ބިންވެރިޔާ އަދި ގެދޮރުވެރިޔާ ސްކީމުގެ ދަށުން، ދެވަނަ ބުރުގައި ހުށަހެޅި ފޯމުތަކަށް ހަދާނެ ގޮތަކާމެދު ގޮތެއް އަދި ނިންމާފައި ނުވާކަމަށް އިންތިޚާބީ ރައީސް އޮފީހުން ބުނެފިއެވެ.

މި ސަރުކާރުން މާލޭގައި ދިރިއުޅޭ ފަރާތްތަކަށް ބޯހިޔާވަހިކަން ހޯދައިދިނުމަށް ހިންގާ މަޝްރޫއުގެ ދަށުން ގޯއްޗާއި ފްލެޓަށް އެދި ފޯމު ހުށަހެޅުމުގެ ދެވަނަ ބުރަކަށް ހުޅުވާލުމުން 40,594 ފޯމު ވަނީ ހުށަހަޅާފައެވެ. އެގޮތުން، ބަންޑާރަ ގޯއްޗަށް އެދި 19،347 ފޯމު ހުށަހަޅާފައިވާއިރު، ފުލެޓަށް އެދި 21،247 ފޯމް ހުށަހަޅާފައިވާ ކަމަށް މިނިސްޓްރީ އޮފް ނޭޝަނަލް ޕްލޭނިންގ ހައުސިންގ އެންޑް އިންފްރާސްޓްރަކްޗަރއިން ވަނީ ބުނެފައެވެ.

މި ފޯމުތަކާ ގުޅޭގޮތުން ބުދަ ދުވަހު ބޭއްވި ނޫސްވެރިންގެ ބައްދަލުވުމުގައި އިންތިޚާބީ ރައީސް އޮފީހުގެ ތަރުޖަމާނު ފިރުޒުލް އަބްދުﷲ ވިދާޅުވީ، އެ ފޯމުތަކާމެދު ގޮތެއް ނިންމުމަށް މަޝްވަރާކުރަމުން ދާކަމަށެވެ. ނަމަވެސް މިހާތަނަށް ފޯމުތަކާމެދު ކަންކުރާނެ ގޮތަކާމެދު ގޮތެއް ނުނިންމޭ ކަމަށް އޭނާ ވިދާޅުވިއެވެ.

ފިރުޒުލް ވިދާޅުވީ އިންތިޚާބީ ރައީސް ޑރ. މުހައްމަދު މުއިއްޒު އެއްބާރުލުން ދެއްވާނެކަމަށް ވިދާޅުވީ، ފުރަތަމަ ފިޔަވަހީގެ ދަށުން ފޯމު ހުށަހަޅާފައިވާ ފަރާތްތަކުގެ ލިސްޓަށް ކަމަށާއި، ފަހުން ކުރި އިއުލާނާ ގުޅިގެން އެޕްލިކޭޝަންތަކާ ގުޅޭގޮތުން މަޝްވަރާ ކުރަމުން ދާކަމަށެވެ. އެ މަޝްވަރާތައް ކުރިއަށްދާތީ އޭނާ އިތުރު ތަފްސީލެއް ނުދެއްވައެވެ.

މި ސަރުކާރުން ހިންގަން ފަށާ މަޝްރޫއުތައް ނުހުއްޓުވާނެ ކަމަށް، އިންތިޚާބުގެ ދުވަސްވަރާއި އިންތިޚާބުވެވަޑައިގަތުމަށްފަހު ވެސް މުއިއްޒު ވަނީ އެކި މީޑިއާތަކަށް ދެއްވި އިންޓަވިއުތަކުގައި ވިދާޅުވެފައެވެ. އަދި މި ސަރުކާރުން ދޭ ގޯއްޗާއި ފްލެޓުތައް އަތުނުލައްވާނެ ކަމަށްވެސް އެމަނިކުފާނު ވިދާޅުވިއެވެ.

މި ސަރުކާރުން ގޯއްޗާއި ފްލެޓަށް އެދި ހުށަހެޅުމުގެ ފުރުސަތު ދެވަނަ ބުރަށް ހުޅުވާލީ، މާލޭގައި ދިރިއުޅޭ އެހެން ރަށްތަކުގެ ރައްޔިތުންނަށްވެސް ބޯހިޔާވަހިކަން ލިބޭ ގޮތަށެވެ. އެގޮތުން މާލޭގައި ދިރިއުޅޭތާ 20 އަހަރުވެފައިވާ ފަރާތްތަކަށް ގޯއްޗަށް އެދި ހުށަހެޅުމުގެ ފުރުސަތު ހުޅުވާލިއިރު، ފްލެޓަށް އެދި ހުށަހެޅުމުގެ ފުރުސަތު ހުޅުވާލީ މާލޭގައި ދިރިއުޅޭތާ 15 އަހަރުވެފައިވާ ފަރާތްތަކަށެވެ.