އިންޓަ ސްކޫލް ވޮލީ މުބާރާތް: އދ.އަތޮޅު މަދަރުސާ އަދި ހުރަވީ އަށް ފުރިހަމަ މޮޅެއް

އިންޓަ ސްކޫލް ވޮލީ ބޯޅަ މުބާރާތުގައި ކުޅުނު ފުރަތަމަ މެޗު، އދ.އަތޮޅު މަދަރުސާ އަދި ހުރަވީ ސްކޫލުން ކާމިޔާބުކޮށްފި އެވެ.

ތިން އަހަރު ދުވަހުގެ މެދު ކެނޑުމަކަށްފަހު، އަލުން މިއަހަރުގެ މުބާރާތް ވަނީ މާފަންނު ވޮލީ ކޯޓުގައި އާދިއްތަ ދުވަހުގެ ރޭ ފަށައިފަ އެވެ. މުބާރާތުގެ ފުރަތަމަ މެޗުގައި ބައްދަލުކޮށްފައި ވަނީ 16 އަހަރުން ދަށުގެ ފިރިހެން އުމުރުފުރާގައިި އދ.އަތޮޅު މަދަރުސާ އާއި ކެޔޮދޫ ސްކޫލް އެވެ. އެ މެޗު އދ.އަތޮޅު މަދަރުސާ އިން ކާމިޔާބު ކުރީ ސީދާ ދެ ސެޓުންނެވެ. މެޗުގެ ސެޓުތައް އެ ޓީމުން ކާމިޔާބު ކޮށްފައި ވަނީ 29-27، އަދި 25-12 އިންނެވެ. ފުރަތަމަ ސެޓުގައި ދެ ޓީމުގެ ފަރާތުން ވެސް ވާދަވެރި ކުޅުމެއް ފެނުނުއިރު، ދެ ވަނަ ސެޓުގައި ކެޔޮދޫ ސްކޫލަށް އެދެވޭ ކުޅުމެއް ދެއްކިފައެއް ނުވެ އެވެ. މެޗުގެ މޮޅު ކުޅުންތެރިޔަކަށް ހޮވުނީ އދ.އަތޮޅު މަދަރުސާގެ ޝައިޙާން ޝަމީމް އެވެ.

ދެ ވަނަ މެޗުގައި 16 އަހަރުން ދަށުގެ ފިރިހެން އުމުރުފުރާގައި ހުރަވީ ސްކޫލް ނިކުތީ މަޖީދިއްޔާ ސްކޫލާ ދެކޮޅަށެވެ. މި މެޗުވެސް ހުރަވީން ކާމިޔާބު ކުރީ ފަސޭހަކަމާއެކު ސީދާ ދެ ސެޓުންނެވެ. މެޗުގެ ސެޓުތައް ހުރަވީން ކާމިޔާބު ކުރީ 25-19، އަދި 25-14 އިންނެވެ. މި މެޗުގެ މޮޅު ކުޅުންތެރިޔަކަށް ހޮވުނީ ހުރަވީ ސްކޫލްގެ މުޙައްމަދު އަކްސަމް އަމްޖަދު އެވެ.

މިއަހަރުވެ މުބާރާތުގައި ޖުމުލަ 19 ސްކޫލަކުން ވާދަކުރެ އެވެ. އެއީ އަތޮޅު ތެރޭގެ ނުވަ ސްކޫލަކާއި، މާލޭ ސަރަހައްދުގެ 10 ސްކޫލެކެވެ. މުބާރާތުގައި ޖުމުލަ 42 ޓީމެއް ވާދަކުރާއިރު، އެންމެ ފުރަތަމަ ކުރިއަށް ދާނީ 14 އަހަރުން ދަށުގެ އަންހެން، ފިރިހެން އަދި 16 އަހަރުން ދަށުގެ އަންހެން، ފިރިހެން ޑިވިޝަންގެ ކުޅުމެވެ. މުބާރާތުގެ މެޗުތައް ހޯމަ ދުވަހު ވެސް ކުރިއަށް ދާނެ އެވެ.