އިންޓަ ސްކޫލް ވޮލީ މުބާރާތް: ފ.އަތޮޅު މަދަރުސާގެ ތިން ޓީމަށް ވެސް ވަރުގަދަ ފެށުމެއް!

މިހާރު ކުރިއަށްދާ އިންޓަ ސްކޫލް ވޮލީ ބޯޅަ މުބާރާތުގައި ހޯމަ ދުވަހު ކުޅުނު ތިން މެޗުން ވެސް، ފ.އަތޮޅު މަދަރުސާގެ ޓީމުތައް މޮޅުވެއްޖެ އެވެ.

ހޯމަ ދުވަހުގެ ހަވީރު ފ.އަތޮޅު މަދަރުސާގެ 16 އަހަރުން ދަށުގެ ފިރިހެން ޓީމު ވާދަކޮށްފައި ވަނީ މަޖީދިއްޔާ ސްކޫލާ އެވެ. އެ މެޗުން ފ.އަތޮޅު މަދަރުސާ އިން ވަނީ ފަސޭހެކަމާއެކު ސީދާ ތިން ސެޓުން ކާމިޔާބުކޮށްފަ އެވެ. މެޗުގެ ސެޓުތައް އެ ޓީމުން ކާމިޔާބު ކުރީ 25-7 އަދި 25-14 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ފ.އަތޮޅު މަދަރުސާގެ އަޒާން ފަތުހުﷲ އެވެ.

ހޯމަ ދުވަހުގެ ރޭ ފ.އަތޮޅު މަދަރުސާގެ 14 އަހަރުން ދަށުގެ ފިރިހެން ޓީމު ވަނީ ކެޔޮދޫ ސްކޫލް ބަލިކޮށްފަ އެވެ. އެ މެޗު ފ.އަތޮޅު މަދަރުސާ އިން ކާމިޔާބު ކުރީ ސީދާ ދެ ސެޓުންނެވެ. ފ.އަތޮޅު މަދަރުސާ އިން ސެޓުތައް ކާމިޔާބު ކުރީ 25-12 އަދި 25-13 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ފ.އަތޮޅު މަދަރުސާގެ އިކާން ޢަބްދުލް ޣައްފާރު އެވެ.

ފ.އަތޮޅު މަދަރުސާގެ 16 އަހަރުން ދަށުގެ އަންހެން ޓީމު ވަނީ ސީދާ ދެ ސެޓުން އިމާދުއްދީން ސްކޫލްގެ މައްޗަށް ކުރި ހޯދައިފަ އެވެ. އެ ޓީމުން މި މެޗުގެ ސެޓުތައް ކާމިޔާބު ކުރީ 25-14 އަދި 25-13 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ، ފ.އަތޮޅު މަދަރުސާގެ އީމާން އަލީ އެވެ.

މި ޑިވިޝަންގައި ކުނބުރުދޫ ސްކޫލް އިން ވަނީ ސީދާ ދެ ސެޓުން ކ.އަތޮޅު ތައުލީމީ މަރުކަޒު ބަލިކޮށްފަ އެވެ. މެޗުގެ ސެޓުތައް އެ ޓީމުން ކާމިޔާބު ކުރީ 25-17 އަދި 25-15 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ކުނބުރުދޫ ސްކޫލްގެ ފާތިމަތު ފައިހާ މުޙައްމަދު އެވެ.

ހޯމަ ދުވަހު ކުޅުނު އެހެން މެޗުތަކަށް ބަލާއިރު، 16 އަހަރުން ދަށުގެ ފިރިހެން ބައިގައި ކުނބުރުދޫ ސްކޫލް އިން ވަނީ ކަލާފާނު ސްކޫލް ބަލިކޮށްފަ އެވެ. މެޗުގެ ދެ ސެޓު ވެސް އެ ޓީމުން ހޯދީ 25-14 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ ކުނބުރުދޫ ސްކޫލްގެ މުޙައްމަދު އިކުރާމް އިސްމާއީލް އެވެ. މި ބައިގައި އިމާދުއްދީން ސްކޫލާ ވާދަކޮށް، ދަނގެތީ ސްކޫލް އިން ވަނީ ސީދާ ދެ ސެޓުން މެޗު ކާމިޔާބުކޮށްފަ އެވެ. ދަނގެތީ ސްކޫލް އިން ސެޓުތައް ކާމިޔާބު ކުރީ 25-20 އަދި 25-22 އިންނެވެ. މެޗުގެ މޮޅު ކުޅުންތެރިޔަކަށް ހޮވުނީ އެ ޓީމުގެ އަލީ އަރުސަމް ޙަސަން އެވެ.

16 އަހަރުން ދަށުގެ ފިރިހެން ބައިގައި ވ.އަތޮޅު ތައުލީމީ މަރުކަޒުން ވަނީ ސީދާ ދެ ސެޓުން ތާޖުއްދީން ސްކޫލް ބަލިކޮށްފަ އެވެ. މެޗުގެ ސެޓުތައް ވ.އަތޮޅު ތައުލީމީ މަރުކަޒުން ކާމިޔާބު ކުރީ 25-22 އަދި 25-20 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ އެ ޓީމުގެ އިސްމާއީލް އިތާން ހާދީ އެވެ.

14 އަހަރުން ދަށުގެ ފިރިހެން ބައިގައި ތާޖުއްދީން ސްކޫލާ ދެކޮޅަށް ކުޅުނު މެޗު މުހްޔިއްދީން ސްކޫލް ކާމިޔާބު ކުރީ ދެ ސެޓު އެއް ސެޓުންނެވެ. މެޗުގެ ފުރަތަމަ ސެޓު 25-19 އިން މުހްޔިއްދީން ކާމިޔާބު ކުރި ނަމަވެސް، ތާޖުއްދީނުން ވަނީ 22-25 އިން ދެ ވަނަ ސެޓު ކާމިޔާބު ކޮށްފަ އެވެ. ނަތީޖާ ނެރުމަށް ކުޅުނު ތިން ވަނަ ސެޓު މުހްޔިއްދީނުން ކާމިޔާބު ކުރީ 15-10 އިންނެވެ.

ޖުމުލަ 19 ސްކޫލަކުން މިއަހަރުގެ މުބާރާތުގައި ވާދަކުރާއިރު، މުބާރާތުގެ ކުޅުން ކުރިއަށް ދަނީ މާފަންނު ވޮލީ ކޯޓުގަ އެވެ. މުބާރާތުގެ މެޗުތައް އަންގާރަ ދުވަހު ވެސް ކުރިއަށް ދާނެ އެވެ.