މުހިންމު ލިޔުންތަކެއް ނައްތާލިކަމަށް ކުރާ ތުހުމަތުތަކަށް އެފްއެސްއެމްއިން އިންކާރުކޮށްފި
ނައްތާލި ލިޔުންތަކުގެ ތެރޭގައި ކޮރަޕްޝަނުގެ މައްސަލަތަކާ ގުޅުންހުރި ލިޔުންތައް ހިމެނޭކަމަށް ތުހުމަތުކޮށްފައިވޭ
އެފްއެސްއެމްގެ ލިޔުންތަކެއް ނައްތާލިކަމަށް ބުނެ ދައުރުކުރަމުންދާ ވީޑިއޯގެ މަންޒަަރުތަކެއް
ފިއުލް ސަޕްލައިޒް އޮފް މޯލްޑިވްސް(އެފްއެސްއެމް)އިން މުހިންމު ލިޔުންތަކެއް ގަވާއިދާ ޚިލާފަށް ނައްތާލިކަމަށް ބުނާ ވާހަކަތައް އެ ކުންފުނިން ދޮގުކޮށްފިއެވެ.
ފިއުލް ސަޕްލައިޒް އޮފް މޯލްޑިވްސް (އެފްއެސްއެމް)ގެ މުހިންމު ލިޔުންތަކެއް އެ ކުންފުނިން ނައްތާލާ ކަމަށް ބުނާ ވީޑިއޯއެއް މީސްމީޑިއާގައި ވަނީ ދައުރުވެފައެވެ.
އެފްއެސްއެމްގެ ޓްވީޓެއްގައި ބުނެފައި ވަނީ ކުންފުނީގެ އެއްވެސް މުހިންމު ލިޔުމެއް ނައްތާލާފައި ނުވާނެ ކަމަށެވެ.
އެހެންނަަމަވެސް ގިނަ ދުވަސްވެފައިވާ، ކުންފުންޏަށް ބޭނުންނުވާ ބައެއް ލިޔުންތައް ނައްތާލުމަކީ އެ ކުންފުނިން ކުރާ ކަމެއް ކަމަށް ވަނީ ބުނެފައެވެ.
އެ ކުންފުނިން ބުނީ، މީސްމީޑިއާގައި ދައުރުވަމުންދާ ވީޑިއޯއާ ގުޅިގެން ބަލަންޖެހޭ ކަންކަން ބަލަމުންދާ ކަމަށެވެ. އަދި އެކަމާ ގުޅޭގޮތުން އެއްވެސް އިދާރާއަކުން ކަމެއް ސާފުކުރަން ބޭނުންވާނަމަ އެފްއެސްއެމްއިން އެމަކަށް މަރުހަބާ ކިޔާނެ ކަމަށް އެ ކުންފުނިން ވަނީ ބުނެފައެވެ.
އެފްއެސްއެމްގެ ލިއުންތަކެއް ކޮންކްރީޓް މެޝިނަކަށް އަޅައިގެން ނައްތާލި ކަމަށް ބުނާ ވީޑިއޯއެއް ދައުރުވާން ފަށާފައިވަނީ، ކުންފުނީގެ މުވައްޒަފަކު މެދުވެރިކޮށް ލިބުނު ވީޑިއޯތަކެއް ކަަމަށް ބުނާ ވީޑިއޯތަކެއް މީސްމީޑިއާގައި ދައުރުވާން ފެށި ހިސާބުންނެވެ.
މި މައްސަލާގައި އެ މުވައްޒަފު ވަނީ ސަސްޕެންޑްވެސް ކޮށްފައި ކަމަށް ބައެއް މީޑިއާތަކުން ބުނިނަމަވެސް، އެފްއެސްއެމްއިން އެފަދަ ވާހަކައެއް ފާހަގަކޮށްފައެއް ނެތެވެ.
އެފްއެސްއެމްއިން ލިޔުންތައް ނައްތާލި މައްސަލައާ ގުޅިގެން ހޯމަ ދުވަހުގެ މަޖިލީހުގެ ޖަލްސާގައި ބައެއް މެމްބަރުންގެ ފާޑުކިޔުން އެ ކުންފުންޏަށް ވަނީ އަމާޒުވެފައެވެ.
އެގޮތުން އެ ލިޔުންތައް ނައްތާލީ ގޯސްތައް ފޮރުވަން ކަމަށް މެމްބަރުން ވަނީ ތުހުމަތު ކުރައްވާފައެވެ.
އެގޮތުން މާފަންނު މެދު ދާއިރާގެ މެމްބަރު އިބްރާހީމް ރަޝީދު (ބޮންޑެ) ވަނީ، އިންތިގާލީ މަރުހަލާގައި ލިޔެކިއުންތަކާމެދު އަމަލުކުރަންޖެހޭ ގޮތާ ޚިލާފަށް އެފްއެސްއެމްއިން އަމަލުކޮށްފައި ވާކަަމަށް ވިދާޅުވެފައެވެ. އަދި ނައްތާލި ލިޔުންތަކުގެ ތެރޭގައި ކޮރަޕްޝަނުގެ މައްސަލަތަކާ ގުޅުންހުރި ލިޔުންތައް ހިމެނޭ ކަމަށްވެސް ވަނީ ބުނެފައެވެ.
