ޖަރުމަނު ލީގުގައި ފްރެއިބާގާ ދެކޮޅަށް ކުޅުނު މެޗުން މޮޅުވެ، އެންމެ ފަހުގެ ޗެމްޕިއަން ބަޔާން މިއުނިކުން ތިން ވަނައިގައި ހިފަހައްޓައިފި އެވެ.
ބަޔާންގެ އަމިއްލަ ދަނޑުގައި އާދީއްތަ ދުވަހުގެ ރޭ ކުޅުނު މެޗު އެ ޓީމުން ކާމިޔާބު ކުރީ 3-0 އިންނެވެ. މެޗުގެ ފުރަތަމަ ހާފުގައި ބަޔާނުން ވަނީ ދެ ލަނޑު ޖަހައިފަ އެވެ. އަނެއް ލަނޑު އެ ޓީމުން ޖަހާފައި ވަނީ ދެ ވަނަ ހާފުގަ އެވެ.
ފުރަތަމަ ހާފުގެ 12 ވަނަ މިނެޓުގައި ބަޔާނަށް ލީޑު ނަގައިދިނީ ކިންގްސްލީ ކޯމަން އެވެ. އޭނާ އެ ލަނޑު ޖެހީ ތޯމަަސް މުލާ ތަނަވަސްކޮށްދިން ފުރުސަތެއްގަ އެވެ. އޭގެ ފަހުން 25 ވަނަ މިނެޓުގައި ބަޔާންގެ ދެ ވަނަ ލަނޑު ޖެހީ ލެރޯއީ ސާނޭ އެވެ. ސާނޭ އެ ލަނޑު ޖަހަން ފުރުސަތު ތަނަވަސްކޮށްދިނީ ޓޮޓެންހަމް ދޫކޮށް ބަޔާނަށް ބަދަލުވި އިންގްލެންޑުގެ ކެޕްޓަން ހެރީ ކޭން އެވެ. ފުރަތަމަ ހާފު ނިމުމުގެ ކުރިން ސާނޭ ދެ ވަނަ ލަނޑެއް ޖަހައި ބަޔާނަށް ލީޑު ފުޅާ ކޮށްދިން ނަމަވެސް، ވީއޭއާރު ބެލުމަށްފަހު ރެފްރީ ނިންމީ ލަނޑު ބަަލައި ނުގަތުމަށެވެ. ބަޔާންގެ ފަހު ލަނޑު ކޯމަން ޖެހީ މެޗުގެ ފުރިހަމަ ވަގުތު ހަމަވާން ފަސް މިނެޓަށްވެފައި ވަނިކޮށެވެ. އޭނާ އެ ލަނޑު ޖެހީ ކޮނާޑް ލައިމާ ތަނަވަސްކޮށްދިން ފުރުސަތެއްގަ އެވެ.
މޮޅާއެކު ބަޔާން ތިން ވަނައިގައި އޮތީ ހަތް މެޗުން 17 ޕޮއިންޓު ހޯދައިގެންނެވެ. ހަތަރު ވަނައިގައި އޮތް ބޮރޫޝިއާ ޑޯޓްމަންޑަށް ވެސް 17 ޕޮއިންޓު ލިބޭއިރު، ބަޔާނަށް ކުރި ލިބެނީ ފައިދާ ލަނޑުންނެވެ. ދެ ވަނައިގައި އޮތް ސްޓަޓްގާޓާ ބަޔާނާ ދެމެދު އޮތީ ޕޮއިންޓެއްގެ ފަރަގެކެވެ.
