ފަޅެއް ހިއްކައިގެން ގޯތިދެވޭނެ އެއްވެސް ގާބިލްކަމެއް މި ސަރުކާރުގެ ނެތް: މާލޭ ރަށްވެހިންގެ ޖަމިއްޔާ

ފަޅެއް ހިއްކައިގެން ގޯތިދެވޭނެ އެއްވެސް ގާބިލްކަމެއް މިސަރުކާރުގެ ނެތް ކަމަށާއި، ގުޅީފަޅުގެ ލޭންޑް ޔޫސް ޕްލޭން (އެލްޔޫޕީ) އަކީ ވެސް ރައްޔިތުންނަށް ޖައްސާފައިވާ އުދަނގުލެއް ކަމަށް މާލޭ ރަށްވެހިންގެ ޖަމިއްޔާއިން ބުނެފިއެވެ.

ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ބިންވެރިޔާ ސްކީމްގެ ދަށުން ދޫކޮށްފައިވާ ގޯތިތައް ދޫނުކޮށް ހިފަހައްޓައި އަދި އެސަރަހައްދުތަކުގެ ތަރައްގީގެ މަޝްރޫއުތައް ކުރިއަށް ނުގެންދާތީ އެކަމުގެ ކަންބޮޑުވުން ރައްޔިތުން ދަނީ ފާޅުކަމުންނެވެ. ބޯހިޔާވަހިކަން ފޯރުކޮށްދިނުމުގައި މާލޭގެ ރައްޔިތުންގެ ގެއްލިފައިވާ ހައްގުތަކާއި މާލޭގެ މައްސަލަތަކުގައި އަޑުއުފުލައި ހައްލު ހޯދަން މާލޭގެ ރަށްވެހިންގެ ޖަމިއްޔާއިން ދަނީ މަސައްކަތްތައް ކުރަމުންނެވެ.

މި މައްސަލަތަކާއި ކަންބޮޑުވުންތަކާ ގުޅޭގޮތުން ރާއްޖެޓީވީގެ ''ޓީވީޓޯކް ޕްރޮގްރާމް'' ގައި މާލެ ރަށްވެހިންގެ ޖަމިއްޔާގެ ރައީސް އިބްރާހިމް ޝިޔާޒު ވިދާޅުވީ ކުރީ ސަރުކާރުގައި އެކުލަވާލާފައިވާ ގުޅީފަޅުގެ އެލްޔޫޕީއާއި، ހައުސިން އަދި ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބުގެ އިރުޝާދުގެ ދަށުން ނެރިފައިވާ އެލްޔޫޕީގެ މާ ބޮޑު ތަފާތެއް ނެތް ކަމަށެވެ.

ޝިޔާޒު ވިދާޅުވީ މަސައްކަތްތައް ލަސްވާ ގޮތަށް އަމަލުކުރަމުންދާ ކަމަށާއި، އަވަހަށް މި ސަރަހައްދުތައް ތަރައްގީކޮށް ރައްޔިތުންނަށް ގޯތިތައް ދިނުމުގެ ވިސްނުމެއް ނެތް ކަމަށެވެ. ކުރީގައި އެލްޔޫޕީ ބަދަލުކޮށްފައިވަނީ ނުހިއްކައި އޮތް ތަނަކަށްވާތީ ގޯތިތަކެއް ބަދަލުކުރަންޖެހިގެން ކަމަށް ބުނެފައިވާއިރު، މިސަރުކާރަކީ ފަޅެއް ހިއްކައިގެން ވެސް ގޯތިދެވޭނެ ގާބިލުކަމެއް ނެތް ސަރުކާރެއް ކަމަށް ޝިޔާޒު ވިދާޅުވިއެވެ.

އަޅުގަނޑުމެންނަށް ހަމަ އެލްޔޫޕީތައް ޑްރާފްޓްތައް ވެސް ލިބޭ. ދެން އަޅުގަނޑުމެން މިކަމުގައި އުޅޭތީއާއެކު ނޫނިއްޔާ އަޅުގަނޑުމެން ނުކުމެ އަޑު ގަދަ ކުރާތީ. މިހާރު އެންމެފަހުން ހަދާފައި އިން އެލްޔޫޕީއަކީ ކުރީ ސަރުކާރުން ދީފައިވާ އެލްޔޫޕީއޭއެކޭ މާ ބޮޑު ތަފާތެއް ނެތް. އެއަށްވުރެ ތޮއްޖެހުން ބޮޑުހެން ހީވަނީ. ގިރާވަރުފަޅަށް ގޯތި ލިބުނު 1300 ގޯތި ގުޅީފަޅަށް ބަދަލުކޮށްފައި. އޭރުގައި އެމީހުން ބަދަލުކޮށްފައި ކީ އެއީ ނުހިއްކާ އޮތްތަނޯ. މިހާރު އެތަން ނުހިއްކަން. މިސަރުކާރުގައި ނެތް ހިއްކުމުގެ ގާބިލުކަމެއް. ފުން ތައް ހިއްކައިގެން ބަޔަކަށްތަނެއް ދެވޭކަށް. އެމީހުން އައިސް މިބެލީ މިހެންހަދާނަމޭ. ނުވިތާކަށް ގުޅީފަޅުގައި އިތުރަށް ފްލެޓު އަޅަން ވެސް ރެޑީ ވަނީ. މިހާރު ނެރިފައި އޮތް އެލްޔޫޕީގައި ގުޅީފަޅު މީހުންނަށް ޖެއްސި ބޮޑު އަނެހެން އުދަނގުލެއް. ހިތްހަމަޖެހޭ ދިރިއުޅުމެއް ނޫޅެވޭނެ. އަނެއްކާ ވެސް އަނެއް ހުޅުމާލެއަށް ތެދެއްތޯ ވާނީ. ހަމަ ތޮއްޖެހިގެން ގޮސްފައި މީހުންތަކެއް އެތާގައި ގިނަވެ އެއަށްވުރެ މާ ރަނގަޅު ތެދެއްތޯ ކުރިން އޮތް ގޮތަށް އޮތަށް.

މާލެ ރަށްވެހިންގެ ޖަމިއްޔާގެ ރައީސް އިބްރާހިމް ޝިޔާޒު

ގުޅީފަޅު ރަށްވެހިންގެ ޖަމިއްޔާގެ ރައީސް ޝައްމާން ރަޝީދު ވިދާޅުވީ އެއްވެސް މަޝްވަރާ ކުރުމެއް ނެތި އެލްޔޫޕީ ބަދަލު ކުރުމަކީ ބަލައިގަނެވޭނެ ކަމެއް ނޫން ކަމަށާއި، މިފަދަ ބަދަލުތައް ގެންނަނީ ކުއްލިކުއްލިއަކަށް ކަމަށެވެ.

ގުޅީފަޅުގެ ތިން އެލްޔޫޕީއެއް ނެރިފައިވާކަން ފާހަގަކުރައްވައި ޝަމްއާން ވިދާޅުވީ ހައުސިން މިނިސްޓަރު ޑރ.އަލީ ހައިދަރުގެ ދަށުން ނެރިފައިވާ އެލްޔޫޕީއަށް ގިނަ ރައްޔިތުންގެ ތާއީދު ލިބުނު ކަމަށެވެ. އެ އެލްޔޫޕީ އެކުލަވާލާފައިވަނީ ޕާކުތަކާއި، ޕާކިން ސްޕޭސްތަކާއެކު، ސޯޝަލައިޒްވެވޭ ގޮތަށް ކަމަށާއި، ވަރަށް ރޭވުންތެރިކަމާއެކު ކަމަށް ޝަމްއާން ވިދާޅުވިއެވެ.

ގުޅީފަޅުގެ އެލްޔޫޕީއަށް ބަދަލު ގެނެސް، ގުޅީ ފަޅުން ގޯތި ލިބޭ ފަރާތްތަކަށް ކުރިން ދޫކޮށްފައިވާ ބަންޑާރަ ގޯތީގެ ރަޖިސްޓަރީ ބާތިލު ކުރެވިފައިވާ ކަމަށާއި އަދި ކުރިން ސޮއި ކުރި ބަންޑާރަ ގޯތީގެ އެއްބަސްވުން އުވިފައިވާކަން މިމަހުގެ 1 ވަނަ ދުވަހު ހައުސިން މިނިސްޓްރީން ވަނީ އަންގާފައެވެ.

ގޯތި ލިބިފައި އޮތްތަން ބަދަލު ކުރުމަށް ފަހު ގުޅީފަޅުން ގޯތި ލިބިފައިވާ ފަރާތްތަކުގެ މެދުގައި 30 މެއި 2025 ވީ ހުކުރު ދުވަހު އުސްފަސްގަނޑުގައި ގުރު ނެގުން ބާއްވާފައިވެއެވެ. މިނިސްޓްރީން ބުނެފައިވަނީ ޖުލައި 07 ވަނަ ދުވަހުގެ ހެނދުނު 9:30 އިން ފެށިގެން އައު ބަންޑާރަ ގޯތީގެ ރަޖިސްޓަރީ އާއި ބަންޑާރަ ގޯތި ދޫކުރުމުގެ އެއްބަސްވުން ދޫކުރުމަށް ކަނޑައަޅާފައިވާ ކަމަށެވެ.

ގުޅީފަޅުން ދޫކުރަން ނިންމާފައި ވަނީ 3670 ގޯއްޗެވެ. އެއީ ގިރާވަރުފަޅުން ގުޅީފަޅަށް ބަދަލު ކުރި 1337 ގޯތި ވެސް ހިމަނައިގެންނެވެ. އެންމެ ފަހުން ގުޅީފަޅުގެ ލޭންޑް ޔޫސް ޕްލޭނަށް ބަދަލު ގެނައިރު 90 ގޯތި އޮތީ އިތުރުކޮށްފަ އެވެ. އެއީ ކޮން ބޭނުމެއްގައި އިތުރު ކުރި ގޯތިތަކެއް ކަމެއް ނޭނގެ އެވެ.