ރާއްޖެއަށް އެތެރެކުރަން އުޅުނު 8 ކިލޯގެ މަސްތުވާތަކެތި އަތުލައިގެންފި
21 އޮކްޓޯބަރު 2023 | ހޮނިހިރު 16:52މިއީ ތިން ޝިޕްމަންޓަކުން އަތުލައިގަތް މަސްތުވާތަކެތި
އަތުލައިގަތް މަސްތުވާތަކެތި
ވައިގެ މަގުން ރާއްޖެއަށް އެތެރެކުރަން އުޅުނު މަސްތުވާތަކެތީގެ ތިން ޝިޕްމަންޓެއް ކަސްޓަމްސްއިން އަތުލައިގެންފިއެވެ.
މިކަމާ ގުޅޭގޮތުން ކަސްޓަމްސްއިން ބުނީ، ފުރަތަމަ ޝިޕްމަންޓް ސެޕްޓެމްބަރ މަހުގެ 27 ވަނަ ދުވަހު އަތުލައިގަތީ ޖަރުމަނުން ރާއްޖެއަށް ގެނެސްފައިވާ ޕެކޭޖެއްގެ ތެރެއިން ކަމަށެވެ. އެ ޕެކޭޖްގެ ތެރެއިން މަސްތުވާތަކެތީގެ ބާވަތެއް ކަމަށްވާ މެފެޑްރޯންގެ 2.2 ކިލޯ ފެނިފައިވާކަމަށް ކަސްޓަމްސްއިން ބުންޏެވެ.
މަސްތުވާތަކެތީގެ ދެވަނަ ޝިޕްމަންޓް އަތުލައިގަތީ މިމަހުގެ ފަސް ވަަނަ ދުވަހު އިންޑިއާއިން ރާއްޖެ ގެނައި އެއަރކާގޯގެ ޝިޕްމެންޓެއްގެ ތެރެއިންނެވެ. ކަސްޓަމްސްއިން ބުނިގޮތުގައި އެ ޝިޕްމަންޓުގައި ހުރި އިލެކްޓްރޯނިކް އާލާތްތަކުގެ ތެރޭގައި ފޮރުވާފައި ހުރި ތިން ކިލޯގްރާމް ހެރޮއިން ފެނިފައިވެއެވެ.
ކަސްޓަމްސްއިން ބުނީ، މަސްތުވާތަކެތީގެ ތިންވަނަ ޝިޕްމަންޓް އަތުލައިގަތީ މިމަހުގެ ހަތްވަނަ ދުވަހު ތައިލެންޑުން ރާއްޖެ ގެނައި އެއަރކާގޯގެ ޝިޕްމަންޓެއްގެ ތެރެއިން ކަމަށެވެ. އެ ޝިޕްމަންޓުގެ ތެރެއިން 3.5 ކިލޯ ގްރާމުގެ ހެރޮއިން ފެނިފައިވާކަމަށް ކަސްޓަމްސްއިން ބުނެއެވެ.
ކަސްޓަމްސްއިން ބުނިގޮތުގައި އަތުލައިގަތް މަސްތުވާތަކެތީގެ މަގުމަތީ އަގު 8 މިލިއަން ރުފިޔާއަށްވުރެ މަތިވާނެއެވެ.
އެ މައްސަލަތައް އިތުރަށް ތަހުގީގު ކުރުމަށްޓަކައި، މަސްތުވާތަކެތި ވަނީ ފުލުހުންނާ ހަވާލުކޮށްފައެވެ.
