ކޮޕާ އެމެރިކާ އަށް ފަހު ޑި މާރިއާ ޤައުމީ ޓީމަށް ކުޅުން ހުއްޓާލަނީ

އަންނަ އަހަރު އޮންނަ ކޮޕާ އެމެރިކާ ފުޓުބޯޅަ މުބާރާތަށް ފަހު، ޤައުމީ ޓީމަށް ކުޅުން ހުއްޓާލާނެ ކަމަށް އާޖެންޓީނާގެ އެންހެލް ޑި މާރިއާ ބުނެފި އެވެ.

ޑި މާރިއާ މިހެން ބުނީ އާޖެންޓީނާގެ މީޑިއާ އަކަށް އޭނާ ދިން އިންޓަވިޔުއެއްގަ އެވެ. އުމުރުން 35 އަހަރުގެ ކުޅުންތެރިޔާ ބުނީ، ކޮޕާ އެމެރިކާ ފުޓުބޯޅަ މުބާރާތަށް ފަހު ޤައުމީ ޓީމަށް ކުޅެން ހުއްޓާލަން ނިންމާފައިވާ ކަމަށެވެ. އެގޮތުން އެއީ މިހާރު އޭނާގެ ފައިނަލް ނިންމުމެއް ކަމަށާއި، އެ ނިންމުމަށް ދެން އިތުރު ބަދަލެއް ނާންނާނެ ކަމަށް ވެސް ޑި މާރިއާ ވަނީ ބުނެފަ އެވެ. އެކަން ފާހަގަކޮށް ޑި މާރިއާ ބުނީ، އާޖެންޓީނާގައި އެ ޓީމުގެ ކެޕްޓަން ލިއޮނަލް މެސީ އާއެކު ކުޅުމުގެ ފުރުސަތު ލިބުމަކީ އަބަދު ވެސް އޭނާ އުފާ ކުރާނެ ކަމެއް ކަމަށެވެ. އެގޮތުން މެސީ އާއެކު ފްރާންސްގެ ޕެރިސް ސެއިންޓް ޖާމަން (ޕީއެސްޖީ) ގައި ކުޅުމުގެ ފުރުސަތު ލިބުނު ކަމަށްޓަކައި، އެކަމާ ވެސް އުފާވާ ކަމަށް ޑި މާރިއާ ވަނީ ބުނެފަ އެވެ. އޭނާ ބުނި ގޮތުގައި މެސީއާ އެއް ކުލަބަކަށް ކުޅުމަކީ އަބަދު ވެސް އޭނާ ބޭނުންވި ކަމެކެވެ.

ޑި މާރިއާ އަށް އާޖެންޓީނާ ޤައުމީ ޓީމުން ޖާގަ ލިބުނީ 2008 ވަނަ އަހަރު އެވެ. އޭގެ ފަހުން މިހާތަނަށް އޭނާ ވަނީ އާޖެންޓީނާ އަށް ކުޅެދިން 134 މެޗުގައި 29 ލަނޑު ޖަހައިފަ އެވެ. އާޖެންޓީނާ އާއެކު އޭނާ ވަނީ 2021 ވަނަ އަހަރުގެ ކޮޕާ އެމެރިކާ ފުޓުބޯޅަ މުބާރާތް، މިދިޔަ އަހަރުގެ ފައިނަލިސިމާ އަދި މިިދިޔަ އަހަރު ޤަތަރުގައި ކުރިއަށް ދިޔަ ފީފާ ވޯލްޑް ކަޕް ކާމިޔާބުކޮށްފަ އެވެ. އާޖެންޓީނާ އިން މި ތިން ތަށި ކާމިޔާބު ކުރުމުގައި ވެސް ޑި މާރިއާ ވަނީ މުހިންމު ދައުރެއް އަދާކޮށްފަ އެވެ. އެގޮތުން މިދިޔަ އަހަރު ކުރިއަށް ދިޔަ ވޯލްޑް ކަޕްގެ ފައިނަލްގައި އޭނާ ވަނީ ފްރާންސް ކޮޅަށް ލަނޑު ވެސް ޖަހައިފަ އެވެ. 2021 ވަނަ އަހަރުގެ ކޮޕާ އެމެރިކާގެ ތަށި އާޖެންޓީނާ އިން އުފުލާލީ ފައިނަލްގައި ބްރެޒިލް ކޮޅަށް ޑި މާރިއާ ޖެހި ލަނޑުންނެވެ.

އަންނަ އަހަރުގެ ކޮޕާ އެމެރިކާ މުބާރާތް ބޭއްވުމަށް ހަމަޖެހިފައި ވަނީ އެމެރިކާގަ އެވެ. މުބާރާތް ކުރިއަށް ގެންދަން ތާވަލް ކޮށްފައި ވަނީ އަންނަ އަހަރުގެ ޖޫން މަހުގެ 20 ވަނަ ދުވަހުން ޖުލައި މަހުގެ 24 ވަނަ ދުވަހަށެވެ.