ޣައްޒާގެ ނާމާން މަޞްރަހުން މަންޒަރުތައް ތިލަކޮށްދެމުން ދިޔަ ނޫސްވެރިޔާއާއި ބައްދަލުވި އާދަޔާ ޚިލާފު ބަޠަލު...

"ދަރިފުޅާ، ނިކަން އަޅެ އަޑެއް ލައްވާލަބަލަ، ދަރިފުޅުގެ ބައްޕަ މި ހުރީ އައިހޭ"... މިއީ ޔަހޫދީ އިޒްރޭލުގެ ޢުދުވާނީ ޙަމަލާތައް ކެނޑިނޭޅި އަމާޒު ވަމުން ދާ ފަލަސްޠީނުގެ ޣައްޒާގައި ބައިނަލްއަޤުވާމީ މީޑިއާއަށް ޚަބަރުތައް ކަވަރުކޮށްދެމުން ދާ ހިތްވަރު ގަދަ ނޫސްވެރިޔާ، މުޙައްމަދު ސަލީމު، އޭނާއަށް އަލަށް ލިބުނު ތުއްތު ދަރިފުޅަށް، މި ދުނިޔެއަށް މަރުޙަބާ ކިޔާލި ގޮތެވެ.

އޮކްޓޯބަރު 12 ވަނަ ދުވަހު ދަރިފުޅު އުފަންވީއިރުވެސް، އިޒްރޭލުގެ ޙަމަލާތައް ޣައްޒާއަށް ދިޔައީ އަމާޒު ވަމުންނެވެ. ސަލީމު އޭރުވެސް، އަވަދިނެތި އުޅެމުން ދިޔައީ ޣައްޒާގެ ޚަބަރުތައް ދުނިޔެއަށް ތިލަކޮށްދެވޭތޯއެވެ.

ކުޑަ ކުއްޖެއް، ބޮޑު މީހެއް ބެލުމެއް ނެތި ޔަހޫދީން ދެމުން ދިޔަ ލާއިންސާނީ ޙަމަލާތަކާއި، ޙަމަލާތަކަށް ފަހު ޣައްޒާއަށް ވެގެންދާ ގޮތުގެ އިތުރުން، އެ ޙަމަލާތަކުގައި މަރުވެދާ މީހުންގެ ޚަބަރުތައް ކަވަރު ކުރަމުން ގޮސް، އަލް ސަހާބާ ހޮސްޕިޓަލުގެ މާބަނޑު މީހުންގެ ވޯޑަށް ސަލީމު ގޮސް ވަނެވެ. އެއް އަތުން ދަރިފުޅު ޢަބްދުﷲ އުރާލައިގެން ހުރެ، ސަލީމު ދިޔައީ އަނެއް އަތުން ވީޑިއޯ ކުރަމުންނެވެ. ޢުމުރުން 39 އަހަރުގެ ސަލީމުއަކީ މިއަދު 5 ދަރިންގެ ބައްޕައެކެވެ.

ޢަބްދުﷲ އަކީ ބުރާސްފަތި ދުވަހު ޣައްޒާއަށް އުފަންވި ހަމަ އެކަނި ކުއްޖާއެއް ނޫނެވެ. ޢަބްދުﷲވެސް އުފަންވި ވޯޑަށް، ލާރާވެސް ފުރަތަމަ ނޭވާ ލީ ހަމަ އެ ދުވަހުއެވެ. ލާރާގެ މަންމަ، ޖަމީލާ ޢަބްދު ރައްބޫ ބުނި ގޮތުގައި، ވިހަން ހޮސްޕިޓަލަށް ކުރި ދަތުރަކީ، އޭނާގެ ފުރާނަ އަތް މައްޗަށް ލައިގެން ކުރި، ބިރުވެރި، ނާމާން ދަތުރެކެވެ.

މުސްލިމުންގެ ބިންތަކަށް ގަދަ ބާރުން ވެރިވެގަނެގެން އުޅޭ ޔަހޫދީ އިޒްރޭލުން ވަނީ، ޣައްޒާ ކޮންޓްރޯލް ކުރަމުން ދާ ހަމާސް ޖަމާޢަތުގެ ވަސްވެސް މި ބިންތަމތިން ފޮހެލާނެ ކަމަށް ވަޢުދުވެފައެވެ. އުޒުރެއް ކަމުގައި ދައްކަނީ، އޮކްޓޯބަރު 7 ވަނަ ދުވަހު، ހަމާސްގެ ހަނގުރާމަވެރިން އިޒްރޭލަށް އަރާ، ހަމަލާތަކެއް ދިން ދިނުމެވެ. އިޒްރޭލުން ބުނާ ގޮތުގައި އެއީ އިޒްރޭލުގެ ތާރީޚުގައިވެސް، އާންމު ރައްޔިތުންނަށް އަމާޒުކޮށްގެން ބަޔަކު ދިން އެންމެ ގެއްލުން ދެނިވި ޙަމަލާތަކެވެ.

ބަދަލު ހިފުމުގެ ގޮތުން ކަމަށް ބުނެ އިޒްރޭލުން ތެދުވެ، 2.3 މިލިއަން މީހުންގެ އާބާދީއެއް އޮތް ޣައްޒާ އެކީ އެކައްޗަކަށް ބައްދާ، ވަށާލިއެވެ. އެއްގަމާއި ކަނޑާއި ވައިގެ މަގުންވެސްމެއެވެ. 75 އަހަރަށް ދިގުލައިގެން ގޮސްފައި ވާ އިޒްރޭލު-ޕަލަސްޠީނު މައްސަލައިގެ ތާރީޚުގައިވެސް އިޒްރޭލުން މިހާރު ދެމުންދާ ޙަމަލާތަކާ އެއްވަރުގެ ޙަމަލާތަކެއް ދީފައި ނުވާ ކަމަށް ޚަބަރު ލިބެއެވެ.

ޣައްޒާގެ އަވަށްތައް މިހާރު ވަނީ މުޅިންހެން ބިމާ ހަމަކޮށްލާފައެވެ. އިޒްރޭލުގެ ޙަމަލާތަކަށް 7 ދުވަސް ވީ އިރު، ޣައްޒާއިން މަރުވި މީހުންގެ ޢަދަދު 1200 އަށް ވުރެ މައްޗަށް ވަނީ އަރާފައެވެ. އޭގެ ތެރޭގައި އެތައް ސަތޭކަ ކުޑަ ކުދިންނެއް ހިމެނެއެވެ. އިންސާނަކު ދިރިހުރުމަށްޓަކައި ބޭނުން ވާ އެންމެ ޛަރޫރީ އަދި އަސާސީ ޚިދުމަތްތައްވެސް މިއަދު ޣައްޒާގައި ލިބޭކަށް ނެތެވެ. މުޅި ސިޓީ އޮތީ އިންސާނީ ކާރިޘީ އަނދަވަޅަކަށް ވެއްޓި، ބައިނަލްއަޤުވާމީ އެހީތެރިކަމަށް އިންތިހާއަށް ބޭނުން ޖެހިފައެވެ.