އެކަމުގެ ސަބަބުން ބިލްޑިންތަކަށް ގެއްލުންވޭ
ހުޅުމާލެ
ހުޅުމާލެ ނެއިބާހުޑްތަކުން ދިރިއުޅުމަށް ދޫކުރާ އެއްމެދު އިމާރާތްތަކުގެ ވަށައިގެންވާ ހުސްޖާގަ ބޭނުންކުރާނެ ގޮތުގެ އުސޫލު އާބަންކޯއިން އާއްމުކޮށްފިއެވެ.
ޕްލޭނިން އެންޑް ޑިވެލޮޕްމަންޓް، ލޭންޑްސްކޭޕް ޑިޒައިނިންގ ގެ އެސިސްޓަންޓް ޑައިރެކްޓަރު އަބްދުﷲ ފިރާގު ވިދާޅުވީ ހުޅުމާލެ ފޭސް-1 އަދި ފޭސް-2 ގައި އިމާރާތް ކުރެވިފައިވާ ފްލެޓްތަކުގެ ވަށައިގެން ހުންނަ ހުސްޖާގަތައް ބޭނުންކުރެވެމުން ދަނީ ވަކި ޚާއްސަ އުސޫލެއް ނެތި ކަމަށެވެ. ނަމަވެސް އާބަންކޯގެ ފަރާތުން މިހާރު މި ހުސްޖާގަތައް ބޭނުން ކުރެވޭނެ ވަކި އުސޫލެއް ކަނޑައެޅި އުސޫލު އާއްމުކުރެވިފައިވާ ކަަމަށް އޭނާ ވިދާޅުވިއެވެ.
ފިރާގު ވިދާޅުވީ މިހުސް ޖާގަތަކުގައި ބޮޑެތި ގަސްތައް އިންދާފައި އެބަހުރި ކަމަށާއި، އެކަމުގެ ސަބަބުން ބިލްޑިންތަކަށް ގެއްލުންވެ އަދި ބިލްޑިންގ މެއިންޓަނަސް ޓީމަށް ބޮޑެތި އުދަނގޫތައް ކުރިމަތިވާ ކަމަށެވެ.
ފިރާގު ވިދާޅުވީ ވެލިގަނޑުގައި ވެސް އިންދޭނެ ބައެއް ކަހަލަ ގަސްތައް ގައިޑްލައިންގައި ލިސްޓް ކުރެވިފައިވާނެ ކަމަށާއި، އެގަސްތަކުގެ ތެރެއިން ކޮންމެ ވައްތަރެއްގެ ގަހެއް އިންދުމުގެ ހުއްދަ އާއްމު ރައްޔިތުންނަށް ލިބޭނެ ކަމަށެވެ.
ފިރާގު ވިދާޅުވީ ފްލެޓް ނަންބަރު 108 އަދި 109 ހިމެނޭ ސަރަހައްދުގައި ގައިޑްލައިނަށް އަމަލު ކުރުމުގެ ގޮތުން ޕައިލެޓް ޕްރޮޖެކްޓު ފަށާފައިވާ ކަަމަށެވެ. މި ޕައިލެޓް ޕްރޮޖެކްޓް ނިންމުމަށްފަހު ހުޅުމާލެ ފޭސް-1 އަދި ފޭސް-2 ގައި ފްލެޓް ހުރި ހުރިހާ ސަރަހައްދުގައި ވެސް މި ޕްރޮޖެކްޓް ކުރިއަށް ގެންދާނެ ކަމަށް އޭނާ ވިދާޅުވިއެވެ.
