އަލް ތާވޫންއާ އެއްވަރުވެ، އަލް އިއްތިހާދު ތިން ވަނައިގައި

ސައުދީ ޕްރޯ ލީގުގައި އަލް ތާވޫނާ ދެކޮޅަށް ކުޅުނު މެޗުން އަލް އިއްތިހާދު އެއްވަރުވެއްޖެ އެވެ.

ބައިނަލްއަޤުވާމީ ބްރޭކަށްފަހު ސައުދީ ލީގުގެ ކުޅުން ވަނީ ހުކުރު ދުވަހު ފަށައިފަ އެވެ. އަލް ތާވޫން އާއި އަލް އިއްތިހާދު ބައްދަލު ކުރި މެޗު ނިމުނީ ދެ ޓީމު 1-1 އިން އެއްވަރުވެގެންނެވެ. މެޗުގައި ފުރަތަމަ ލަނޑު ޖަހައި ލީޑު ނެގީ އަލް އިއްތިހާދުންނެވެ. މެޗު ފަށައިގެން 22 ވަނަ މިނެޓުގައި އެ ޓީމަށް ލީޑު ނަގައިދިނީ ފްރާންސްގެ ކަރީމް ބެންޒެމާ އެވެ. އެއީ އަލް އިއްތިހާދުގެ ކޮރޮނާޑޯ ހުރަސްކޮށްދިން ބޯޅައެއް، ބޮލުން ގޯލަށް ވައްދާލައިގެން ބެންޒެމާ ކާމިޔާބު ކުރި ލަނޑެކެވެ. ނަމަވެސް އޭގެ ހަތަރު މިނެޓު ފަހުން ބެންޒެމާ އަތުން ބައި ކޮޅަށް ވަތް ލަނޑާއެކު، މެޗުގެ ނަތީޖާ ހަމަހަމަވި އެވެ. އެއީ އަލް ތާވޫނަށް ލިބުނު ކޯނަރެއްގައި ހުރަސްވި ބޯޅަ ބޭރު ކޮށްލަން އުޅުމުގެ ތެރޭގައި ގޯލަށް ވަދެގެންނެވެ.

މި ނަތީޖާ އާއެކު އަލް އިއްތިހާދު އޮތީ ލީގު ތާވަލްގެ ތިން ވަނަ މަގާމުގަ އެވެ. އެއީ މިހާތަނަށް ކުޅުނު 10 މެޗުން 20 ޕޮއިންޓު ހޯދައިގެންނެވެ. ލީގުގައި މިހާތަނަށް ކުޅުނު 10 މެޗުގެ ތެރެއިން އަލް އިއްތިހާދު ވަނީ ހަ މެޗުން މޮޅުވެފަ އެވެ. ދެ މެޗެއް އެއްވަރުވެފައިވާއިރު، އަނެއް ދެ މެޗުން ވަނީ ބަލިވެފަ އެވެ. އަލް ތާވޫން އޮތީ 10 މެޗުން 23 ޕޮއިންޓު ހޯދައިގެން ލީގު ތާވަލްގެ ދެ ވަނަ މަގާމުގަ އެވެ.