އެސްޓީއޯގެ ސަބްސިޑަރީ ކުންފުނި ފިއުލްސަޕްލައި މޯލްޑިވްސް އިން ވިއްކަމުން އަންނަ ތެލުގެ އަގުތަކަށް ބަދަލު ގެނެސްފިއެވެ.

އެސްޓީއޯއިން ބުނީ ދުނިޔޭގެ ބާޒާރުގައި ތެލުގެ އަގު ހިފެހެއްޓުމެއްނެތި ދަނީ އުފުލެމުންނެވެ. މީގެ ސަބަބުން، މި ކުންފުންޏަށް ތެޔޮ ގަންނަން ލިބޭ އަގުވެސް ވަނީ އެތައް ގުނައެއް އުފުލިފައިވާ ކަމަށެވެ.

އެހެންކަމުން 13 ފެބްރުއަރީ 2022 ވަނަ ދުވަހުން ފެށިގެން ފިއުލް ސަޕްލައިސް މޯލްޑިވްސްގެ ސްޓޭޝަންތަކުން ތެޔޮ ލިބޭނެ އަގުތަކަށް ބަދަލު ގެންނަން ނިންމާފައިވާ ކަމަށެވެ. އެގޮތުން ޕެޓްރޯލް ލީޓަރެއް 12.98 (ބާރަ ރުފިޔާ ނުވަދިހަ އަށް ލާރި) އަށް އަދި ޑީސަލް ލީޓަރެއް 13.04 (ތޭރަ ރުފިޔާ ހަތަރު ލާރި) އަށް ވިއްކުމަށް ނިންމާފައިވާ ކަމަށެވެ.

އެސްޓީއޯއިން މިދިޔަ ޖެނުއަރީ މަހުގައި ވެސް ތެލުގެ އަގުވަނީ ބޮޑުކޮށްފައެވެ. އެގޮތުން ޕެޓްރޯލް ލީޓަރެއް 12.06 (ބާރަ ރުފިޔާ ހަ ލާރި) އަދި ޑީސަލް ލީޓަރެއް 12.44 (ބާރަ ރުފިޔާ ސާޅީސް ހަތަރު ލާރި) އަށް ވިއްކުމަށް ނިންމިއެވެ. އޭގެ ކުރިން ޕެޓްރޯލް ލީޓަރެއް ވިއްކާފައިވަނީ 11.16 (އެގާރަ ރުފިޔާ ސޯޅަ ލާރި) އަށެވެ. އަދި ޑީސަލް ލީޓަރެއް ވިއްކާފައިވަނީ 11.84 (އެގާރަ ރުފިޔާ އަށްޑިހަ ހަތަރު ލާރި) އަށެވެ.

އެސްޓީއޯ އިން ބުނެފައިވަނީ އަބަދުވެސް މަސައްކަތް ކުރަމުންދަނީ އެ ކުންފުނިން ފޯރުކޮށްދޭ އެންމެހާ ޚިދުމަތްތައް ހުއްޓުމެއްނެތި، ދެމެހެއްޓެނިވި ގޮތެއްގައި ރައްޔިތުންނަށް ފޯރުކޮށްދެމުން ގެންދިއުމަށެވެ.