އިންޓަ ސްކޫލް ވޮލީ މުބާރާތް: ފ.އަތޮޅު މަދަރުސާގެ ތިން ޓީމު ވެސް ސެމީ ފައިނަލްގައި

މިހާރު ކުރިއަށްދާ އިންޓަ ސްކޫލް ވޮލީ ބޯޅަ މުބާރާތުގެ ތިން ސެމީ ފައިނަލުން ފ.އަތޮޅު މަދަރުސާގެ ޓީމުތައް ޖާގަ ހޯދައިފި އެވެ.

ފ.އަތޮޅު މަދަރުސާ އިން ސެމީ ފައިނަލްގެ ޖާގަ ހޯދީ 16 އަހަރުން ދަށުގެ އަންހެން އަދި ފިރިހެން ބައިގެ އިތުރުން، 14 އަހަރުން ދަށުގެ އަންހެން ބައިންނެވެ. އެ ސްކޫލުން ވާދަކުރާ 14 އަހަރުން ދަށުގެ ފިރިހެން ޓީމު ވަނީ ފައިނަލްގެ ޖާގަ ކަށަވަރުކޮށްފަ އެވެ. ފައިނަލްގައި އެޓީމާ ދެކޮޅަށް ނިކުންނާނެ ޓީމެއް ކަށަވަރުވާނީ ކެޔޮދޫ ސްކޫލާއި، މުހުޔިއްދީނު ސްކޫލް ބައްދަލުކުރާ ސެމީފައިނަލް މެޗަށްފަހުއެވެ.

ފ.އަތޮޅު މަދަރުސާގެ 16 އަހަރުން ދަށުގެ ފިރިހެން ޓީމު ސެމީ ފައިނަލުން ޖާގަ ހޯދީ ގްރޫޕް އޭގެ ދެ ވަނަ ޓީމުގެ ގޮތުގަ އެވެ. އެއީ މި ގްރޫޕުގައި އެ މަދަރުސާ އިން އދ.ކުނބުރުދޫއާ ދެކޮޅަށް ކުޅުނު މެޗުން ބަލުވެފައިވާތީ އެވެ. ސެމީ ފައިނަލްގެ ޖާގަ އެ ސްކޫލުން ކަށަވަރު ކުރީ ހުކުރު ދުވަހު ކަލާފާނު ސްކޫލާ ދެކޮޅަށް ކުޅުނު މެޗުން މޮޅުވެގެންނެވެ. އެ މެޗުން ފ.އަތޮޅު މަދަރުސާ އިން ކާމިޔާބު ކުރީ ސީދާ ދެ ސެޓުންނެވެ. މެޗުގެ ސެޓުތައް އެ ޓީމުން ހޯދީ 25-20 އަދި 25-9 އިންނެވެ. މެޗުގެ މޮޅު ކުޅުންތެރިޔަކަަށް ހޮވުނީ އެ ޓީމުގެ އަޒާން ފަތުހުﷲ އެވެ.

ފ.އަތޮޅު މަދަރުސާގެ 16 އަހަރުން ދަށުގެ އަންހެން ޓީމު ވަނީ ގްރޫޕް ސްޓޭޖުގައި ކުޅުނު ހުރިހާ މެޗަކުން މޮޅުވެފަ އެވެ. އެހެންކަމުން މި ގްރޫޕްގެ އެއް ވަނައިގައި އެ ޓީމު ވަނީ ސެމީ ފައިނަލުން ޖާގަ ހޯދައިފަ އެވެ. 14 އަހަރުން ދަށުގެ އަންހެން ޓީމަށް ގްރޫޕް ސްޓޭޖުގައި ބާކީ އޮތީ ކެޔޮދޫ ސްކޫލާ ދެކޮޅަށް ކުޅޭ މެޗެވެ. މި ދެ ޓީމު ވަނީ މީގެ ކުރިން ގްރޫޕް ބީގައި ކުޅުނު ހުރިހާ މެޗެއް ކާމިޔާބު ކޮށްފަ އެވެ. އެހެންކަމުން ގްރޫޕް ބީގެ އެއް ވަނަ ޓީމާއި، ދެ ވަނަ ޓީމު ކަނޑައެޅޭނީ މި ދެ ޓީމު ބައްދަލު ކުރާ މެޗުންނެވެ. އެ މެޗުން މޮޅުވާ ޓީމަކަށް އެއް ވަނަ ލިބޭއިރު، ބަލިވާ ޓީމަކަށް ލިބޭނީ ދެ ވަނަ އެވެ.

މިއަހަރުގެ މުބާރާތުގައި އަތޮޅު ތެރެއިން ވާދަ ކުރާ ސްކޫލްތައް އަންނަނީ ރަނގަޅު ނަތީޖާތަކެއް ހޯދަމުންނެވެ.