މާދަމާއިން ފެށިގެން އިންޒާރުގެ މެސެޖް ފޮނުވަނީ، އެއީ އަދި ޖޫރިމަނާއެއް ނޫން

އާދިއްތަ ދުވަހުން ފެށިގެން އިންޒާރުގެ މެސެޖް ފޮނުވި ނަމަވެސް އެއީ އަދި ޖޫރިމަނާއެއް ނޫންކަމަށް ފުލުހުން ބުނެފިއެވެ.

ރާއްޖެޓީވީގެ 'ފަސްކާފު' ޕްރޮގްރާމްގައި ވާހަކަފުޅުދައްކަވަމުން ޗީފް އިންސްޕެކްޓަރ މުހައްމަދު ލުޠުފީ ވިދާޅުވީ، ސިނަމާލެ ބްރިޖްގައި ވެހިކަލް ބާރަށް ދުއްވާ އަދި ލޭނު ބަދަލުކުރާ ފަރާތްތަކަށް އާދިއްތަ ދުވަހުން ފެށިގެން ނަސޭހަތުގެ މެސެޖެއް ފޮނުވާނެކަމަށެވެ.

ވެހިކަލް ދުއްވި ބާރުމިން އަދި ލޭން ބަދަލުކުރިކަން ދެނެގަންނާނީ ސިނަމާލެ ބްރިޖުގައި ހަރުކޮށްފައިވާ ސްޕީޑް ބަލާ ކެމޭރާތައް މެދުވެރިކޮށް ކަމަށް ޗީފް އިންސްޕެކްޓަރ މުހައްމަދު ލުޠުފީ ވަނީ ފާހަގަކުރައްވާފައެވެ.

މީގެއިތުރުން މެންދުރު ގަޑީގައިވެސް ފުދޭވަރަކަށް ބާރަށް ވެހިކަލްތައް ދަތުރުކުރާކަން ލުޠުފީ ފާހަގަކުރެއްވިއެވެ. އެހެންކަމުން، މެނުއަލްކޮށް ސްޕީޑް ގަން ބަހައްޓައިގެން ސްޕީޑް ލިމިޓް ކުރުމަށްޓަކައި ދުއްވާފައި އަންނަ އުޅަނދު ކެޕްޗަރ ކުރަމުންދާކަމަށް އޭނާ ފާހަގަކުރެއްވިއެވެ.

ފުލުހުން ކުރި ޓުވީޓާއި ގުޅިގެން ވެހިކަލްތައް ވަރަށް ބޮޑަށް ސްޕީޑް މަޑުކުރިކަމަށް ލުޠުފީ ފާހަގަކުރެއްވިއެވެ. މިކަމުގެ ސަބަބުން ބްރިޖް އެއްކޮށް ކަހަލަ ގޮތަކަށް ބްލޮކްވާކަމަށް ލުޠުފީ ފާހަގަކުރެއްވިއެވެ.

ބްރިޖް އަދި ހައިވޭ އެކްސިޑެންޓްތަކުގައި ގިނަ ބައެއްގެ ފުރާނައަށް ނުރައްކާވަމުންދާއިރު ފާއިތުވެދިޔަ 2 މަސްދުވަހުގެ ތެރޭގައި މާލެ،ހުޅުމާލެ ބްރިޖް މަތީގައި ހިނގި 57 އެކްސިޑެންޓެއް ފުލުހުންނަށް ރިޕޯޓުކޮށްފައިވާކަމަށް ފުލުހުން މައުލޫމާތުދެއެވެ.