އެކަކު އަނެކަކަށްޓަކައި ޣައްޒާގެ ރަށްވެހިން ވަމުންދާ މަތިވެރި ގުރުބާނީއަށްޓަކައި ސެލިއުޓް!

ޔަހޫދީ އިޒްރޭލުގެ އަނިޔާވެރިކަމުގައި ކަސްތޮޅު އެޅި، ދިރިއުޅުމުގެ ކޮންމެ ސިކުންތަކީވެސް ފުރާނަ އަތްމައްޗަށް ލައިގެން ތިބެންޖެހޭ ވަގުތަކަށް ވެފައި އޮތް ޣައްޒާއަކީ ތަފާތު މަންޒިލެކޭ ބުނެވެނީ ސަބަބުތަކެއް ނެތިއެއް ނޫނެވެ. ޣައްޒާ ކޮންޓްރޯލް ކުރަމުން ދާ ހަމާސް ޖަމާއަތުން ދިން ޙަމަލާއެއްގެ ރައްދުގައި ކަމަށް ބުނެ، އިޒްރޭލުގެ ރަހުމެއް ނެތް އަސްކަރީ ފައުޖުތަކުން ޣައްޒާ ހަފުސްކޮށް، ނަސްލު ދޮވެލުމުގެ ގަތުލުއާންމު ހިންގަމުން ދާއިރުވެސް، ޣައްޒާގެ ރަށްވެހިންގެ ފަރާތުން ފެނިގެންދަނީ އެއްބައެއްވަންތަކަމާއި އުޚުވަތްތެރިކަމުގެ ރީތި މިސާލުތަކެވެ. ޣައްޒާގެ އުތުރުގެ ސަރަހައްދުން މިލިއަނަކަށްވުރެ ގިނަ މީހުން ފޭބުމަށް އިޒްރޭލުން އިންޒާރުކޮށްފައި ވާއިރު، ދެކުނަށް މިސްރާބު ޖަހާފައިވާ އަޚުންނާއި އުޚުތުންނަށްޓަކައި ޣައްޒާގެ ދެކުނު އޮތީ ކޮންމެ ފަދަ ގުރުބާނީއެއްވެސް ވާން ތައްޔާރަށެވެ.

މި ދެންނެވިފަދަ ރީތި މިސާލެއް ފެނިގެންދާ އެއް ސިޓީއަކީ ޚާން ޔޫނިސްއެވެ. 3 ލައްކައަށްވުރެ ގިނަ މީހުންގެ އާބާދީއެއް އޮތް ޚާން ޔޫނިސްގެ ރަށްވެހިން ތިބީ، އުތުރުން އަންނަ އެމީހުންގެ އަޚުންނާއި އުޚުތުންނަށް މަރުހަބާ ކިޔަން ތައްޔާރަށެވެ. އަމަލީގޮތުން އެކަން ސާބިތުވެސް ކޮށްދެއެވެ. ޣައްޒާގެ އުތުރުގެ ސަރަހައްދުތަކުން ގެދޮރު ގެއްލިފައިވާ އެތައް ބައެއްގެ ކެއިންބުއިމުގެ އިންތިޒާމުތައް ހަމަޖައްސައިދިނުމަށް، ޚާން ޔޫނިސްގެ ރަށްވެހިން ތެދުވީ އަމިއްލައަށެވެ. ދަރުމަވެރިންގެ ގޮތުގައެވެ.

ޔަހޫދީ ބާރުތަކުން ޣައްޒާގެ އަސާސީ ޚިދުމަތްތައްވެސް މެދުކަނޑާލާފައި ވާއިރު، އުތުރުގެ އަޚުންނާ އުޚުތުންނަށް ކެއިންބުއިމުގެ ކަންކަން ހަމަޖައްސައިދިނުމަށް ޚާން ޔޫނިސްގެ ދަރުމަވެރިން މަސައްކަތް ކުރަމުންދަނީ ލޯބޯ ފިއްސައިގެންނެވެ. އެއްގަމު މަހާއި، ބަތާއި، ސަނާމުގު ލޯގަނޑުތައް ކައްކަނީ ދަރު ޖައްސައިގެންނެވެ. އަރާމު ބަދިގެއެއްގައެއް ނޫނެވެ. މަގުގެ އެއްފަރާތެއްގައެވެ. ޚާން ޔޫނިސްއިން ވެސް ގޭސް ވަނީ ހުސްވެފައެވެ. އެ ހާލުގައިވެސް އަނެކާއަށް އެހީގެ އަތެއް ދިއްކޮށްލުމަށް ޚާން ޔޫނިސްގެ ރަށްވެހިން ތިބީ ހޭވައްލާ ތައްޔާރަށެވެ.

ހާލުގައިޖެހިފައިވާ މީހުންގެ ކެއިންބުއިމުގެ ކަންކަން ހަމަޖައްސައިދިނުމަށް ޚާން ޔޫނިސްގައި ހިންގާ ހަރަކާތުގެ ކަންކަން ބެލެހެއްޓުމުގައި އެންމެ އިސްކޮށް ހުރި މީހަކީ އިބްރާހީމް އަބޫ އާސީއެވެ. ޚުދު އޭނާއަކީވެސް ގެދޮރު ގެއްލިފައިވާ މީހެކެވެ. އަބޫ އާސީ ކިޔައިދިން ގޮތުގައި، އޭނާއާ ވާހަކަދެއްކި އެތައް ބަޔަކު، ބަނޑަށް އެއްޗެއް ނުލާތާ 4 ދުވަސް ވެއްޖެއެވެ.

ހުރިހާ ކޮޅަކުން ޣައްޒާ ބަންދުކޮށްފައި އޮންނަތާ 17 ވަރަކަށް އަހަރު ފާއިތުވެގެން ދާއިރު، މިހާރު ޣައްޒާއާ ދެކޮޅަށް އިޒްރޭލުން ދެމުންދާ އުދުވާނީ ހަމަލާތަކަކީ، އިންސާނިއްޔަތު ކަމުގެ ޒައްރެއްގެ މިންވަރު ހުރި މީހަކަށް ކަމެއް ނުކޮށް ބަލަން ހުއްޓިލައިގެން ހުރެވޭނެ ވަރުގެ ހަމަލާތަކެއް ނޫނެވެ.

އޮކްޓޯބަރ 15 ވީ އާދީއްތަ ދުވަހު، ފަލަސްތީނުގެ ސިއްހަތާބެހޭ ވުޒާރާއިން ހާމަކުރިގޮތުގައި، އޭގެ ކުރިއަށް، ފާއިތުވި 24 ގަޑިއިރުގެ ތެރޭގައި އެކަނިވެސް ޣައްޒާއިން 300 މީހަކު ވަނީ ޝަހީދު ކޮށްލާފައެވެ. އޭގެ ތެރޭގައިވެސް ގިނައީ އަންހެނުންނާއި ކުޑަކުދިންނެވެ. 2.3 މިލިއަން މީހުންގެ އާބާދީއެއް ދިރިއުޅެމުންދާ ޣައްޒާއަށް އަމާޒުކޮށް އިޒްރޭލުން ދެމުން ދާ ވަރުގަދަ ހަމަލާތައް ހުއްޓުވުމަށް، ބައިނަލްއަގުވާމީ ބޮޑެތި ބާރުތަކުން އަމަލީ ސިފައެއްގައި އެއްވެސް މަސައްކަތެއް ކުރާތީއެއް ނުފެނެއެވެ. އޭގެ ބަދަލުގައި މުޅިންވެސް ފެންނަނީ، ފަލަސްތީނުގެ ބިންތައް ފޭރިގަނެގެން އުޅޭ ޔަހޫދީންގެ ދިފާއުގައި ތެދުވެ، ކޮންމެ ފަދަ ވަގުތެއްގައިވެސް ވަރުގަދަ ހަމަލާތަކެއް ދިނުމަށް ތައްޔާރުވަމުންދާ މަންޒަރެވެ.