33 ސިކުންތުގެ ތެރޭގައި ލަނޑު ޖަހައިގެން މާކް ގިއޫ ތާރީޚުގެ ތެރެއަށް!

ބާސެލޯނާގެ ސީނިއަ ޓީމްގެ ޖަރޒީގެ ކުޅެން ނުކުތްތާ 33 ސިކުންތުގެ ތެރޭގައި ލަނޑު ޖަހާ ޓީމް މޮޅުކޮށްދީގެން 17 އަހަރުގެ މާކް ގިއޫ ތާރީޚުން ޖާގަ ހޯދައިފިއެވެ.

ބާސެލޯނާގެ ތާރީޚުން މާކް ގިއޫ ޖާގަ ހޯދީ ލީގުގައި އެކްލަބަށް އެންމެ އަވަހަށް ލަނޑު ޖަހައިދިން ކުޅުންތެރިޔާގެ ގޮތުގައެވެ. އަމިއްލަ ދަނޑުގައި އެތްލެޓިކް ބިލްބާއޯ އަތުން ބާސެލޯނާ މޮޅުވީވެސް ސްޕެއިންގެ ގިއޫ ޖެހި ހަމައެކަނި ލަނޑުންނެވެ. ލަނޑެއް ނުޖެހި ދެޓީމް އެެއްވަރުވެފައި އޮއްވާ ކޯޗު ޒަވީ މާކް ގިއޫ އަށް ފުރުޞަތު ދިނީ 79 ވަނަ މިނެޓުގައެވެ. 33 ސިކުންތުގައި ލަނޑު ޖެހީ ފައިގަ ޖެހުނު ދެވަނަ ބޯޅައިންނެވެ. މާކް ގިއޫއަށް ފުރުޞަތު ދިނީ ޒުވާން ކުޅުންތެރިޔާ ފާމިން ލޮޕޭޒްގެ ބަދަލުގައެވެ.

ޢާއްމުކޮށް ބާސެލޯނާގެ 18 އަހަރުން ދަށުގެ ޓީމުން ފުރުޞަތު ލިބޭ މާކް ގިއޫ ކްލަބްގެ ބީ ޓީމަށްވެސް ކުޅުނީ އެއް މެޗެވެ. ކްލަބްގެ ސީނިއަރ ޓީމުން ޒަވީ ފުރުޞަތު ދިނީވެސް ކްލަބަށް ކުރިމަތިވެފައިވާ އަނިޔާއާއި ސަސްޕެންޝަންގެ މައްސަލަތަކުގެ ސަބަބުންނެވެ. އަނިޔާގައި ތިބި ކުޅުންތެރިންގެ ތެރޭގައި ލެވަންޑޯސްކީއާއި, ޑި ޔޮންގ ހިމެނެއެވެ. މާކް ގިއޫގެ އިތުރުންވެސް ބާސެލޯނާގެ އޭ ޓީމްގައި ޅަ ކުޅުންތެރިންތަކެއް ހިމެނެއެވެ. މެޗުގައި ބޭނުންކުރި ކުޅުންތެރިންގެ ތެރޭގައި ލީގުގެ ތާރީޚުގައި ލަނޑުޖެހި އެންމެ ހަގު ކުޅުންތެރިޔާ ޔަމާލްވެސް ހިމެނެއެވެ. މި ކުޅުންތެރިންނަކީ ބާސެލޯނާގެ ޔޫތު އެކަޑަމީން ތަމްރީނުވާ ކުޅުންތެރިންނެވެ. އެތްލެޓިކް ބިލްބާއޯ އަތުން ބާސެލޯނާ މޮޅުވި މެޗަށްފަހު އެނބުރި ގެއަށް ދިޔަ ކުޅުންތެރިންގެ ތެރޭގައި އުމުރު ހަމަނުވާތީ ޑްރައިވިންގ ލައިސަންސް ނެތް ކުޅުންތެރިން ހިމެނެއެވެ. ކޯޗު ޒަވީ ބުނީ އެކުޅުންތެރިންގެ ކިބައިން ޖެހިލުންވުމެއް ނުފެންނަ ކަމަށާއި, އެކުޅުންތެރިން ފެނުމުން އުފާވެރި އިހުސާސެއް ކުރެވޭ ކަމަށެވެ.

މެޗުގައި މާކް ގިއޫ ލަނޑު ޖެހި މަންޒަރު ބަލަން ސްޓޭޑިއަމްގައި އޭނާގެ މައިންބަފައިން ތިބި ކަމަށާއި, އެމީހުންގެ ލޮލުން ކަރުނަ އައިކަމަށް ރިޕޯރޓްތައް ބުނެއެވެ. އަދި ލަނޑާއެކު އޭނާގެ އިންސްޓަގްރާމްގެ ފޮލޯވާސްގެ އަދަދު 40,000 ން ލައްކައަކަށްވުރެ މައްޗަށް އެރިއެވެ. މިމޮޅާއެކު ބާސެލޯނާ ލީގު ތާވަލްގެ ތިންވަނައަށް ގެންގޮސްދިނެވެ. އެއީ 24 ޕޮއިންޓާއެކުއެވެ. އެއްވަނަ އަދި ދެވަނާގައި އޮތް ދެޓީމާ ދެމެދު އޮތީ ޕޮއިންޓެއްގެ ފަރަގެކެވެ.