް ޖަސުލާ އެވެ.

މެޗުގެ 51 ވަނަ މިނެޓުގައި ބަޔާނަށް ލީޑު ނަގައިދިނީ އިންގްލެންޑުގެ ކެޕްޓަން ހެރީ ކޭން އެވެ. އޭގެ ފަސް މިނެޓު ފަހުން އެ ޓީމުގެ ދެ ވަނަ ލަނޑު ޖެހީ ލެރޯއީ ސާނޭ އެވެ. ބަޔާންގެ ތިން ވަނަ ލަނޑު ޒުވާން ކުޅުންތެރިޔާ ޖަމާލް މުސިއާލާ ޖެހީ 60 ވަނަ މިނެޓުގަ އެވެ. އޭގެ ހަތަރު މިނެޓު ފަހުން ސާނޭ ވަނީ ބަޔާންގެ ހަތަރު ވަނަ ލަނޑު ޖަހައިފަ އެވެ. ބަޔާންގެ ފަސް ވަނަ ލަނޑު ޖެހީ 69 ވަނަ މިނެޓުގައި ކޭން އެވެ. އޭގެ ދެ މިނެޓު ފަހުން އެ ޓީމުގެ ހަ ވަނަ ލަނޑު ޖެހީ ތޯމަސް މުލާ އެވެ. ބަޔާންގެ ހަތް ވަނަ ލަނޑު މުސިއާލާ ޖެހީ 76 ވަނަ މިނެޓުގަ އެވެ. އޭގެ ފަހުން މެޗުގެ 88 ވަނަ މިނެޓުގައި ކޭން ވަނީ އޭނާގެ ތިން ވަނަ ލަނޑު، އަދި ބަޔާންގެ އަށް ވަނަ ލަނޑު ޖަހައިފަ އެވެ.

މޮޅާއެކު ބަޔާނުން ވަނީ ލީގު ތާވަލްގެ އެއް ވަނަ އަށް ޖެހިލައިފަ އެވެ. އެއީ މިހާތަނަށް ކުޅުނު ނުވަ މެޗުން 23 ޕޮއިންޓު ހޯދައިގެންނެވެ. ބަޔާނަށް ވުރެ އެއް މެޗު މަދުން ކުޅެގެން ދެ ވަނައިގައި ބަޔާ ލެވަކޫސަން އޮތީ 22 ޕޮއިންޓާއެކު އެވެ. ލީގުގައި އާދީއްތަ ދުވަހުގެ ރޭ ފްރެއިބާގާ ދެކޮޅަށް ކުޅޭ މެޗުން މޮޅުވެ، އަލުން އެއް ވަނަ އަށް ޖެހިލުމުގެ ފުރުސަތު ލެވަކޫސަން އަށް އޮންނާނެ އެވެ.