އޮނާނާއާ މެދު ޓެން ހާގަށް އޮތީ ޔަގީންކަން
ޔުނައިޓެޑުގައި އޮނާނާ އޭނާގެ ކުރިމަގު ބިނާ ކުރަން ޖެހޭނީ ރަނގަޅު ކުޅުމެއް ދައްކައިގެން
މެންޗެސްޓަރ ޔުނައިޓެޑުގެ ކީޕަރު އޮނާނާ
މެންޗެސްޓަރ ޔުނައިޓެޑަށް ކުޅެމުން އަންނަ ކެމަރޫންގެ ގޯލް ކީޕަރު އަންދްރޭ އޮނާނާއާ މެދު އިތުބާރު އޮންނަ ކަމަށް އެ ކުލަބުގެ ކޯޗު އެރިކް ޓެން ހާގް ބުނެފި އެވެ.
މެމްޗެސްޓަރ ޔުނައިޓެޑުގެ ކުރީގެ އެއް ނަންބަރު ގޯލް ކީޕަރު ޑޭވިޑް ޑެހެޔާ ކުލަބު ދޫކޮށްލުމާއެކު، އެ ކުލަބުން ވަނީ އިންޓަ މިލާންގައި ހުރި އޮނާނާ ގެނެސްފަ އެވެ. ޔުނައިޓެޑަށް ބަދަލުވެ އޮނާނާ އަތުން ކޫސަނި ގޯސްތަކެއް ހެދޭތީ ކުލަބުގެ ސަޕޯޓަރުންގެ ނުރުހުން ވެސް އޭނާ އަށް އަމާޒުވި އެވެ.
އޮނާނާގެ ކުރިމަގާ ގުޅޭ ގޮތުން ވާހަކަ ދައްކަމުން ޓެން ހާގް ބުނީ، އޮނާނާ ކަންކަން ރަނގަޅު ކުރާނެކަން އެންމެނަށް ވެސް އިނގޭނެ ކަމަށެވެ. އަދި އޭނާ އަށް ކުރިއަށް ދެވޭނީ ފަހަރަކު ފިޔަވަޅަކުން ކަމަށް ވެސް ޓެން ހާގް ވަނީ ބުނެފަ އެވެ. ޓެން ހާގް ބުނީ ގޮތުގައި ޔުނައިޓެޑުގައި އޮނާނާ އޭނާގެ ކުރިމަގު ބިނާ ކުރަން ޖެހޭނީ ރަނގަޅު ކުޅުމެއް ދައްކައިގެންނެވެ. އެކަން އޮނާނާ ކުރާނެ ކަމުގެ ޔަގީންކަން އޮތް ކަމަށް ޓެން ހާގް ވަނީ ބުނެފަ އެވެ. ޓެން ހާގް ބުނި ގޮތުގައި ޒުބާން އުމުރުގައި ބާސެލޯނާ ގައި އަދި އޭގެ ފަހުން އަޔެކްސް އާއި އިންޓަ މިލާންގައި ވެސް އޮނާނާ ވަނީ މޮޅު ކުޅުމެއް ދައްކައިފަ އެވެ. އެހެންކަމުން އެއީ އޭނާ އަށް އިތުބާރު ކުރަން ޖެހޭ ސަބަބެއް ކަމަށް ވެސް ޓެން ހާގް ބުންޏެވެ.
ޔުނައިޓެޑަށް ބަދަލުވެ އޮނާނާ ވަނީ މިހާތަނަށް 11 މެޗެއްގައި އެ ކުލަބުގެ ގޯލު ބަލަހައްޓައިފަަ އެވެ. އުމުރުން 27 އަހަރުގެ އޮނާނާ އަކީ ކެމަރޫން ޤައުމީ ޓީމުގެ ވެސް ގޯލް ކީޕަރެވެ.
