ނަޝީދުގެ އިތުބާރު ނެތް ކަމުގެ މައްސަލަ ހުށަހަޅަން އެމްޑީޕީ ޕީޖީ ގްރޫޕުން މަޝްވަރާ ކޮށްފި
މެޖޯރިޓީ ޕާޓީގެ ގޮތުން އެމްޑީޕީން ބޭނުންވަނީ ރިޔާސަތާ ހަވާލުވާން
އެމްޑީޕީ ޕީޖީ ގްރޫޕުން ރައީސްއާ ބައްދަލުކުރެއްވުމުގެ ތެރެއިން
ރައްޔިތުންގެ މަޖިލީހުގެ ރައީސް މުޙައްމަދު ނަޝީދުގެ އިތުބާރު ނެތް ކަމުގެ މައްސަލަ ހުށަހެޅުމަށް މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލިމަންޓްރީ ގްރޫޕުން މަޝްވަރާ ކޮށްފިއެވެ.
މި މަޝްވަރާތައް ކޮށްފައިވަނީ ހޮނިހިރު ދުވަހު އެމްޑީޕީގެ ޕީޖީ ގްރޫޕުގެ މެމްބަރުންނާއި ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހާއެކު ބޭއްވި ބައްދަލުކުރެއްވުމެއްގައެވެ. މި ބައްދަލުކުރެއްވުމުގައި ދައުލަތުގެ ބައެއް ވަޒީރުން ވެސް ބައިވެރިވެވަޑައިގެންނެވިއެވެ.
"ރާއްޖެ އެމްވީ" އަށް މައުލޫމާތު ލިބިފައިވާ ގޮތުގައި މި ބައްދަލު ކުރެއްވުމުގައި ޕީޖީ ގްރޫޕުގެ މެމްބަރުން ވަނީ އިދިކޮޅު ޕާޓީއެއްގެ ދައުރު އަދާކުރަން ޖެހޭތީ މަޖިލީހުގައި މެޖޯރިޓީ އޮތް ޕާޓީގެ ގޮތުން މަޖިލީހުގެ ރިޔާސަތާ އެ ޕާޓީން ހަވާލުވާން ޖެހޭކަން ފާހަގަކުރައްވާފައެވެ. އެހެންވެ، ރައީސް ނަޝީދުގެ އިތުބާރު ނެތް ކަމުގެ މައްސަލަ މަޖިލިހަށް ވެއްދުމަށް ވަނީ މަޝްވަރާ ކޮށްފައެވެ.
ރައީސް ނަޝީދު މަޖިލީހުގެ ރިޔާސަތާ ހަވާލުވެވަޑައިގެންނެވީ އެމްޑީޕީގައި ހުންނަވައިގެންނެވެ. ނަމަވެސް އެމަނިކުފާނު ވަނީ އެމްޑީޕީ ދޫކުރައްވައި ދަ ޑިމްކޮރެޓްސްއާ ގުޅިވަޑައިގެންފައެވެ.
ރައްޔިތުންގެ މަޖިލީހުގެ ރިޔާސަތާ އެމްޑީޕީން ހަވާލުވުމުގެ އިތުރުން ކުރިއަށް އޮތް މަޖިލިސް އިންތިޚާބަށް ތައްޔާރުވުމާ ގުޅޭގޮތުންނާއި ޕާޓީގެ ހަރަކާތްތައް ކުރިއަށް ގެންދާނެ ގޮތާ ގުޅޭގޮތުން ވެސް މި ބައްދަލުކުރެއްވުމުގައި ޕީޖީ ގްރޫޕުގެ މެމްބަރުން ވަނީ މަޝްވަރާ ކުރައްވާފައެވެ. އަދި ކުރިއަށް އޮތް ދުވަސްކޮޅުގެ ތެރޭގައި ސަރުކާރު ހިންގާނެ ގޮތާ ގުޅޭގޮތުން ވެސް މެމްބަރުން ވަނީ ރައީސަށް ލަފާ ދެއްވާފައެވެ.
