ބާސެލޯނާ އިން ބޭނުންވަނީ ދިގު މުއްދަތަކަށް ޑި ޔޯން ކުލަބުގައި ބަހައްޓަން

ސްޕެއިންގެ ބާސެލޯނާ އިން ބޭނުންވަނީ އެ ކުލަަބަށް ކުޅެމުން އަންނަ ނެދަލެންޑްސްގެ މިޑްފީލްޑަރު ފްރެންކީ ޑި ޔޯން ދިގު މުއްދަތަކަށް ބަހައްޓަން ކަމަށް، އެ ކުލަބުން ހާމަކޮށްފި އެވެ.

އަޔެކްސް ދޫކޮށް އޭނާ ބާސެލޯނާ އަށް ބަދަލުވީ 2019 ވަނަ އަހަރު އެވެ. ބާސެލޯނާ އާއެކު މިހާރު ޑި ޔޯން ސޮއި ކޮށްފައިވާ އެއްބަސްވުމުގެ މުއްދަތު ހަމަވާނީ 2026 ވަނަ އަހަރުގެ ޖޫން މަހުގެ ނިިޔަލަށެވެ. ނަމަވެސް، އޭނާ އަކީ ބާސެލޯނާ އިން އެއްވެސް ގޮތަކަށް ދޫކޮށްލަން ބޭނުންވާ ކުޅުންތެރިޔެއް ނޫން ކަމަށް އެ ޓީމުގެ ކޯޗު ޒަވީ ހެނާންޑޭޒް ވަނީ އެކި ފަހަރު މަތިން ބުނެފަ އެވެ.

ބާސެލޯނާގެ ޑިރެކްޓަރު ޑެކޯ ވިދާޅުވީ، އޭނާ އަށް ފެންނަނީ ޑި ޔޯން ބާސެލޯނާގައި އުފަލުން ހުރެ، ފުޓުބޯޅައިގެ އުފާ ލިބިގަންނަމުން އަންނަ ތަން ކަމަށެވެ. ޚާއްސަކޮށް އޭނާ އަކީ މަތީ ފަންތީގައި އެންމެ ރަނގަޅަށް ފުޓުބޯޅަ ކުޅެވޭނެ ކުޅުންތެރިޔެއްކަން ސާބިތުކޮށްދެމުން އަންނަ ކަމަށާއި، އޭނާ އަކީ ބަރޯސާވެވޭ ކުޅުންތެރިޔެއް ކަމަށް ވެސް ޑެކޯ ވަނީ ވިދާޅުވެފަ އެވެ. އިތުރަށް ޑެކޯ ވިދާޅުވީ، މިހާރު ބާސެލޯނާ އާއެކު ޑި ޔޯން ހަދާފައިވާ އެއްބަސްވުން ހަމަވާނީ މީގެ ތިން އަހަރު ފަހުން ކަމަށެވެ. ނަމަވެސް މިހާރު ބާސެލޯނާގެ ވިސްނުން ހުރީ ދިގު މުއްދަތަކަށް ޑި ޔޯން ކުލަބުގައި ބަހައްޓަން ކަމަށް އޭނާ ވިދާޅުވި އެވެ. އެހެންކަމުން، އެންމެ ބޮޑަށް މަސައްކަތް ކުރާނީ އަންނަ އަހަރުގެ ފަހު ކޮޅު ނަމަވެސް، އޭނާގެ އެއްބަސްވުން އައު ކުރުމަށް ކަމަށް އޭނާ ވިދާޅުވި އެވެ.

ޑި ޔޯން ވަނީ މިހާތަނަށް ބާސެލޯނާ އަށް ކުޅެދިން 190 މެޗުން 16 ލަނޑު ޖަހައިފަ އެވެ. އެ ކުލަބާއެކު އޭނާ ވަނީ ސްޕެނިޝް ލީގު، ކޮޕާ ޑެލް ރޭ އަދި ސްޕެނިޝް ސުޕަ ކަޕެއް ކާމިޔާބުކޮށްފަ އެވެ. ބާސެލޯނާގެ ކުރީގެ ކެޕްޓަން ސާޖިއޯ ބުސްކެޓްސް މިއަހަރު ކުލަބު ދޫކޮށްލުމާއެކު، ޑި ޔޯން އަށް ވަނީ ބާސެލޯނާގެ ހަތަރު ވަނަ ކެޕްޓަންކަން ވެސް ލިބިފަ އެވެ.