ކްރިކެޓް ވޯލްޑްކަޕުގައި ރެކޯޑް ތަކަކާއެކު ޕާކިސްތާނުން ކްރިކެޓް ވޯލްޑްކަޕުގައި ލަންކާ ބަލިކޮށް ބޮޑު މޮޅެއް ރޭ ހޯދައިފި އެވެ.

އިންޑިޔާގެ ރަޖީވް ގާންދީ އިންޓަނޭޝަނަލް ސްޓޭޑިއަމުގައި ކުޅެން ފެށި މެޗުގައި ބެޓްކޮށް ލަންކާއިން ނިންމާލީ 344 ލަނޑު ހަދައިފަ އެވެ. މިއީ ކްރިކެޓް ވޯލްޑްކަޕުގައި މިހާތަނަށް ފެނުނު އެންމެ މަތީ ސްކޯ އެވެ. މިހެންވެ މި އަދަދަށް ޕާކިސްތާނަށް ވާސިލްވެވޭނެ ކަމަށް ގިނަ ބަޔަކު ޝައްކު އުފެއްދި އެވެ.

ހާއްސަކޮށް، މުހިންމު ދެ ބެޓްސްމަނުން ކަމަށްވާ ކެޕްޓަން ބަބަރް އަޒަމް 10 ލަނޑަށް އާއި އިމާމުލް ހައްގު 12 ލަނޑަށް ނުބައިވުމުން މި ޝައްކު އިތުރުވި އެވެ. އެކަމަކު މުހައްމަދު ރިޒްވާން އާއި އަބްދުﷲ ޝާފިގީގެ ޕާޓްނާޝިޕް ޕާކިސްތާނަށް ކާމިޔާބު ހޯދައިދިނުމުގައި މުހިންމު ދައުރެއް އަދާކުރި އެވެ. ރިޒްވާން 131 ލަނޑު ހެދިއިރު ޝާފިގީ 113 ލަނޑު ހެދި އެވެ. ހަތަރު ވިކެޓަށް 345 ލަނޑު ޕާކިސްތާނު ހެދިއިރު މި މެޗުގައި ފަހު 20 އޯވަރުގައި އެ ޓީމުގފެ ކުޅުން އާދަޔާ ހިލާފަށް މޮޅެވެ. އަދި މިއީ ކްރިކެޓްގައި ހަތަރު ކުޅުންތެރިއަކު 100 ހަމަކުރި ފުރަތަމަ މެޗެވެ.

މެޗަށް ފަހު ޕާކިސްތާނުގެ ކެޕްޓަން އަޒަމް ބުނީ އޯޕަނިން ބެޓްސްމަނުންނަށް ރަނގަޅަށް ނުކުޅެވުނަސް އޭގެ ފަހުން ކުޅެން ނުކުތް ކުޅުންތެރިން މޮޅަށް ކުޅުމުން ވަރަށް ބޮޑަށް ހިތްހަމަޖެހުނު ކަމަށެވެ.

މެޗަށް ފަހު ރިޒްވާން ބުނީ ޕާކިސްތާނުގެ ކޮންމެ ކުޅުންތެރިއަކު ވެސް ޗޭންޖިން ރޫމުގައި މޮޅުވާނެ ކަމަށް ގަބޫލުކުރި ކަމަށާއި ލަންކާއިން ހެދި އާދަޔާ ހިލާފު ގިނަ ލަނޑުތައް ފަހަތަށް ލައި މެޗު ކާމިޔާބު ކުރެވުނީ އެހެންވެ ކަމަށެވެ.

ލަންކާގެ ކެޕްޓަން ކަސުލް ދަސުން ޝަނަކާ ބުނީ ލަންކާގެ ކުޅުންތެރިންގެ އުކުން ރަނގަޅު ކަމަށާއި ނަމަވެސް ޕާކިސްތާން މޮޅުވީ ދަނޑުގެ ޕިޗްގެ ހާލަތު ވަރަށް ބޮޑަށް އެހީތެރިވުމުން ކަމަށެވެ.

ކްރިކެޓް ވޯލްޑްކަޕުގައި ލަންކާ މިހާތަނަށް ކުޅުނު ދެ މެޗުން ވެސް ވަނީ ބަލިވެފަ އެވެ. އަދި ޕާކިސްތާން ވަނީ ކުޅުނު ދެ މެޗު ވެސް ކާމިޔާބުކޮށްފަ އެވެ.