119 ކިލޯ ޑްރަގް ކޭސް: މަސްތުވާތަކެތި ފެނުނު ސައިކަލު ޒުބައިރަށް ވިއްކި މީހާގެ ހެކިބަހާއި ފުލުހުންގެ އިތުރު އޮފިސަރުންގެ ހެކިބަސް ނަގައިފި
19 އޮކްޓޯބަރު 2023 | ބުރާސްފަތި 09:57މަސްތުވާތެކެތި ފެނުނު ސައިކަލުގެ ކުރީގެ ވެރިފަރާތާއި ސުވާލުކުރެވުނު
119 ކިލޯ ޑްރަގް ކޭސްގައި ހައްޔަރުކޮށް ދައުވާ އުފުލާފައިވާ މީހުން
މާލެއާއި ހުޅުމާލޭގައި ފުލުހުން ހިންގި ޑްރަގް އޮޕަރޭޝަނެއްގައި އަތުލައިގަތް 119 ކިލޯގެ މަސްތުވާތަކެތީގެ މައްސަލައިގައި ދައުލަތުން ހުށަހަޅާފައިވާ ހެކިންގެ ތެރެއިން, މަސްތުވާތަކެތި ފެނުނު ސައިކަލު ޒުބައިރަށް ވިއްކި މީހާގެ ހެކިބަހާއި ފުލުހުންގެ އިތުރު އޮފިސަރުންގެ ހެކިބަސް ނަގައިފިއެވެ.
ބުރާސްފަތި ދުވަހު ކްރިމިނަލް ކޯޓުގައި ބޭއްވި އަޑުއެހުމުގައި ވަނީ މި މައްސަލައިގައި ދައުލަތުން ހުށަހަޅާފައިވާ ހެކިންގެ ތެރެއިން 4 ހެއްކެއްގެ ހެކިބަސް ނަގާފައެވެ. އެގޮތުން ދައުލަތުން ދައުވާ ސާބިތުކުރުމަށް ހުށަހަޅާފައިވާ ސީން އޮފް ކްރައިމް ރިޕޯޓް ތައްޔާރުކުރި އޮފިސަރ، ސަރޖަންޓް އަޒްހަދު ހަސަން މަނިކް ވިދާޅުވީ ބުރުޒުމަގާއި މާފަތްތަކުރުފާނު މަގު ހަތަރު އަނގޮޅި ކަންމަތީގައި އިން ފިހާރަކަ ކައިރީގައި އޮތް ޓްކްސީގައި އިން ޑްރައިވަރާއި އޭގައި ތިބި ދެމީހުން ބަލާ ފާސްކުރަން އެންގި ކަމަށެވެ. އަދި ސީންއަށް ގޮސް ޑީއެންއޭ އެވިޑެންސް ނަގާފައިވާނެ ކަމަށެވެ. އޭނާ ވިދާޅުވީ މަސްތުވާތަކެތި ފެނުނު ކާރު ދޮރުގެ ބޭރުން 2 އެވިޑެންސް އަދި ޑިކީގައި އިން ފޮށި އަދި ދަބަހުން ޑީއެންއޭ ނަގާފައިވާނެ ކަމަށެވެ.
ހެކިވެރިޔާގެ ހެކިބަހާއި ގުޅިގެން ގާޒީ ވަނީ ސުވާލެއް ކުރައްވާފައެވެ. އެގޮތުން ސީންގެ މަސައްކަތް ނިންމަފައިވަނީ 21:15 ގައި އަދި މާލެ އައިސްފައިވަނީ 21:30 އެއީ ކިހިނެއްވާ ކަމެއްތޯ މާލެއިން ބޭރުގައިތޯ މިކަމެއްވީ ގާޒީ ސުވާލުކުރެއްވިއެވެ. އަދި ޖަވާބުގައި ހެކިވެރިޔާ ބުނެފައިވަނީ އެއީ އިދާރީ އޮޅުމެއް ކަމަށާއި، އޮޅިގެން މާލެ އާދެވުނުކަމަށް ޖެހުނީ ކަމަށެވެ.
ދެވަނަ ހެކިވެރިޔާގެ ގޮތުގައި ހާޒިރުކުރެވިފައިވަނީ ސީނިއަރ ސަރޖެންޓް އައިމިނަތު ލީޒާއެވެ. ސޯކޯ ރިޕޯޓް ތައްޔާރުކުރީ އޭނާއެވެ. އަދި ސޯކޯ އޮފިސަރެއްގެ ގޮތުގައި 2009 ވަނަ އަހަރުން ފަށައިގެން މަސައްކަތް ކުރާ ލީޒާ ވިދާޅުވީ ޑީއީޑީއާއެކު ސީންއަށް ދިއުމަށް އިރުޝާދު ދެވުނު ކަމަށާއި، ދިޔައީ މއ. ކަނޑޫގެއަށް ކަމަށެވެ. ސީންއަށް ދިޔަ އިރު އަލީ ޒުބައިރު އެތަނުގައި ހުރި ކަމަށާއި، އެގޭގެ ފުރަތަމަ ފަންގިފިލާ އަދި ދެވަނަ ފަންގި ފިލާ ޒުބައިރު އަތުގައި އޮތް ތަޅުދަނޑިން ހުޅުވުނު ކަމަށާއި، ކޮޓަރިން ފެނުނު ބޯޑިން ފާހެއްގައި ޒުބައިރުގެ ނަން އިން ކަމަށެވެ. އަދި އެ ގެ ކައިރީގައި އިން ސައިކަލެއް ބަލާ ފާސްކޮށްފައިވާ ކަމަށާއި، ސައިކަލު ހުޅުވީ އަލީ ޒުބައިރު އަތުގައި އިން ތަޅުދަނޑިއަކުން ކަމަށެވެ.
ދެން މި މައްސަލައިގައި ހާޒިރުކުރެވުނީ ޑްރަގް ފެނުނު ޓެކްސީ ޑްރައިވަރެވެ. ޓެކްސީ ޑްރައިވަރު ހެކިބަސް ދެމުން ވިދާޅުވީ އެ މައްސަލައާއި ގުޅިގެން ފުލުހަށް ހާޒިރުވެ އެދުވަހު ހަނދާންހުރި ވަރަކަށް ބަޔާން ކިޔައިދީފައިވާނެ ކަމަށެވެ. އަދި ފުލުހުން ކުރި ސުވާލަށް ޖަވާބު ދެއްވި ކަމަށާއި، ދުވަސްވީ މައްސަލައެއް ކަމުން މިހާރު ބައެއް މައުލޫމާތު ހަނދާނުގައި ނެތް ކަމަށެވެ. އޭނާ ބުނީ އެ ދަތުރަކީ އަވަސް ރައިޑް އެޕްލިކޭޝަން މެދުވެރިކޮށް ނެގި ދަތުރެއް ކަމަށާއި، މައުލޫމާތު ހިއްސާކޮށްފައިވާނެ ކަމަށެވެ. އަދި ދަތުރުގެ ރެކޯޑުގެ ސްކްރީންޝޮޓް ވާނީ ދިފައި ކަމަށާއި، ދަތުރު ނަގާފައިވަނީ ހުޅުމާލެއިން މާލެއަށް ކަމަށެވެ. ޓެކްސީ ޑްރައިވަރު ބުނީ ކާރުގައި 1 މީހަކު ދަތުރުކުރި ކަމަށާއި ފައިސާ ދެއްކި ގޮތް ހަނދާނެއް ނެތް ކަމަށެވެ.
ގިނަ ކަންކަން ޑްރައިވަރު ހަނދާނުގެ ނެތްކަމަށް ބުނެފައިވާތީ ދައުލަތުން އެދުނީ ބަޔާން ޓެކްސީޑްރައިވަރަށް ދެއްކުމަށެވެ. ނަމަވެސް ދިފާއުން އުޒުރުވެރިވުމުން، ގާޒީ ވަނީ ބަޔާން ނުދައްކާ އަވަސް ރައިޑްގެ ސްކްރީންޝޮޓް ދައްކާފައެވެ. ހެކިވެރިޔާ ބުނީ އޭގައި އޭނާގެ ސޮއިކޮށްފައިވާ ކަމަށާއި، އެހެންކަމުން އެއީ އެ ސްކްރީންޝޮޓްކަމަށެވެ. ދަތުރު ނެގި ލޯކޭޝަނަކީ މާލެއިން 5:58 ދަތުރު ނިމިފައިވަނީ މާފަންނު ސްޓޭޑިއަމް ބަސް ސްޓޮޕް ބޮޑުތަކުރުފާނު މަގަށް 6:07 ގައި ކަމަށެވެ.
ގާޒީ ވެސް ވަނީ ޑްރައިވަރާއި ސުވާލުކޮށްފައެވެ. އެގޮތުން އަވަސް ރައިޑުން ދަތުރު ނަގާއިރު ނަން އަރާފައި އިނދޭތޯ އަދި މޮބައިލް ނަންބަރު އިނގޭނެތޯވެ. ހެކިވެރިޔާ ބުނީ އެ މައުލޫމާތު އިނގޭނީ ގުޅުމުން ކަމަށެވެ. އަދިބޭނުން ނަމެއް އެޕްގައި ޖެހޭނެ ކަމަށެވެ.
ދެން މި މައްސަލައިގައި ހާޒިރުކުރީ މި މައްސަލައިގައި ދައުވާ އުފުލާފައިވާ ޒުބައިރުއަށް ސައިކު ވިއްކި މީހާއެވެ. އެގޮތުން ސައިކަލު ވިއްކި މީހާ ހެކިބަސް ދެމުން ބުނެފައިވަނީ ވިއްކާލި ސައިކަލަކާއި ގުޅޭގޮތުން ތަހުގީގަށް ބަޔާން ދެއްވާފައިވަނެ ކަމަށާއި، ނަންބަރު ހަނދާނެއް ނެތް ކަމަށެވެ. އަދި އެއީ ދަނބުކުލައިގެ ހޮންޑާ ސައިކަލެއް ކަމަށާއި، ބަޔާނުގައި ސައިކަލުގެ ރަޖިސްޓްރީ ނަންބަރު އިންނާނެ ކަމަށެވެ. ހެކިވެރިޔާ ބުނީ ވިއްކީ ޒުބައިރުއަށް 2020 ވަނަ އަހަރުގެ ކުރީކޮޅުގައި ކަމަށެވެ. އަދި 25000 ރުފިޔާއަށް ވިއްކާލީ އަންހެނުން ބަލިވެގެން ރާއްޖެއިން ބޭރަށް ފުރަންޖެހިގެން ފައިސާ ބޭނުންވެގެން ކަމަށެވެ. އަދި ފައިސާ ހިފައިގެން އައީމަ ވަގުތުން ވިއްކާލީ ކަަމަށާއި،ސައިކަލުގެ ތަޅުދަނޑިއަކީ ރިމޯޓެއް ކަމަށެވެ. އަދި ވިއްކި އިރުގައި އިންނާނީ 1 ރިމޯޓް ކަމަށާއި، ބޭރުން އައި އިރު ޒުބެއިރު އިނީ އެހެން މައްސަލައެއްގައި ބަންދުގައި ކަމުން ރަޖިސްޓްރީ ބަދަލުނުކުރެވުނު ކަމަށެވެ.
މައްސަލަ ބައްލަވާ ގާޒީ ވިދާޅުވީ މައްސަލައާއި ގުޅުންހުރި ހެކިވެރިންގެ ތެރެއިން ބުރާސްފަތި ދުވަހު ހެކި ނަގަން ތިބި އެންމެންގެ ހެކިބަސް ނެގިފައިވާ ކަމަށެވެ. އަދިވެސް މި މައްސަލައިގައި 11 ހެކިންގެ ހެކިބަސް ނަގަން ޖެހޭ ކަމަށެވެ. މީގެ ކުރިންވެސް މި މައްސަލައިގައި 7 ހެކިވެރިންގެ ހެކިބަސް ނަގާފައިވެއެވެ. ގާޒީ ވިދާޅުވީ މައްސަލަ ކުރިއަށް ގެންދަނީ ހެކި ބަސް ނަގަމުން ގޮސް އެކީއެކަށްޗަކަށް ހެކިބަސް ނެގުމަށް ކަމަށާއި، އެގޮތަށް މަސައްކަތް ކުރަމުންދާ ކަމަށެވެ. އަދި ދައުލަތުގެ ބައެއް ހެކިވެރިންގެ ހެކިބަސް ނެގުމުގައި ދަތިތަކެއް އެބަހުރި ކަމަށާއި، މި މަހުގެ 25 ވަނަ ދުވަހު ހެކިބަސް ނެގުން އޮންނާނެ ކަމަށެވެ. އެ ދުވަހު ތިނެއް ނުވަތަ 4 ވަރަކަށް ހެކިންގެ ހެކިބަސް ނަގާނެކަމަށާއި، އެއީ މި މަހުގެ ތެރޭގައި ހެކިބަސް ނެގޭނެ އެންމެ ފަހު ދުވަސް ކަމަށެވެ.
ގާޒީ ވިދާޅުވީ އޭގެ ފަހުން ދެން ހެކި ބަސް ނެގޭނެ ދުވަހެއް ދަންނަވަން އެނގޭނީ އަންނަ މަހުގެ ކޯޓުގެ ޝެޑިއުލް ލިބިގެން ކަމަށެވެ. އަދި ފޯކަސް ކުރައްވަނީ ހުއްޓާ ނުލާ އަޑުއެހުންތައް ކުރިއަށް ގެންދިއުމަށް ކަމުގައވީނަމަވެސް ކޯޓުގެ އިމާރާތުގެ ޖާގައިގެ ދަތިކަމާއި އެހެނިހެން މައްސަލަތައް ވެސް އެބަހުރި ކަމަށެވެ. އަދި ވިސްނުމުގައި ހުންނެވީ ހެކިބަސް އެކުއެކީގައި ގެންގޮސް ނިންމާލުމުން މައްސަލަ ކުރިއަށްގެންދަވަން ފަސޭހަވާނެ ކަމަށެވެ.
