ނިމިގެންދިޔަ ހަފްތާގެ އާދިއްތަ ދުވަހު އިންޑިއާގެ ބޮޑުވަޒީރުގެ ޚާއްސަ ދައުވަތަކަށް އިންޑިއާއަށް ރައީސް އިބްރާހިމް މުހައްމަދު ސާލިހުގެ ދެ ކަނބަލުން ކުރެއްވި ތާރީޚީ ޒިޔާރަތުގެ ތެރެއިން، އިންޑިއާގެ އާގަރާގައި ހުންނަ މުޅި ދުނިޔެއަށް އެތަނެއްގެ ރީތިކަމާއި ފުރިހަމަ ކަމަށް މަޝްހޫރު "ތާޖް މަހަލް' އަށް އެ ދެކަނބަލުން ޒިޔާރަތް ކުރެއްވިއެވެ.
ރައީސް ސާލިހުގެ ދެކަނބަލުން ތާޖް މަހަލްއަށް ޒިޔާރަތްކުރެއްވީ އަންގާރަ ދުވަހުގެ މެންދުރުވާން ކައިރިވެފައި ވަނިކޮންނެވެ. އާގަރާގެ އިސްވެރިންނާއި ތާޖް މަހަލް އިމާރާތް ބަލަހައްޓާ ޚާއްސަ ބޭފުޅުން އެ ދެކަނބަލުންނާއި އެކު ބައިވެރިވެވަޑައިގެންނެވިއެވެ.
ތާޖް މަހަލްގެ ރީތިކަމާއި ފުރިހަމަ ކަމުގެ ވާހަކަ އަބަދުވެސް އަޑު އިވެނީ ދޫދޫ މަތިންނާއި ވާހަކަތަކުންނާއި އެކިއެކި ލިޔުންތަކުންނެވެ. ތަނުގެ ހައިބަތާއި އަސްލު ރީތިކަމާއި ހިތްގައިމުކަން ސިދާ އެތަނަށް ޒިޔާރަތްކޮށް ބަލާލާ އިހްސާސްކޮށްލި މީހަކަށް ވިއްޔާ އެނގޭނެއެވެ.
އެއީ ދުނިޔޭގެ ހަތް އަޖައިބުން އަޖައިބެކެވެ. އިމާރާތްކުރުމުގެ ނަމޫނާއެއްގެ އިތުރުން ލޯބީގެ ރަމްޒެކެވެ. އިންޑިއާގެ މުސްލިމު ރަސްކަލެއް ކަމަށްވާ ޝާހު ޖަހާން އޭނާ އެންމެ ލޯބިވާ އަނބިކަނބަލުން މުމްތާޒު މަހަލްގެ ހަނދާނުގައި ބިނާކުރި ލޯބީގެ ރަމްޒެކެވެ. 17 ވަނަ ގަރުުނުގައި 22000 މަސައްކަތްތެރިންގެ، 23 އަހަރުގެ އިންތިހާ ދަރަޖައިގެ ބުރަ މަސައްކަތެވެ. މުޅިތަން ބިނާކޮށްފައިވަނީ ހުދު ޖަވާހިރު ކުލައިގެ އަލި ސަންގުމަރުމަރު ހިލައިންނެވެ. ޒީނަތްތެރިކޮށްފައިވަނީ އެ ގައު ކަނޑައި ނަގައިގެންނެވެ. ހިތަށް ސިފަކޮށްލަންވެސް ދަތި އެހާމެ ރީތި ސާދާ މަސައްކަތެކެވެ. އަތްތެރި މަސައްކަތުގެ ދެވަނައެއްނެތް ލާމަސީލު މިސާލެކެވެ.
ތާޖު މަހަލްގެ ވަށައިގެންވާ ސަރަހައްދުވެސް އިންތިހާއަށް ރީއްޗެވެ. ބިންމަތިގައި ސަންގުމަރުމަރު ހިލަ ޖަހާފައެވެ. އެތަނުގެ ކުރިމައްޗަށްވާ ގޮތަށް އޮތީ ޗާލު މަޑުނޫކުލައިގެ ފެންގަނޑެކެވެ. އެ ފެންގަނޑުން މުޅި އިމާރާތުގެ ހިޔަނި ފެނެއެވެ. ފެންގަނޑުގެ ދެފަރާތުގައި ހުރީ ގަސް އިންދާފައެވެ.
މި ހިތްގައިމު ލޯބީގެ ރަމްޒު ބައްލަވާލެއްވުމަށް ރައީސް ސާލިހުގެ ދެކަނބަލުން ވަޑައިގެން އެ އިމާރާތުގެ ކުރިމަތީގައި ސަންގުމަރުމަރު ހިލައިން ހަދާފައިވާ ގޮނޑިކޮޅުގައި ދެކަނބަލުން އިށީދެވަޑައިގެން ހިތްގައިމު ފޮޓޯފުޅެއް ނެންވިއެެވެ. އަދި ތާޖް މަހަލް މުޅި ބިނާ އަރާގޮތަށް ސެލްފީއެއް ރައީސްގެ ދެކަނބަލުން ނެންގެވިއެވެ. މުޅި އިވެންޓްގައި އަޅުގަނޑަށް އެންމެ ހިތްގައިމުވި އެއް ކަމަކީ ރައީސް ސާލިހުގެ އަނބިކަނބަލުން ތުރުކުރައްވައިގެން ހުންނެވި ދިގުހެދުންކޮޅެވެ. އެކަމަނާގެ ހެދުންކޮޅުން އަޅުގަނޑަށް ތާޖުމަހަލްގެ ކުލަތަކާއި ހިތްގައިމުކަން ފެނިގެންދިޔައެވެ.
ރައީސްގެ ދެކަނބަލުން ހިތްތިރިކަމާއި މަޑުމަތިރިކަމާއި އެކު އެއްވެސް ބޮޑާކަމެއް ނެތި އެމަނިކުފާނުގެ އަރިހުގައި ތާޖުމަހަލް ބެއްލެވުމަށް ޒިޔާރަތްކުރެއްވި އެންމެންނާއި އެކުވެސް ފޮޓޯ ނެންގަވިއެވެ. އެ ތާރީޚީ ފުރުސަތު ނުލިބޭ އެކަކުވެސް ރައީސްގެ އަރިހުގައި އެތަނަކަށް ނުދެއެވެ.
ތާޖް މަހަލްގެ އެތެރޭގެ މަންޒަރުތައްވެސް ނުހަނު ފުރިހަމައެެވެ. އެތަނުގެ ތެރެއަށް ވަދެވުމާއިއެކު ބޭގަމް މުމްތާޒްގެ މަގްބަރާ ފެނިގެންދެއެވެ. މުޅި އިމާރާތަށް ނަޒަރު ހިންގާލުމުން ބުރަ މަސައްކަތުގެ ހިތްގައިމުކަމާއި ޗާލޫކަން ނޫން އެހެން އެއްޗެއް ނުފެނެއެވެ. ތަނުގެ އެތެރޭގައި އަޑު "އެކޯ" ވާ ވާހަކަ އަކީވެސް ހަގީގަތެއްކަން އެނގިގެން ދިޔައީ، ބަންގީގެ ރިވެތި ކަލިމައެއްގެ އަޑުން ތަން ގުގުމާލުމުންނެވެ. އަޑު ޖެހިފައި އެނބުރި އާދެއެވެ.
ތާޖް މަހަލަކީ އިންޑިއާއަށް ޒިޔާރަތްކުރާ ފަތުރުވެރިންގެ މެދުގައި ވަރަށްްވެސް މަގުބޫލު ތަނެކެވެ. ފާއިތުވީ ފަސް އަހަރު ދުވަހުގެ ތެރޭގައި ހަ މިލިއަންް ފަތުރުވެރިން ތާޖް މަހަލަށް ޒިޔާރަތްކޮށްފައިވާކަމަށް އިންޑިއާގެ ޓުއަރިޒަމް މިނިސްޓްރީން ބުނެއެވެ.
ރީތިކަމާއި ފުރިހަމަ ކަމުގެ ލާމަސީލު މި ބިނާ ހެނދުނު ފިޔާތޮށިކުލައިގައި ހުރެފައި، މެންދުރު ފަހު ހުދުކުލައަށް ބަދަލުވެފައި ހަވީރުވުމުން ކިރު ކުލައަށް ބަދަލުވުމަކީ އަޖައިބުން ފުރިގެންވާކަމެކެވެ. މުޅި އިންސާނިއްޔަތު އާޝޯޚު ކޮށްލި މި ބިނާގެ ވާހަކަ ދުނިޔެ ދެމި އޮތްހާ ދުވަހަކު ދައްކާނެތެވެ.
