އިންތިޚާބީ ރައީސް ހުވާކުރައްވާ ރަސްމިއްޔާތަށް ބޭރުގެ މީޑިޔާތަކަށް ދައުވަތުދީފި
ހުވާކުރުމުގެ ރަސްމިއްޔާތު އޮންނާނީ ނޮވެމްބަރ މަހުގެ 17ވަނަ ދުވަހު ޖުމްހޫރީ މައިދާނުގައި
އިންތިޚާބީ ރައީސް ޑރ. މުހައްމަދު މުއިއްޒު
އިންތިޚާބީ ރައީސް ޑރ. މުޙައްމަދު މުއިއްޒު ހުވައިކުރެއްވުމުގެ ގޮތުން ބާއްވާ ހަފްލާ ކަވަރު ކުރަން ބޭނުންވާ ރާއްޖެއިން ބޭރުގެ މީޑިއާތަކަށް އެ ކަމުގެ ދައުވަތު ރައްޔިތުންގެ މަޖިލީހުން ފޮނުވައިފިއެވެ.
ހުވާކުރުމުގެ ރަސްމިއްޔާތު އޮންނާނީ ނޮވެމްބަރ މަހުގެ 17ވަނަ ދުވަހު ޖުމްހޫރީ މައިދާނުގައެވެ.
މަޖިލީހުގެ އިދާރާއިން ބުނީ ބައިނަލްއަގްވާމީ މީޑިއާއަކުން މި އިވެންޓް ކަވަރު ކުރުމަށް ރާއްޖެ އަންނަން ބޭނުންވާ ނަމަ އެ ކަމަށް ބޭނުންވާ އެހީތެރިކަން ފޯރުކޮށްދޭނެ ކަމަށެވެ. އެގޮތުން ވިސާއާއި އެހެނިހެން ހުއްދަތައް ހޯދުމާއި، ހުރުމުގެ ކަންކަމަށް ބޭނުންވާ މުހިންމު އިދާރީ ކަންކަން ހަމަޖައްސައިދޭނެ ކަމަށް ބުނެފައިވެއެވެ. ނަމަވެސް ދަތުރުފަތުރުގެ ޚަރަދާއި، ކެއުމާއި، ހުރުމާއި، އެ ނޫން ވެސް ޚަރަދުތައް ހަމަޖައްސަންވާނީ އެ މީޑިއާއަކުން ކަމަށް ބުންޏެވެ.
މަޖިލީހުން ބުނީ އެ ހަފްލާ ކަވަރު ކުރަން ބޭނުންވާ ބޭރުގެ މީޑިއާތަކުން މި މަހުގެ 31ގެ ކުރިން އެ ކަން އެންގުމަށް އެދޭކަމަށެވެ.
ޑރ މުއިއްޒު ވެވަޑައިގަންނަވާނީ ރާއްޖޭގެ އަށް ވަނަ ރައީސުލްޖުމްހޫރިއްޔާއަށެވެ. އަދި ރިޔާސީ އިންތިޚާބުގެ ދެ ބުރު ކާމިޔާބުކުރައްވައިގެން ވެރިކަމާއި ހަވާލުވެވަޑައިގަންނަވާ ފުރަތަމަ ރައީސަށެވެ.
