ޕާކިސްތާން މަރުގެ ތުންފަތް މަތީގައި، އަފްޣާނިސްތާނަށް ބޯލަރުންގެ އިތުބާރު

ކްރިކެޓް ވޯލްޑްކަޕުގައި މިއަދު ޕާކިސްތާނާއި އަފްޣާނިސްތާން ބައްދަލުކުރާއިރު ދެ ގައުމުގެ ހާލަތު ތަފާތެވެ. އެންމެ ފަހުން ކުޅުނު ދެ މެޗުން ބަލިވެގެން ޕާކިސްތާން ވަނީ ގަދަ ހަތަރަކުން ބޭރުވެ، ފަސް ވަނަ އަށް ވެއްޓިފަ އެވެ. އަފްޣާނިސްތާން އޮތީ ހަތަރު މެޗުން ހަތަރު މެޗުން 2 ޕޮއިންޓާއެކު 10 ގައުމު ވާދަކުރާ މުބާރާތުގެ ޓޭބަލުގެފުލުގަ އެވެ. އެކަމަކު މޮޅުވެގެން ޕާކިސްތާނާ އަރާ ހަމަކުރެވޭނެ އެވެ.

މިހެންވެ ކެޕްޓަން ބަބަރް އަޒަމްގެ ލީޑަރޝިޕަށް ޕާކިސްތާނުގެ ސަޕޯޓަރުންނާއި ކުރީގެ ކުޅުންތެރިންގެ ފާޑުކިއުން ވަނީ ވަރަށްބޮޑަށް އަމާޒުވެފަ އެވެ.

އިންޑިޔާގައި ކުރިއަށްދާ މުބާރާތުގައި މިއަދުގެ މެޗު ކުޅޭނީ ޗެންނާއީގެ ޗިދަމްބަރަމް ސްޓޭޑިއަމުގަ އެވެ. ޕާކިސްތާނުން ގަބޫލުކުރާ ގޮތުގައި މިއީ އެމީހުންނަށް ނަސީބު އެހީތެރިވެދޭނެ ދަނޑެކެވެ. އެމީހުން މިސާލަކަށް ދައްކަނީ 1997ގައި މި ދަނޑުގައި އިންޑިޔާ ބަލިކުރި ހަނދާނެވެ. އެ މެޗުގައި ޕާކިސްތާނުގެ ސައީދު އަންވަރު 194 ލަނޑު ހެދި އެވެ. މިއީ އެއް ދުވަހުގެ ކްރިކެޓްގައި އެހާތަނަށް ރެކޯޑެކެވެ.

ޕާކިސްތާނުގެ އޯޕަނިންގް ބެޓްސްމަން އިމާމުލްހައްގު ބުނީ ސައީދު އަންވަރުގެ 194 ލަނޑު ހެދި ހަނދާން އޭނާ މާބޮޑަށް ނެތް ނަމަވެސް އެއީ ޓީމުގެ ރޫހު ރަނގަޅުކޮށްދޭނެ ހަނދާނެ ކަމަށެވެ. އަދި އިންޑިޔާ އާއި އޮސްޓްރޭލިޔާއަތުން ބަލިވި ދެ މެޗަށްވުރެ މޮޅު ކުޅުމެއް މިއަދުގެ މެޗުގައި ފެނިގެންދާނެ ކަމަށެވެ.

އަފްޣާނިސްތާން ދެކޭ ގޮތުގައި މި މެޗުގައި އެޑްވާންޓޭޖް ބޮޑީ ސްޕިން ބޯލަރުންނަށެވެ. އެ ގައުމުގައި ގިނައީ ވެސް އެފަދަ ބޯލަރުންނެވެ.