ޤާހިރާގެ ސުލްހައިގެ ސަމިޓްގައި ފަލަސްތީނުގެ ރައީސްގެ އިތުރުން ބައިނަލްއަޤްވާމީ ލީޑަރުން ބައިވެރިވެވަޑައިގަންނަވަނީ

އިސްރާއިލާއި، ހަމާސްއާއި ދެމެދު ހިނގަމުންދާ ކުރިމަތިލުން ތަކަށް ސުލްހަވެރި ހައްލެއް ހޯދުމުގެ މަޤްޞަދުގައި ބާއްވާ ޤާހިރާ ސަމިޓުގައި ފަލަސްތީނުގެ ރައީސް މަހްމޫދު އައްބާސްގެ އިތުރުން ބައިނަލްއަޤުވާމީ ލީޑަރުން ބައިވެރިވެވަޑައިގަންނަވާނެ ކަމަށް ރޮއިޓާސް އިން ރިޕޯޓްކޮށްފި އެވެ.

މިސަމިޓްގައި ބައިވެރިވެ ވަޑައިގަތުމަށް، ބަހްރެއިންގެ ރަސްގެފާނު ހަމަދު ބިން އީސާ އަލް ޚަލީފާ އާއި ކުވައިތުގެ ވަލީއަހުދު ޝެއިހް މިޝާލް އަލް އަހްމަދު އަލް ޖާބިރު އަލް ސަބާހް ވެސް ޤާހިރާއަށް ވަޑައިގެންފި ކަން ރޮއިޓާސް ކަށަވަރު ކޮށްދެއެވެ.  

ފަލަސްތީނާއި އިސްރާއީލުގެ މައްސަލައާ ގުޅޭ ގޮތުން މަޝްވަރާ ކުރުމަށް ހަމަޖެހިފައިވާ މި ބައްދަލުވުމުގައި ފްރާންސްގެ ޚާރިޖީ ވަޒީރު ކެތަރިން ކޮލޯނާ އާއި ޔޫރަޕިއަން ކައުންސިލްގެ ރައީސް ޗާލްސް މިޝޭލް އަދި އީޔޫގެ އިސް ޑިޕްލޮމެޓް ޖޯސެފް ބޮރެލް ބައިވެރިވެވަޑައިގަންނަވާކަން ކަށަވަރުވެފައިވާ ކަމަށް މީޑިއާ ރިޕޯޓްތައް ބުނެއެވެ.

ޣައްޒާއަށް ދެމުންދާ ހަމަލާތަކާއި ދެކޮޅަށް ފްރާންސްގެ ވެރިރަށް ޕެރިހުގައި ފުޅާދާއިރާއެއްގައި މުޒާހަރާތައް ކުރަމުންދާއިރު، ފްރާސްގެ ޚާޖީވަޒީރު ކޮލޯނާ ވަނީ މިދިޔަ ހަފުތާގައި ޤާހިރާ، ބެއިރޫތު އަދި އިޒްރޭލަށް ދަތުރުުރައްވާފަ އެވެ.

ސުލްހައިގެ ސަމިޓުގައި ގްރީސްގެ ބޮޑުވަޒީރު ކިރިޔާކޯސް މިޓްސޯޓަކިސް އާއި އިޓަލީގެ ބޮޑުވަޒީރު ޖޯޖިއާ މެލޯނީ ވެސް ބައިވެރިވެވަޑައިގަންނަވާނެ ކަމަށް އެ ގައުމުތަކުގެ ސަރުކާރުގެ މަސްދަރުތަކުން ރޮއިޓާސްއަށް މައުލޫމާތު ދީފައިވާ ކަމަށް ރޮއިޓާސްއިން ބުނެއެވެ.

ދެކުނު އެފްރިކާގެ ރައީސް ސިރިލް ރަމަފޯސާ ވެސް ވަނީ އިޒްރޭލާއި ޣައްޒާގައި ހިނގަމުންދާ ކުރިމަތިލުންތަކާ ބެހޭ ގޮތުން މަޝްވަރާ ކުރެއްވުމަށް މި ސަމިޓްގައި ބައިވެރިވެ ވަޑައިގަންނަވާނެ ކަން އޭނާގެ އޮފީހުން ކަށަވަރު ކޮށްދީފައިވާ ކަމަށް ރޮއިޓާސްއިން ބުނެއެވެ.

ސައުތު އެފްރިކާގެ ރައީސް ހުކުރު ދުވަހު ނެރުއްވި ބަޔާނެއްގައި ވިދާޅުވެފައިވަނީ އާންމުންނަށް އަމާޒުކޮށް ދިން ހަމަލާތަކާއި، އޭގެ ސަބަބުން އެތައް ބައެއްގެ ފުރާނަ ގެއްލި، އެތައްބަޔަކު ޒަޚަމްވުމާއި، ޣައްޒާއަށް ކުރިމަތިވެފައިވާ އިންސާނީ ކާރިސާއާ މެދު ރައީސް ރަމަފޯސާ ވަރަށް ބޮޑަށް ކަންބޮޑުވެ ވަޑައިގަންނަވާ ކަމަށެވެ.

އަދި މެދުއިރުމައްޗަށް ދާއިމީ ސުލްހައެއް ގެނައުމަށް ދުނިޔޭގެ ފެންވަރުގައި ކުރަމުންދާ މަސައްކަތުގައި ބައިވެރިވުމަށް ދެކުނު އެފްރިކާ އޮތީ ތައްޔާރަށް ކަމަށެވެ.

ސްޕެއިންގެ ބޮޑުވަޒީރު ޕެޑްރޯ ސަންޗޭޒް އާއި ސައިޕްރަސްގެ ރައީސް ނިކޮސް ކްރިސްޓޮޑޯލައިޑްސް އާއި ކެނެޑާގެ ބޮޑުވަޒީރު ޖަސްޓިން ޓްރޫޑޯ އާއި ޖަރުމަނުގެ ޚާރިޖީ ވަޒީރު އެނާލީނާ ބެރްބޮކް އާއި ޖަޕާނުގެ ޚާރިޖީ ވަޒީރު ޔޯކޯ ކަމިކަވާ އާއި އަދި އިނގިރޭސި ޚާރިޖީ ވަޒީރު ޖޭމްސް ކްލެވާލީ ޤާހިރާ ސަމިޓްގައި ބައިވެރިވެވަޑައިގަންނަވާނެ ކަމަށް ބެލެވެއެވެ.

މިސްރުގެ ރައީސް އަބްދުލްފައްތާހް އަލް ސީސީ ގޮވާލެއްވި މި ސަމިޓުގެ މަޤްސަދަކީ ޣައްޒާގައި ހިނގަމުންދާ ކުރިމަތިލުން ތައް ކުޑަކޮށް، ހަނގުރާމަ ހުއްޓާލުމަށް އެހީތެރިވެދީ ފަލަސްތީނުގެ މައްސަލައަށް އިންސާފުވެރި ހައްލެއް ހޯދުމެވެ.

އިޒްރޭލުން ވަނީ ދެ ހަފުތާގެ ތެރޭގައި ޣައްޒާއަށް ދިން ބޮމުގެ ހަމަލާތައް ވަރުގަދަކޮށް، 3،800 މީހުން ޝަހީދުކޮށް 13،000 އަށް ވުރެ ގިނަ މީހުން ޒަޚަމް ކޮށްލާފަ އެވެ.

ސުލްހައިގެ ސަމިޓަކަށް ދުނިޔޭގެ ލީޑަރުން ޤާހިރާއަށް ވަޑައިގަންވަމުންދާއިރު، ރަފަހް ބޯޑަރު ހުރަސްކުރުމުގެ އެއްބަސްވުމަށް ފަހުވެސް ޣައްޒާއަށް އެހީގެ ލޮރީތައް ވަދެފައި ނުވާތީ ގިނަ ދުވަސްތަކެއް ވަންދެން އިންތިޒާރު ކުރަމުން އައި އެހީ ނުލިބި 2 މިލިޔަނެއްހާ މީހުންވަނީ ހާލުގައި ޖެހިފައެވެ.

އެމެރިކާއިން ބުނެފައިވަނީ އެހީގެ ޓްރަކްތަކަށް ދަތުރު ނުފެށިވަނީ އެހިސާބުގެ މަގުތަކުގައި ވަރަށް ބޮޑަށް ވަޅުގަނޑުތައް ހެދިފައި ހުރުމުން ކަމަށާ އެތަންތަން ބެއްދުމަށް ފަހު ދަތުރު ފަށާނެ ކަމުގައެވެ.