ކުއްޖަކު ހެދި ބޮޑުވަމުން އަންނަ ދުވަސްވަރު ބައެއް ކަންކަމަށް ހިތުގައި ޖެހޭ ލޯތްބަކީ މުޅި އުމުރަށްވެސް ދެމިގެންދާ ވަރުގަދަ ލޯތްބަކަށް ވެގެން ދާ މަންޒަރު ފެނެއެވެ. ދަޅު ބުރިބުރިއާއި ޑަބިޔާތަކުގައި ހަމައެއް ނެތި ބެރު ޖެހުމުގެ ތެރެއިން ފޫހިފިލުވަމުން ގޮސް، އާދަޔާ ޚިލާފު ބެރުވެރިއެއްގެ ގޮތުގައި އެތައް ބައެއްގެ ސަމާލުކަން ދަމައިގަތް އެކަކީ ފަލަސްތީނަށް އުފަން ހުސާމް ގާސިމެވެ.
އޭތިމީތީގައި ބެރުޖެހަމުން ބޮޑުވަމުން އައި ހުސާމް، އޭނާގެ އަމިއްލަ ޑްރަމް ސެޓެއް ހޯދުމުގެ ހުވަފެނުގައި ހަގީގީ ކުލަ ޖެއްސީވެސް ޚުދު އޭނާގެ އަމިއްލަ ދެ އަތުންނެވެ. ހުސާމްގެ ޑްރަމް ސެޓަކީ އޭނާގެ އަމިއްލަ މަސައްކަތުން އުފައްދާފައިވާ، އޭނާގެ އަމިއްލަ އީޖާދެކެވެ. މި ޑްރަމް ސެޓް އުފެއްދުމަށްޓަކައި މުޅިންހެންވެސް ބޭނުންކޮށްފައި ވަނީ މީހުން އުކާލާފައިވާ އެކިއެކި ސާމާނުތަކެވެ.
ޑްރަމް ސެޓެއް ހަދަން ބޭނުން ކުރެވިދާނެ ކަމަށް މީގެ ކުރިން މީހަކު ހީވެސް ނުކޮށް ހުރި އެތައް އެއްޗެއް ބޭނުންކޮށްގެން އޭނާ އުފެއްދި ޑްރަމް ސެޓާމެދު ހުސާމް ފަޚުރުވެރިވެއެވެ. އާންމު ޑްރަމް ސެޓްތަކުގައި ހުންނަ ކްރޭޝްގެ ދައުރު އަދާކުރުމަށް ހުސާމް ބޭނުންކުރަނީ ޓްރޭއެކެވެ. ހައި އަދި މީޑިއަމް ޓޮމްސްއަށް ބޭނުންކުރަނީ ޕްލާސްޓިކް ކޮންޓޭނަރުތަކެވެ. ބޭސްގެ ގޮތުގައި ހުސް ފީފާއެއް ބޭނުންކުރާއިރު، ހައި ހެޓްސްގެ ދައުރު އަދާކުރަނީ ސައިކަލު ކްލަޗެވެ.
އެވަރުން އަދި ނިމުނީއެއް ނޫނެވެ. ތާ އަބަދު އިޒްރޭލުގެ ބިރުދެއްކުމާއި ފުރައްސާރައިގެ ޝިކާރައަކަށް ވަމުންދާ ފަލަސްތީނުގެ ރައްޔިތުން އެ އަޑަކަށް ޖެހިލުންވެ، ބިރުގަންނަ އެއް އަޑު ކަމަށްވާ ރަބަރު ބޭންޑުވެސް ހުސާމްގެ ޑްރަމް ސެޓްގައި ބޭނުންކުރެއެވެ.
ކަލޭމެންނަށްވެސް ފެންނަން ތި ހުރީ، މި ޑްރަމް ސެޓްގަ ހުންނާނެ ލަކުޑިއާ އިސްފިރޭނާ، މަސް ފިހަން ބޭނުންކުރާ ކަހަލަ ދަގަނޑާ، ޕުލީއާ، ބައިސްކަލު ޗޭނާ... މިހެން ގޮސް، އެންމެ މުހިންމު އެތި... މި ރަބަރު ބޭންޑް. މީ މި ޑްރަމް ސެޓްގެ އެންމެ މުހިންމު ބައި. މީ އިޒްރޭލުގެ ޔަހޫދީން، އަހަރެމެން ބިރުގަންނަވަން އަޑުލައްވަން ބޭނުން ކުރާ އެއްޗެއް. އެހެންވެ، އަހަރެން މިއޮތީ، އެ ބިރުވެރި އަޑު، މީހުން ގަޔާވާ ކަހަލަ، ވަކި ހަމައަކަށް އިވޭ އަޑަކަށް ބަދަލުކޮށްލާފަ.ހުސާމް ގާސިމް؛ ޣައްޒާގެ ބެރުވެރިއެއް
މިއުޒިކުގެ ރޮނގުން އުޖާލާ މުސްތަގުބަލެއްގެ އުންމީދުގައި ހުރި ހުސާމަކީ، ދުނިޔޭގައި މި ވަގުތު އޮތް އެންމެ ބޮޑު، އަނގަމަތި ހާ ޖަލު ނުވަތަ ޣައްޒާއަށް އުފަން ޒުވާނެކެވެ.
މި ރޮނގުން އިތުރަށް ކުރިއަރާ ދިއުމަކީ އަހަރެންގެ ހުވަފެނެއް. ބައިނަލްއަގުވާމީ ފެންވަރުގެ ތަންތަނުން ކިޔަވައިގެން، މިއުޒިކީ ރޮނގުން އިތުރު ތަޖުރިބާތައް ހޯދުމަކީ ހުވަފެނެއް. އަބަދުވެސް، އަހަރެންގެ އަމިއްލަ މިއުޒިކް އިންސްޓްރޫމަންޓެއް ހުންނަން އަހަރެން ބޭނުންވޭ. އެހެންވެ، މި ޑްރަމް ސެޓް އުފެއްދީ، މިއުޒިކްގެ ދުނިޔޭގަ އުޅެލަން ވެގެން ހަމަ.ހުސާމް ގާސިމް؛ ޣައްޒާގެ ބެރުވެރިއެއް
އޭނާ މިއަދު އެވަނީ، ހުސް ވަގުތު ފަޅު ފިލުވާލުމަށް، އަތުން މާ ގިނަ ފައިސާތަކެއް ޚަރަދު ނުކޮށްވެސް މަސައްކަތްތަކެއް ކުރެވިދާނެ ކަން، ކިތަންމެ ހާ ރަނގަޅަކަށްވެސް ސާބިތު ކޮށްދީފައެވެ.
އެއީ މީގެ 6 އަހަރު ކުރި. ހުސް ވަގުތުގަ ފޫހިފިލުވާލުމުގެ ގޮތުން އަހަރެން ބެރު ޖަހާ އުޅުނީ. އޭރު އަހަރެން ބެރު ޖެހީ ބާލިދީގަނޑެއްގަ. އެ ބާލިދީ ތަރައްގީކުރަމުން ދިޔައީ، ބޮޑުކޮށް، އިތުރު ކުރަމުން. އެއީ އޭރު ހާލަތު ހުރިގޮތުން. އަސްލު ޑްރަމް ސެޓެއް ގަންނާކަށް އަތަކު ނެތް އެވަރުގެ ތަނަވަސް ކަމެއް. އެހެންވެ، އަސްލު ޑްރަމް ސެޓެއްގެ ބަދަލުގަ، ދެން ބޭނުން ކުރެވިދާނެ ހަމަ އެކަހަލަ އެއްޗެއް އުފެއްދީ.ހުސާމް ގާސިމް؛ ޣައްޒާގެ ބެރުވެރިއެއް
މިއަދު ހުސާމަކީ ސޯޝަލް މީޑިއާގައިވެސް މަގުބޫލުވަމުން އަންނަ، އަދި ގިނަ ބަޔަކަށް ފަރިތަ ބެރުވެރިއެކެވެ.
ހުސާމްގެ ގާބިލުކަމާ ހުނަރުވެރިކަމާ މެދަކު އަހަރެން ޝައްކެއް ނުކުރަން. ޓިކްޓޮކަށް ވީޑިއޯވެސް ރެކޯޑްކޮށްދެން. އަޕްލޯޑްވެސް ކޮށްދެން. މީހުން ވަރަށް ގަޔާވޭ އެ ވީޑިއޯތަކާ. ވިއުޒް އަރާ 1.5 މިލިއަނަށްވުރެ މައްޗަށްވެސް. އެކަމުން ހިތްވަރު ލިބުނީ، އިތުރަށް ފުރިހަމަކޮށް، މި ރޮނގުން ކުރިއަށް ދާން.ރާނީ ޣާބިން؛ ހުސާމްގެ އެކުވެރިއެއް
ޒުވާނުން ކަމަށް ބަލާ އުމުރުފުރައަކީ 18 އަހަރާ 29 އަހަރާ ދެމެދު ކަމަށް ވާއިރު، ފަލަސްތީނުގެ ޒުވާނުންގެ އާބާދީގެ 21.5 ޕަސެންޓް މީހުން ދިރިއުޅެނީ ޣައްޒާގައެވެ. ޣައްޒާއަކީ އިގްތިސާދީ އަދި މާލީ ގޮތުން އިނދަޖެހިފައި އޮތް ސިޓީއެކެވެ. ވަޒީފާ ނުލިބުމުގެ މައްސަލައަކީ ޣައްޒާގެ ޒުވާނުންނަށް ކުރިމަތިލާން ޖެހިފައިވާ އެންމެ ބޮޑު އެއް ތަކުލީފެވެ. ޣައްޒާގައި ދިރިއުޅޭ ފަލަސްތީނު ރައްޔިތުންގެ ތެރެއިން 2 ބައިކުޅަ 1 ބަޔަށްވުރެ ގިނަ މީހުންނަކީ ފަގީރު ކަމަށް ބަލާ މިންގަނޑަށްވުރެ ދެރަ، ނިކަމެތި ހާލަތުގައި ދިރިއުޅެން މަޖުބޫރު ވެފައިވާ ބައެކެވެ. ޣައްޒާގެ އާބާދީގެ 80 ޕަސެންޓް މީހުންނަކީ އިންސާނީ އެހީއަށް ބަރޯސާވެފައިވާ ބައެކެވެ.
