ރައްޔިތުން މިއަދު މަޑުން ތިބޭ ކަމުގައިވާނަމަ ކަނޑަމުން ކަނޑަމުންގޮސް ސަލާންޖަހަން ޖެހޭ ދަރަޖައަށް ރައްޔިތުންގެ ހާލަތު ގޮސްދާނެ ކަމަށް ރައްޔިތުންގެ މަޖިލީހުގެ މެދުހެންވޭރު ދާއިރާގެ މެންބަރު އަލީ އާޒިމު ވިދާޅުވެއްޖެ އެވެ.

ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުން، މެންބަރު އަލީ އާޒިމް ވިދާޅުވީ، މިއަދު މިފެންނަ މަންޒަރުތަކުން ފެނިގެންދަނީ، ރައްޔިތުންނަށް، ލިބިދޭންޖެހޭ ބައެއް ހިދުމަތްތަކުގެ އަގު ބޮޑު ކޮށް، ބައެއް ކަހަލަ އިނާޔަތްތައް އުނިކުރާ މަންޒަރު ކަމަށެވެ. އެގޮތުން ކަރަންޓް ސަބްސިޑީ ކަނޑާލުމާއި، ކާޑުގެ ބާވަތްތަކުގެ ސަބްސިޑީ ކަނޑާލުން ހިމެނޭ ކަމަށް އޭނާ ވިދާޅުވި އެވެ.

 މިކަން ކަމާ ބަސް ނުބުނާ ކަމުގައިވާ ނަމަ، މިހާރު ލިބޭ،އައިޑީ ކާޑަށް ބޭސްލިބުންވެސް ހުއްޓިގެން ގޮސް ރައްޔިތުން ސަލާންޖަހާ ހިސާބަށް ކަންކަން ގޮސްދާނެ ކަމަށް އޭނާ ވިދާޅުވި އެވެ.

'' މި ގައުމު މިދަނީ ނުބައި މިސްރާބަކަށް. މިކަންކަމުން ސަލާމަތްވުމަށް ބަސްބުނަން ޖެހޭ. ސަރުކާރަށް އަޑުއިއްވާލަންޖެހޭ. ގާނޫނު އަސާސީއާ ހިލާފަށް ސަރުކާރު ވައްޓާލުމަށް ވިސްނުމުގައެއް ނޫން. އެކަމަކު މިކުރާ ކަންްކަމުގެ އަޑު އުފުލަންޖެހޭ." އާޒިމް ވިދާޅުވި އެވެ.

ރަައްޔިތުންނަށް މިސަރުކާރަށް ތާއީދު ނުކުރާކަންވެސް ހާމަކުރެވޭނެ ފުރުސަތު ނެތް ކަމަށާއި އެހެން ނަމަވެސް މިދިޔަ ލޯކަލް ކައުންސިލް އިންތިހާބުގެ ވޯޓުންވެސް ރައްޔިތުން ސަރުކާރާމެދު ދެކޭ ގޮތް ވަރަށް ސާފުވެގެންދިޔަ ކަމަށް އޭނާ ވިދާޅުވި އެވެ.

އެހެން ނަމަވެސް އެކަން ވެސް ސަރުކާރަށް ގަބޫލެއް ނުކުރެވުނު ކަމަށް އޭނާ ވިދާޅުވި އެވެ. އާޒިމު ވިދާޅުވީ، މިއަދު ރައްޔިތުންގެ އެތައް ހައްގެއް ނިގުޅައިގަނެފައިވާ މަންޒަރު ފެންނަ ކަމަށެވެ.

އާޒިމް ވިދާޅުވީ ގައުމެއް ކުރިއަރައިގެންދާނީ މިނިވަންކަމާއެކު ހިޔާލުފާޅު ކުރުމުގެ ފުރުސަތު ލިބިގެން ކަމަށާއި  މިނިވަންކަމާއެކު ހިޔާލުފާޅު ކުރުމަކީ ދައުލަތުގެ ހުއްދައެއް ލިބުމަކާ ނުލައި ކޮންމެ ރައްޔިތަކަށްވެސް ލިބިގެންވާ ހައްގެއް ކަަމަށެެވެ. އެހެން ނަމަވެސް އެމަންޒަރު ނުފެންނަ ކަމަށް އޭނާ ވިދާޅުވި އެވެ.

 މިއަދު ރައްޔިތުން މަޑުން ނުތިބެ ނުކުންނަން ޖެހޭ ކަމަށާއި 24 ވަނަ ދުވަހު ބާއްވާ އެއްވުމުގައިވެސް ރާއްޖޭގެ އެކި ހިސާބުތަކުން ރައްޔިތުން އެއްވާން ޖެހެނީ މި ސަބަބު ތަކަށްޓަކާ ކަަމަށް އޭނާ ވިދާޅުވި އެވެ.

އާޒިމް ވިދާޅުވީ، ރާއްޖޭގެ ހާލަތު ފެންނަނީ ހުދުމުހުތާރު ވެރިކަމެއް ހިންގުމާ ދިމާލަށްދާ  މަންޒަރު ކަމަށާއި، އެކަމަށްޓަކައި ސަރުކާރުން ރައްޔިތުން ނިކަމެތި ކުރަމުންގެންދާ ކަމަށެވެ.

ރައީސް ޔާމީނަކީ ހުދުމުހުތާރު ވެރިއެއް ކަމަށް ބުނެ މިސާލު ޖައްސަވަމުން އާޒިމް ވިދާޅުވީ، މިއަދު ރައީސް ޔާމީނަށް ނޫނެކޭ ބުނަން ކެރޭވަރުގެ މިނިސްޓަރެއް ނެތް ކަމަށާއި ކަމެއް ގޯސްކޮށް ހިނގާ އިރު އެކަމުގެ ވާހަކަދައްކަން ކެރޭ ވަރުގެ ގާތް ބޭފުޅެއްވެސް ނެތް ކަމަށެވެ. މިއަދު ރާއްޖެއިން ފެންނަނީ އެކަމުގެ ނަތީޖާ ކަމަށް އޭނާ ވިދާޅުވި އެވެ.

" ކެބިނެޓްގެ ތެރޭގައިވެސް ނެތް ރައީސް ޔާމީނާއި ދެކޮޅަށް ބަހެއް ބުނަންކެރޭ އެއްވެސް މީހަކު ނެތް. ރައްޔިތުންގެ މަޖިލީހުގެ މެންބަރުންނަށް އެއްޗެއް ބުނަން ކެރެނީކީ ނޫން. ސްޓޭޓް މިނިސްޓަރަކަށް ކެރެނީކީ ނޫން. ހަމަޔަގީނުންވެސް ސަރުކާރުގެ ތެރެއިން ގޯސްކޮށް ކަންކަން ހިނގާ. އެކަމަކު އެވާހަކަ ދައްކާނެ މީހެއް ނެތް. ނިކަން ބައްލަވާ އެންމެ އަރިހުގައި ތިބި ސިޔާސީ ލަފާ ދެއްވަން ތިބޭ މީހުން. އެދެ ބޭފުޅުންނަކީ އަނިލް އާއި އާޒިމާ ޝަކޫރު.  އާޒިމާ ޝަކޫރަކީ އަޅުގަނޑުމެން ގަބޫލު ކުރަންވާނެ މިރާއްޖެއަށް އެންމެ ބޮޑު ހިޔާނާތްވެފައިވާ ފަރާތް. ޖީއެމްއާރް މައްސަލައިގައި އެގްރީމެންޓް އުވާލައިގެން ރާއްޖެއަށް ގެއްލުމެއް ނުވާނެއޭ. އުފެދުމުގައިވެސް ބާތިލް އެގްރީމެންޓެކޭ ކިޔަވާފަ ވަނީ. އޭގެ ނަތީޖާއަކަށްވީ ކިތަށް މިލިއަން ޑޮލަރުތޯ ދިވެހި ސަރުކާރުން ދައްކަންޖެހުނީ." އާޒިމް ވިދާޅުވި އެވެ.